ရန်ကုန်တိုင်း၊ အင်းစိန် ၊မရမ်းကုန်း ၊ လှိုင်၊ ကမာရွတ်၊ မြောက်ဥက္ကလာပ၊ ရွှေပေါက်ကံနဲ့ လှိုင်သာယာ စတဲ့ မြို့နယ်တွေမှာ အောက်တိုဘာ ၁၇ ရက် မနေ့ ည ၁၁နာရီက ငလျင်လှုပ်ခတ်လို့ အထပ်မြင့်တိုက်မှာနေသူတွေ စိုးရိမ်ထိတ်လန့်ပြီး မြေပြင်ကိုဆင်းပြေးရတယ်လို့ မြို့ ခံတွေဆီက သိရပါတယ်။
မနေ့ ည ၁၁ နာရီလောက်စလို့ ငလျင်လှုပ်ခတ်ရာ အထပ်မြင့်မှာနေထိုင်သူတွေ မြေညီထပ်ကို ဆင်းပြေးကာ ကားလမ်းမပေါ်မှာ တနာရီလောက်နေပြီး အခြေအနေစောင့်ကြည့်ခဲ့ကြရတယ်လို့ လှိုင်မြို့နယ်နေသူ တယောက်က ပြောပါတယ်။
"ကျမတို့က အထပ်မြင့်မှာနေတော့ ငလျင်သတင်းကို စောင့်ကြည့်နေတာ ညက ငလျင်လှုပ်တော့ အခန်းတိုင်းလိုလို အောက်ကို ဆင်းပြေးကြတာ။ ချက်ချင်းအပေါ် ပြန်မတက်ရဲဘူး ငလျင်ကငြိမ်သွားပြီဆိုမှ အပေါ်ပြန်တက်ကြတာ။ တချို့ဆိုမတက်ကြဘူး၊ လမ်းပေါ်မှာပဲနေကြတယ။ ကမာရွတ်မှာလည်း လှုပ်သွားတယ်။ အရမ်းမပြင်းပေမဲ့ စိတ်ပူတယ်။”
မြောက်ဥက္ကလာပမြို့နယ်နဲ့ ရွှေပေါက်ကံမြို့သစ်မှာလည်း မနေ့ည ၁၁ နာရီကျော်က ငလျင်လှုပ်ခတ်ခဲ့ပြီး ဒဏ်ရာရသူ တချို့ရှိတယ်လို့ ဒေသခံက ပြောပါတယ်။
"ငလျင်လှုပ်တာ သိသာတယ်။ အိမ်ကို တယောက်ယောက်က ဆွဲကိုင်ပြီးလှုပ်လိုက်သလိုပဲ၊ လမ်းထဲက အဒေါ်ကြီးတယောက် ဘီဒိုပိတာ လက်ထိသွားတယ်။ သူ့ယောကျ်ားက ထုတ်တန်းပေါ်က ပစ္စည်းတွေကျတာ၊ ခေါင်းပေါက်သွားတယ်။ ဘယ်သူမှအိမ်ထဲမှာ မနေရဲဘူး အကုန်လမ်းပေါ်မှာ။”
အလားတူ မနေ့က အင်းစိန်နဲ့ လှိုင်သာယာမြိုနယ်မှာလည်း ငလျင်လှုပ်ခတ်ခဲ့ပြီး အထပ်မြင့်မှာနေသူတွေအားလုံး မြေညီထပ်လမ်းမပေါ်ကို ဆင်းပြေးရတယ်လို့ နယ်ခံတွေထံက သိရပါတယ်။
အဆိုပါငလျင်မှာ ကမ္ဘာအေးမြေငလျင်စခန်းမှ အနောက်-အနောက်တောင်ဘက် တမိုင်လောက်ကွာ ဝေးတဲ့ မြန်မာပြည်တွင်း ရန်ကုန်တိုင်း၊ မရမ်းကုန်းမြို့နယ်ရဲ့ မြောက်-အနောက်မြောက်ဘက် တမိုင်လောက်အကွာ အနက် ၁၅ မီတာကို ဗဟိုပြုပြီး အင်အားရစ်ချ်တာစကေး ၃ ဒသမ ၆ အဆင့်ရှိငလျင်နဲ့ နောက်ထပ်ငလျင်တခုလှုပ်ခတ်ခဲ့တယ်လို့ မိုးဇလက ထုတ်ပြန်ထားပါတယ်။
မတ် ၂၈ ရက်က ပြင်းအား ၇ ဒသမ ၇ အဆင့်ရှိ စစ်ကိုင်းငလျင်ကြီး လှုပ်ခတ်ပြီး ပြည်သူ ၄,၀၀၀ ကျော်သေဆုံးခဲ့တာကြောင့် ရန်ကုန်မြို့ခံ ပြည်သူတွေက ငလျင်အန္တရာယ်ကို စိုးရိမ်ထိန့်လန့်နေတာ ဖြစ်ပါတယ်။
