အာဏာသိမ်းစစ်တပ်ရဲ့ ရွေးကောက်ပွဲဝါဒဖြန့် “ခေတ်သမိုင်းကို ဒုန်းစိုင်းမည့်သူများ” ဇာတ်လမ်းမှာ ပါဝင်ကြတဲ့ သရုပ်ဆောင်တွေကို လူမှုရေးပြစ်ဒဏ်နဲ့ သပိတ်မှောက်တာ ပြင်းထန် ထိရောက် သွားတဲ့အတွက် စစ်ကောင်စီပြန်ကြားရေးဝန်ကြီးဌာနက အနုပညာရှင် အားလုံးကို​ မလာမ​နေရဆိုပြီး ဒီကနေ့ အရေးပေါ် အစည်းအဝေးခေါ်ထားတယ်လို့ အနုပညာအသိုက်အဝန်းနဲ့ နီးစပ်သူတွေက ပြောပါတယ်။

အနုပညာအသိုက်အဝန်းနဲ့ နီးစပ်သူတယောက်က  “မြန်မာနိုင်ငံရုပ်ရှင်အစည်းအရုံး ရန်ကုန်မှာ လုပ်မှာ၊ ပြန်ဝန်တက်မယ်လို့ သိရတယ်။ ခေတ်သမိုင်းကို ဒုန်းစိုင်းမည့်သူများကို BC နဲ့ Social punishment ထိရောက်သွားလို့ ကြော်ငြာကုမ္ပဏီတွေက အဲဒီဇာတ်လမ်းက သရုပ်ဆောင်တွေကို မရိုက်တော့ဘူးဆိုလို့ အဲဒီကိစ္စနဲ့ အဲဒီမရိုက်တဲ့ ကုမ္ပဏီတွေကို ဆက်ရိုက်ဖို့ စစ်ကောင်စီ ဖိအားပေးဖို့နဲ့ တန်ပြန်အစီအစဉ်တွေ လုပ်မယ်လို့ အကြမ်းဖျင်းသိရတယ်” လို့ DVB ကို ပြောပါတယ်။

စစ်ကောင်စီ ပြန်ကြားရေးဝန်ကြီး ဦးမောင်မောင်အုန်းလည်း တက်ရောက်မယ့် ဒီအစည်းအဝေးကိုတော့ နေ့လယ် ၁ နာရီမှာ ပြုလုပ်သွားမယ်လို့ သိရပါတယ်။

“ခေတ်သမိုင်းကို ဒုန်းစိုင်းမည့်သူများ” ဇာတ်လမ်းတိုနဲ့ ဇာတ်လမ်းမှာ နေတိုး၊ မြင့်မြတ်၊ နေဝင်း၊ အေးချမ်းမောင်၊ မေမြင့်မိုရ်နဲ့ ခြူးလေးတို့ အပါအဝင် အောင်ခိုင်၊ ငှက်ပျောကြော် စတဲ့ ဇာတ်ပို့ ဇာတ်ရံတွေ ပါဝင်သရုပ်ဆောင်ထားကြတာပါ။

ဇာတ်လမ်း၊ ဇာတ်ညွှန်း၊ ဒါရိုက်တာ စတာတွေကို မဖော်ပြထားဘဲ ‌ခေတ်သမိုင်း သုခုမရပ်ဝန်းမှ စီစဉ်တင်ဆက်သည်လို့သာ ဖော်ပြထားပေမဲ့ စစ်တပ်ဝါဒဖြန့်ဇာတ်လမ်းတွေ ရိုက်နေကျ စစ်ကောင်စီတပ်ရဲ့ ဗိုလ်ကြီးတင်အောင်စိုး (ပန်းမြို့တော်) ဖြစ်တယ်လို့လည်း အနုပညာအသိုက်အဝန်းက ​ဆိုပါတယ်။

ဒီဇာတ်လမ်းကို ဝေဖန်ခဲ့လို့ဆိုပြီး  ဒါရိုက်တာ မိုက်တီး၊ ဇာတ်ပို့သရုပ်ဆောင် ကျော်ဝင်းထွဋ်နဲ့ ဟာသသရုပ်ဆောင် အုန်းဒိုင်းတို့ကိုလည်း စစ်တပ်က ဖမ်းဆီးခဲ့ပြီး ရွေးကောက်ပွဲ နှောင့်ယှက်ဟန့်တားဖျက်ဆီးခြင်းကနေ ကာကွယ်ပေးရေးဥပဒေနဲ့ အရေးယူမယ်လို့ ထုတ်ပြန်ထားပါတယ်။

တဖက်မှာလည်း ဒီဇာတ်လမ်းမှာ ပါဝင်သရုပ်ဆောင်ခဲ့ကြသူတွေကို တော်လှန်အနုပညာရှင်တွေ၊ မြို့ပြအင်အားစုတွေနဲ့  ပြည်သူတွေက ပြင်းပြင်းထန်ထန် ဝေဖန်ခဲ့ကြပြီးနောက် ဒီသရုပ်ဆောင်တွေကို သပိတ်မှောက်ပြီး လူမှုရေးပြစ်ဒဏ် ပြင်းပြင်းထန်ထန် ပြုလုပ်ကြဖို့ ရန်ကုန်မြို့ပြတော်လှန်ရေးအင်အားစုတွေက ထုတ်ပြန်ခဲ့ကြပါတယ်။

မြတ်သဇင်