၈၈ မျိုးဆက်ကျောင်းသားခေါင်းဆောင် တယောက်လည်းဖြစ်၊ ပြည်သူ့ပါတီ ဥက္ကဋ္ဌလည်းဖြစ်တဲ့ ဦးကိုကိုကြီး အနေနဲ့ စစ်တပ်ကကျင်းပမယ့် ရွေးကောက်ပွဲမှာ လမ်းမတော်မြို့နယ် ပြည်သူ့လွှတ်တော် ကိုယ်စားလှယ်လောင်းအနေနဲ့ ဝင်ရောက်အရွေးခံသွားမယ်လို့ သိရပါတယ်။
စစ်တပ်ဩဇာခံ ပြည်ထောင်စုရွေးကောက်ပွဲကော်မရှင် (UEC) က အောက်တိုဘာ ၁၉ ရက်မှာ ရွေးကောက်ပွဲ ဝင်ပြိုင်ခွင့်ရတဲ့ ကိုယ်စားလှယ်လောင်းတွေရဲ့ အမည်စာရင်းကို ထုတ်ပြန်ကြေညာခဲ့တာမှာ ဦးကိုကိုကြီးလည်း အဲဒီအထဲမှာ ပါတယ်လို့ သိရပါတယ်။
ဦးကိုကိုကြီးက “ပါပါတယ်ဗျ။ အတည်ပြုပြီးပါပြီ။ လမ်းမတော်မြို့နယ် ပြည်သူ့လွှတ်တော် ကိုယ်စားလှယ်လောင်းပါခင်ဗျ” လို့ DVB ကို ပြောပါတယ်။
ဦးကိုကိုကြီးဟာ ပြီးခဲ့တဲ့ ၂၀၁၅ ရွေးကောက်ပွဲတုန်းက NLD ပါတီကနေ ဝင်ပြိုင်ဖို့ ကြိုးစားခဲ့ဖူးပြီး NLD က ကိုယ်စားလှယ်လောင်းအဖြစ် မရွေးချယ်ခဲ့ပါဘူး။
အဲဒီနောက် ၂၀၁၈ ခုနှစ်မှာ ပြည်သူ့ပါတီကို တည်ထောင်ခဲ့ပြီး ၂၀၂၀ ရွေးကောက်ပွဲမှာ တောင်ဥက္ကလာပမြို့နယ်ကနေ ရွေးကောက်ပွဲ ဝင်ပြိုင်ခဲ့ပေမဲ့ ၂ ဒသမ ၇၄ ရာခိုင်နှုန်းသာ မဲရခဲ့လို့ ရှုံးနိမ့်ခဲ့ရပါတယ်။
လာမယ့် ၂၀၂၅ ရွေးကောက်ပွဲမှာ ဝင်ရောက်အရွေးခံမယ့် လွှတ်တော်ကိုယ်စားလှယ်လောင်းတွေထဲမှာ အမတ်ဟောင်းဖြစ်တဲ့ ဒေါ်စန္ဒာမင်းနဲ့ ဝန်ကြီးဟောင်း ဒေါ်သက်သက်ခိုင်တို့လည်း ရန်ကုန်မြို့ရဲ့ အချက်အခြာကျတဲ့ မဲဆန္ဒနယ်တွေကနေ ဝင်ပြိုင်ဖို့ ရှိနေပါတယ်။
ဒေါ်စန္ဒာမင်း အနေနဲ့ လသာမြို့နယ်ကနေ တသီးပုဂ္ဂလ အမတ်လောင်းအနေနဲ့ ပြိုင်မှာဖြစ်ပြီး ပြည်သူ့ရှေ့ဆောင်ပါတီ (PPP) ဥက္ကဋ္ဌ ဒေါ်သက်သက်ခိုင်ကတော့ ရန်ကုန်တိုင်းဒေသကြီး အမျိုးသားလွှတ်တော် မဲဆန္ဒနယ် အမှတ် ၂ ကနေ ဝင်ပြိုင်သွားမယ်လို့ သိရပါတယ်။
ဒေါ်သက်သက်ခိုင်က “ကျမအနေနဲ့ လာမယ့် အထွေထွေရွေးကောက်ပွဲမှာ ပြည်သူ့ရှေ့ဆောင်ပါတီ (PPP) ကို ကိုယ်စားပြုပြီး ရန်ကုန်တိုင်းဒေသကြီး၊ အမျိုးသားလွှတ်တော် မဲဆန္ဒနယ် အမှတ် ၂ မှာ နိုင်သူအကုန်ယူစနစ် (FPTP) စနစ်မှာ ဝင်ရောက်ယှဥ်ပြိုင်ဖို့ UEC ထံက တရားဝင်ခွင့်ပြုချက် ရရှိပြီဖြစ်ပါတယ်ရှင့်” လို့ ဆိုပါတယ်။
ဦးကိုကိုကြီး ခေါင်းဆောင်တဲ့ ပြည်သူ့ပါတီက လာမယ့် ဒီဇင်ဘာလ ရွေးကောက်ပွဲအတွက် ကိုယ်စားလှယ်လောင်း ၅၁၂ ယောက် အမည်စာရင်းတင်သွင်းထားပြီး ကိုကိုးကျွန်းမြို့နယ်မှအပ ကျန်မဲဆန္ဒနယ် အားလုံး ဝင်ပြိုင်သွားမယ်လို့လည်း သိရပါတယ်။
အာဏာသိမ်းစစ်တပ်က လုပ်မယ့် ရွေးကောက်ပွဲဟာ တရားမဝင်တဲ့ အတုအယောင် ရွေးကောက်ပွဲ ဖြစ်တယ်လို့ အမျိုးသားညီညွတ်ရေးအစိုးရ (NUG) နဲ့ တော်လှန်ရေး အင်အားစုတွေက ထုတ်ပြန်ထားပါတယ်။
