‌ဟေတီနိုင်ငံမှာ မယ်လစ်ဆာဟာရီကိန်းမုန်တိုင်းကြောင့် မိုးသည်းထန်ခဲ့လို့ အနည်းဆုံး ၃၁ ယောက် သေဆုံးပြီး လူအယောက် ၂၀ ပျောက်ဆုံးနေကြောင်း အာဏာပိုင်တွေက ထုတ်ပြန်ခဲ့ပြီး  အောက်တိုဘာ ၃၁ ရက်မှာ နိုင်ငံတောင်ပိုင်းက စေတနာ့ဝန်ထမ်းတွေဟာ ရွှံ့တွေနဲ့ အပျက်အစီးတွေကို တူးထုတ်ကာ  ပျောက်ဆုံးနေသူတွေကို ရှာဖွေကယ်ဆယ်ရေး လုပ်နေပါတယ်။

ပြင်းပြင်းထန်ထန် သဘာဝဘေးသင့်ထိခိုက်ခဲ့တဲ့ ပတိဂိုအာ့ဗ်မြို့မှာ ကလေးငယ် ၁၀  ယောက် အပါအဝင် အနည်းဆုံး လူ ၂၃ ယောက် သေဆုံးခဲ့ရပြီး မြစ်ကမ်းပါးပြိုကျပြီးနောက်မှာ ကယ်ဆယ်ရေးအဖွဲ့တွေဟာ အလောင်းတွေကို ပြန်ရှာတွေ့ဖို့ ခက်ခက်ခဲခဲ  ဆက်လုပ်ဆောင်ခဲ့ကြပါတယ်။

ဟေတီနိုင်ငံရဲ့ အသွင်ကူးပြောင်းရေး သမ္မတကောင်စီရဲ့ အကြီးအကဲက ဒီဖြစ်ရပ်ကို “နိုင်ငံအတွက် ဝမ်းနည်းဖွယ်အချိန်”လို့ ခေါ်ဆိုခဲ့ပြီး နေအိမ်တွေ၊ လယ်ယာမြေတွေ၊ မွေးမြူရေးတိရစ္ဆာန်တွေနဲ့ အခြေခံအဆောက်အအုံတွေကို ကျယ်ကျယ်ပြန့်ပြန့် ပျက်စီးစေခဲ့တယ်လို့ ပြောပါတယ်။

၂၀၂၂ ခုနှစ်တုန်းက ဟေတီမှာ ကာလဝမ်းရောဂါ ပြန်ပေါ်ပေါက်လာခဲ့တာကြောင့်  အာဏာပိုင်တွေဟာ ရေကြီးရေလျှံမှုကြောင့် ညစ်ညမ်းမှုကနေ ကာလဝမ်းရောဂါ အန္တရာယ်တွေကိုလည်း  သတိပေးခဲ့ပါတယ်။

ဟေတီနိုင်ငံကို မယ်လစ်ဆာမုန်တိုင်းက တိုက်ရိုက် တိုက်ခတ်ခဲ့တာမဟုတ်ပေမဲ့ ဖြည်းဖြည်းချင်း ရွေ့လျားနေတဲ့ မုန်တိုင်းကြောင့် ရက်ပေါင်းများစွာ မိုးသည်းထန်စွာရွာသွန်းမှုကို ခံစားခဲ့ရပြီး ကရစ်ဘီယံဒေသမှာ အနည်းဆုံး လူအယောက်  ၅၀ သေဆုံးပြီးနောက် သောကြာနေ့မှာတော့ မုန်တိုင်း အားပျော့သွားပါတယ်။ 

Source: Reuters