စစ်ကိုင်းတိုင်း၊ ဆားလင်းကြီးမြို့နယ် ဝမ်ပေါင်ကြေးနီစီမံကိန်းအနီးမှာရှိတဲ့ ဖောင်းကတာကျေးရွာ အနီးမှာ အောက်တိုဘာ ၁၉ ရက် မနက် ၇ နာရီကျော်က စတင်ပြီး စစ်ကောင်စီတပ်နဲ့ ဒေသခံ ပြည်သူ့ကာကွယ်ရေးတပ်တို့ တိုက်ပွဲ ပြင်းထန်နေတယ်လို့ ဒေသခံတွေဆီကနေ သိရပါတယ်။

အဆိုပါ စစ်ကောင်စီစစ်ကြောင်းဟာ အောက်တိုဘာ ၁၈ ရက် မနက်ပိုင်းက စတင်ပြီး ဝမ်ပေါင် ကြေးနီစီမံကိန်းအတွင်းကနေ ထွက်ခွာလာတာလို့လည်း သိရပါတယ်။

ဒေသခံရွာသားတယောက်က “မနေ့ကတော့ လယ်တီရွာအနီးက သိင်္ဂီရွှေဇင် စက်သုံးဆီအနီးမှာ စခန်းချပြီး ဒီနေ့မနက်ခင်း ဖောင်းကတာရွာဘက်ကို ထပ်ပြီး စစ်ကြာင်းထိုးလာလို့ ပြည်သူ့ကာကွယ်ရေးတပ်နဲ့ ထိပ်တိုက်တိုးပြီး အခုလို တိုက်ပွဲဖြစ်နေကြတယ်ဗျ။ တိုက်ပွဲက မပြီးသေးဘူး၊ စစ်တပ်ဘက်က စက်တပ်လေထီးနဲ့ရော ဂျိုင်ရိုကော်ပတာနဲ့ရော ဗုံးသီးလာကြဲချတယ်။ ဝမ်‌ပေါင်ကနေလည်း လက်နက်ကြီးနဲ့ ပစ်ကူနေတယ်။ မုံရွာတောင်အထွက် မအူဂိတ်ကနေလည်း ဟောင်ဝစ်ဇာကြီးနဲ့ ၅ လုံးထက်မနည်း ထုတယ်။ ပြည်သူ ၃ ဦးလည်း လက်နက်ကြီးထိလို့ သေဆုံးထားတယ်လို့လည်း သတင်းရထားတယ်လို့ ကြားရတယ်” လို့ ပြောပါတယ်။

တိုက်ပွဲအတွင်း စစ်ကောင်စီတပ်ဘက်က ၁၀ ယောက်ထက်မနည်း ကျဆုံးပြီး ထိခိုက်ဒဏ်ရာ ရရှိသူတွေလည်း များတာကြောင့် စစ်တပ်ဘက်က လေကြောင်းပစ်ကူ၊ လက်နက်ကြီးပစ်ကူတွေ အသုံးပြု‌နေရတယ်လို့ ဒေသခံ စစ်ရေးသတင်းရင်းမြစ်တွေထံကနေ သိရပါတယ်။

ပြည်သူ့ကာကွယ်ရေး ရဲဘော်တယောက်က “တိုက်ပွဲကတော့ မပြီးသေးဘူးဗျ။ စစ်‌ရေးတင်းမာ‌နေဆဲပဲလို့ ပြောရမယ်။ အခုအချိန်အထိ‌တော့ ကျနော်တို့ဘက်က အကျအဆုံး မရှိသေးဘူးလို့ ပြောလို့ရမယ်။ စစ်‌ကြောင်းလာနိုင်မယ့် လမ်းကြောင်းကို ကြိုတင်ပြင်ဆင်ပြီး ကင်းဝပ်စောင့်ပြီး အပိုင်ပစ်ခတ်နိုင်လို့ စစ်တပ်ဘက်ကတော့ အထိတော်တာ်လေးနာနေတယ်” လို့ ပြောပါတယ်။

စစ်ကောင်စီတပ်ကတော့ အဆိုပါတိုက်ပွဲဖြစ်ပွားရာအနီးကို မနခ တပ်ကနေ စက်တပ်လေထီးယာဉ် ၂ စီး၊ ဂျိုင်ရိုကော်ပတာ (Gyrocopter) ၃ စီးနဲ့ ပစ်ကူပေးနေတယ်လို့လည်း သိရပါတယ်။

ဒေသခံတွေကတော့ စစ်ကြောင်းထွက်လာပြီ ဆိုတဲ့အချိန်ကတည်းက နေရပ်စွန့်ခွာ စစ်ဘေးရှောင်နေကြရတယ်လို့လည်း သိရပါတယ်။