ရခိုင်ပြည်နယ် တောင်ကုတ်မြို့က မဟော်သဓာအခမဲ့ ကိုယ်ပိုင်အထက်တန်းကျောင်းကို စစ်ကောင်စီက အောက်တိုဘာ ၂၇ ရက်နေ့ ညနေပိုင်းမှာ လေကြောင်းတိုက်ခိုက်ခဲ့တယ်လို့ မြို့ခံတွေက ပြောပါတယ်။
တောင်ကုတ်မြို့က မဟော်သဓာ အခမဲ့ကိုယ်ပိုင်စာသင်ကျောင်းကို အောက်တိုဘာ ၂၇ ရက်နေ့ ညနေ ၇ နာရီခန့်မှာ စစ်ကောင်စီက ဂျက်ဖိုက်တာတစီးနဲ့ ပေါင် ၅၀၀ ဗုံးတလုံး ကြဲချခဲ့တာဖြစ်ပြီး အရပ်သားထိခိုက်မှု မရှိဘူးလို့ တောင်ကုတ်ဒေသခံ အမျိုးသားတယောက်က ပြောပါတယ်။
“မနေ့ညနေပိုင်းမှာ စစ်ကောင်စီက တောင်ကုတ်မြို့က မဟော်သဓာ အခမဲ့ ကိုယ်ပိုင်အထက်တန်းကျောင်းကို ပေါင် ၅၀၀ ဗုံးတလုံးနဲ့ ကြဲချသွားတာ ရှိတယ်။ ကျောင်းက ပိတ်ထားတာဆိုတော့ လူအထိအခိုက်တော့ မရှိဘူး။ ကျောင်းဆောင်ကတော့ အကုန်လုံးနီးပါး ပျက်စီးသွားတယ်။ စစ်ကောင်စီက စာသင်ကျောင်းတွေကို ပစ်မှတ်ထားပြီး တိုက်ခိုက်လာတာကို နားလည်လို့ကို မရဘူး။”
မဟော်သဓာ အခမဲ့ကိုယ်ပိုင်အထက်တန်းကျောင်းဟာ ရခိုင်ပြည်နယ် တောင်ပိုင်းက ငွေကြေးမတက်နိုင်တဲ့ ကျောင်းသားတွေကို အဓိကထား ပညာသင်ကြားပေးနေတဲ့ ကျောင်းဖြစ်တယ်လို့ မြို့ခံတွေက ပြောပါတယ်။
ပြီးခဲ့တဲ့ စက်တင်ဘာ ၁၂ ရက်နေ့ကလည်း ကျောက်တော်မြို့နယ် သရက်တပင်ကျေးရွာက ကိုယ်ပိုင်အထက်ကျောင်း ၂ ခုကို လေကြောင်းတိုက်ခိုက်ခဲ့တဲ့အတွက် ကျောင်းသား ၂၀ သေဆုံးပြီး နောက်ထပ် ၂၈ ဦး ထိခိုက်ဒဏ်ရာရရှိခဲ့ကြပါတယ်။
စစ်ကောင်စီဟာ အောက်တိုဘာလ ၂၆ ရက်နေ့ကလည်း အမ်းမြို့ကို လေကြောင်းတိုက်ခိုက်ခဲ့တဲ့အတွက် ၃ တန်းကျောင်းသားတယောက် ထိခိုက်ဒဏ်ရာရရှိခဲ့ပါတယ်။
ဒါ့အပြင် အောက်တိုဘာ ၂၅ ရက်နကလည်း ကျောက်ဖြူမြို့နယ် သိုင်းချောင်းကျေးရွာအနီးကို လေကြောင်းတိုက်ခိုက်ခဲ့တဲ့အတွက် အမျိုးသား ၂ ယောက် ဒဏ်ရာရရှိခဲ့ကြပါတယ်။
စစ်ကောင်စီက ရခိုင်က မြို့နယ်တွေကို ဆက်တိုက် လေကြောင်းတိုက်ခိုက်နေတဲ့အတွက် ပြည်သူတွေအနေနဲ့ စစ်ရေးသတိ မမြဲရှိကြဖို့ကိုလည်း တိုက်တွန်းထားပါတယ်။
စစ်ကောင်စီဟာ ရခိုင်က ဆုံးရှုံးမြို့နယ်တွေကို ပြန်လည်ရရှိနိုင်ဖို့ မကွေး၊ ပဲခူးနဲ့ ဧရာဝတီဘက်ကနေ ထိုးစစ်ဆင်နေသလို ဝေဟင်ကလည်း အဆက်မပြတ်တိုက်ခိုက်နေတာပါ။
