တရုတ်နိုင်ငံဟာ ငြိမ်းချမ်းစွာ ပြန်လည်ပေါင်းစည်းရေးကို ကတိပြုပေမဲ့ နယ်မြေတည်တံ့ခိုင်မြဲရေးကို ကာကွယ်ဖို့ အင်အားသုံးမှုကို ဘယ်သောအခါမှ စွန့်လွှတ်မှာ မဟုတ်ဘူးလို့ တရုတ်နိုင်ငံတော်ကောင်စီရဲ့ ထိုင်ဝမ်ရေးရာရုံးက ပြောရေးဆိုခွင့်ရှိသူ ဖန်းချင်းယဉ်က အောက်တိုဘာ ၂၉ ရက်မှာ ပြောလိုက်ပါတယ်။
အကြိမ် ၂၀ မြောက် တရုတ်ကွန်မြူနစ်ပါတီ ဗဟိုကော်မတီရဲ့ စတုတ္ထအကြိမ် မျက်နှာစုံညီ အစည်းအဝေးရဲ့ ကြေညာချက်ထဲမှာ “ငြိမ်းချမ်းစွာ ပြန်လည်ပေါင်းစည်းရေး” ဆိုတဲ့ စကားစုကို ချန်လှပ်ထားတဲ့အပေါ် အများပြည်သူရဲ့ ထင်မြင်ယူဆချက်နဲ့ ပတ်သက်တဲ့ မေးမြန်းချက်ကို သူက ခုလို ဖြေကြားခဲ့တာပါ။
ငြိမ်းချမ်းစွာ ပြန်လည်ပေါင်းစည်းရေးနဲ့ တနိုင်ငံ၊ စနစ်နှစ်မျိုး မူဝါဒတို့ဟာ ထိုင်ဝမ်ပြဿနာကို ဖြေရှင်းဖို့ အခြေခံမူနဲ့ အမျိုးသားပြန်လည်ပေါင်းစည်းရေးကို အကောင်အထည်ဖော်ဖို့ အကောင်းဆုံးနည်းလမ်းပါ။
ဖန်းချင်းယဉ်က “ငြိမ်းချမ်းစွာ ပြန်လည်ပေါင်းစည်းရေးအတွက် လုံလောက်တဲ့နေရာတွေ ဖန်တီးပေးဖို့ ကျနော်တို့ ကတိပြုထားပြီး အမြင့်ဆုံးစိတ်ရင်းမှန်နဲ့ အကြီးမားဆုံးသော ကြိုးပမ်းအားထုတ်မှုတို့နဲ့ ငြိမ်းငြိမ်းချမ်းချမ်း ပြန်လည်ပေါင်းစည်းရေး အလားအလာကို လိုက်စားသွားပါမှာပါ” လို့ ပြောပါတယ်။
“ဒါပေမဲ့ ကျနော်တို့က အင်အားသုံးမှုကို ဘယ်တော့မှ စွန့်လွှတ်မှာ မဟုတ်ပါဘူး။ လိုအပ်တဲ့ အစီအမံအားလုံးကို လုပ်ဆောင်ဖို့ ရွေးချယ်ခွင့်ကို ကျနော်တို့ ကိုင်စွဲထားပါတယ်” လို့ ဖန်းချင်းယဉ်က ဆက်ပြောခဲ့ပါတယ်။
ငြိမ်းချမ်းစွာ ပြန်လည်ပေါင်းစည်းရေးအတွက် ထိုင်ဝမ်ရေလက်ကြားရဲ့ နှစ်ဖက်စလုံးက နိုင်ငံသားတွေရဲ့ ပူးတွဲကြိုးပမ်းအားထုတ်မှုတွေနဲ့ အပြန်အလှန် စေတနာကောင်းတွေ လိုပါတယ်။
ဖန်းချင်းယဉ်က “ထိုင်ဝမ် ခွဲထွက်ရေးလှုပ်ရှားမှုတွေနဲ့ ပြင်ပဝင်ရောက်စွက်ဖက်မှုတွေကို ပြတ်ပြတ်သားသား ဆန့်ကျင်တာ၊ အမျိုးသားပြန်လည်ပေါင်းစည်းရေးရဲ့ အကြောင်းရင်းကို ခိုင်ခိုင်မာမာ ရှေ့တိုးလုပ်ဆောင်တာနဲ့ တရုတ်နိုင်ငံရဲ့ ရေရှည်ကောင်းကျိုးအတွက် ကြိုးပမ်းရင်း ကြီးကျယ်တဲ့ ပြန်လည်နုပျိုမှုရဲ့ ဂုဏ်ကျက်သရေကို မျှဝေခြင်းတို့မှာ ထိုင်ဝမ်သားတွေက ကျနော်တို့နဲ့အတူ ရပ်တည်ဖို့ ကျနော်တို့ တောင်းဆိုပါတယ်” လို့လည်း ပြောခဲ့ပါတယ်။
Source: Reuters
