ရန်ကုန်တိုင်း လှည်းကူးမြို့နယ် ဒရယ်ဘိုးကျေးရွာအုပ်ချုပ်ရေးမှူးရုံးကို အောက်တိုဘာ ၁၇ ရက်နေ့ ည ၆ နာရီကျော်မှာ ဖောက်ခွဲတိုက်ခိုက်ပြီး စစ်တပ်ဘက်က သေဆုံးသူရှိနိုင်တယ်လို့ ရန်ကုန်မြို့ပြပြောက်ကျား တော်လှန်ရေး တပ်ဖွဲ့တွေဆီက သိရပါတယ်။

YA မြို့ပြပြောက်ကျားတော်လှန်ရေးတပ်ဖွဲ့နဲ့ အနောက်ပိုင်းခရိုင် ပကဖတို့ ပူးပေါင်းပြီး ပြင်းအားမြင့်မိုင်း ၁ လုံး၊ လက်ပစ် ဗုံး ၂ လုံးနဲ့ ဖောက်ခွဲတိုက်ခိုက်ခဲ့တာလို့ ဆိုပါတယ်။

Yangon Army မြို့ပြပြောက်ကျား တော်လှန်ရေးတပ်ဖွဲ့တာဝန်ရှိသူက “မိုင်း ၁ လုံး လက်ပစ်ဗုံး ၂ လုံးနဲ့ ဖောက်ခွဲတိုက်ခိုက်ခဲ့တာ။ ပစ်မှတ်ကိုတည့်တည့်ထိတယ်။ အုပ်ချုပ်ရေးမှူးနောက်လိုက်နဲ့ ပျူစေားထီး ၁ ယောက်ကတော့ လွင့်စင်သွားတာတွေ့ရတယ်။ သေဖို့များတယ်” လို့ ပြောပါတယ်။

စစ်ကောင်စီကလုပ်တဲ့ အတုအယောင်ရွေးကောက်ပွဲအတွက် တက်တက်ကြွကြွလုပ်နေပြီး စစ်ကောင်စီရဲ့ထောက်တိုင်တွေမို့ ခုလိုတိုက်ခိုက်တာဖြစ်သလို သတိလည်းပေးထားပြီးပြီ လို့ သူက ဆိုပါတယ်။

ထိခိုက်တဲ့အခြေအနေ အသေးစိတ်ကို ဆက်စုံစမ်းနေပြီး  တရားမဝင် အတုအယောင်ရွေးကောက်ပွဲနဲ့ ပတ်သက်ပါဝင်လုပ်ကိုင်နေသူ ဘယ်သူ့မဆို ဆက်လတ်တိုက်ခိုက်သွားမယ်လို့လည်း ဆိုပါတယ်။

အောက်တိုဘာ ၁၅ ရက်နေ့ကလည်း ရန်ကုန်၊ မင်္ဂလာဒုံမြို့မှာရှိတဲ့ ကြံ့ခိုင်ရေးပါတီရုံးကို လက်ပစ်ဗုံး ၂ လုံး၊ မိုင်း ၁ လုံးနဲ့ ဖောက်ခွဲတိုက်ခိုက်ခဲ့လို့ စစ်ကောင်စီနဲ့ပူးပေါင်းနေတဲ့ ရုံးစောင့် ကြံ့ခိုင်ရေးပါတီဝင်တချို့ ထိခိုက်ဒဏ်ရာရသွားတယ်လို့ မြို့ပြတော်လှန်ရေးတပ်ဖွဲ့ဝင်တွေဆီက သိရပါတယ်။