စစ်ရေးပဋိပက္ခ ပြင်းထန်တဲ့ ပဲခူးတိုင်း၊ ပြည်ခရိုင်၊ ပန်းတောင်းတပ်နယ်ကို စစ်ကောင်စီက အောက်တိုဘာ ၂၄ ရက်စလို့ စစ်ကူအင်အားနဲ့ ဒရုန်းလက်နက်တွေကို လေယာဥ်နဲ့ ပို့ဆောင်နေတယ်လို့ စစ်ရေးသတင်းအရင်းအမြစ်က ပြောပါတယ်။
တပ်မ ၇၇ အပါအဝင် တိုက်ခိုက်ရေးတပ်တချို့နဲ့ ဒရုန်းတပ်တွေကို တောင်ငူလေတပ်စခန်းမှာ စုစည်းကာ အသုတ်လိုက်ခွဲ ပို့ဆောင်နေပြီး အကြာင်းအရင်းက ကပစ ၁၆ လို့ခေါ်တဲ့ ကာကွယ်ရေးပစ္စည်းစက်ရုံအတွက် စိုးရိမ်စရာအခြေအနေ ဖြစ်လာလို့ အခုလိုလုပ်ဆောင်နေတာလို့ စစ်ရေးသတင်းအမြစ်က DVB ကို ပြောပါတယ်။
“AA ရဲ့ ထိုးစစ်က ကပစ ၁၆ ကို ဦးတည်လာပြီ။ ကပစ ၁၆ ကျရင် တပ်အတွက် ကြီးမားတဲ့ ဆုံးရှုံးမှုတွေ ဖြစ်တော့မှာ သိတဲ့အတွက် ထိုးစစ်အတွက်မဟုတ်ဘူး၊ ခံစစ်အတွက် ကြိုပြင်တဲ့သဘော၊ လက်ရှိ ကပစ ၁၆ နားက မသုံရွာ အနီးတဝိုက်ရွာမှာ တိုက်ပွဲတွေဖြစ်နေတယ်။”
အောက်တိုဘာ ၁၅ ရက်က အာရက္ခတပ်တော် (AA) က ကပစ ၁၆ အနီးက ပွိုင့် ၆၆၆ ကုန်းကို သိမ်းယူပြီးနောက် စစ်ကောင်စီတပ်အတွက် စိုးရိမ်စရာ အခြေအနေ ဖြစ်လာတယ်လို့ ဆိုပါတယ်။
ဒီအခြေအနေတွေကို စစ်ကောင်စီဘက်က တရားဝင် သတင်းမထုတ်ပြန်ပေမဲ့ တောင်ကုတ်-ပန်းတောင်းလမ်းက ရွာတချို့ကို လေကြောင်းက ဗုံးကြဲလို့ ရွာခံတချို့ သေဆုံးတာတွေ ရှိသလို စစ်ရှောင် ရခိုင်လူမျိုးတွေကို ဖမ်းဆီးစစ်ဆေးနေတယ်လို့ ဒေသခံတယောက်က DVB ကို ပြောပါတယ်။
“အောက်တိုဘာ ၁၈ ကတည်းက တပ်က Y 12 နဲ့ ဗုံးကြဲနေတာ၊ တောင့်တင်း၊ သစ်ချိုနဲ့ ယင်းမာဘက်က ရွာခံတချို့ သေတယ်။ စစ်ရှောင်လာတဲ့ ရခိုင်တွေကို ရေပေါ်ကြီး၊ ရပ်တော်မူ၊ စလူနဲ့ ဒိုးနွယ်စမ်းမှာ စစ်ကြောင်းဖမ်းသွားတာ ၃၀ လောက်ရှိတယ်။”
ဒါ့အပြင် ကပစ ၁၆ အနီးက မသုံ၊ ဖလုံ၊ ကျောက်ဇကွဲ၊ ကျားခြေရာ စတဲ့ရွာတွေမှာ စစ်ကောင်စီတပ်က တပ်စွဲထားသလို ရွာခံလူငယ်တွေအား ကပစ စက်ရုံကို ကာကွယ်ဖို့ အတင်းအဓမ္မ စစ်သင်တန်းပေးနေတယ်လို့ ဒေသခံတွေဆီက သိရပါတယ်။
၁၀၂၇ စစ်ဆင်ရေးမှာ အာရက္ခတပ်တော် (AA) က အနောက်ပိုင်းတိုင်းစစ်ဌာနချုပ် အပါအဝင် ရခိုင်ပြည်နယ်က မြို့ ၁၄ မြို့ကို သိမ်းပိုက်ထားပြီး ရခိုင်-မကွေး အစပ်နဲ့ ရခိုင်-ဧရာဝတီ အစပ်က နေရာတချို့ကိုလည်း ထိန်းချုပ်ထားပါတယ်။
