ရန်ကုန်မှာ စစ်ကောင်စီလက်အောက်ခံ ရဲတပ်သားတယောက်က အရက်နဲ့ မူးယစ်ဆေးကြောင်ပြီး မိန်းမဖြစ်သူကို သေနတ်နဲ့ ပစ်သတ်ခဲ့တယ်လို့ ရဲစခန်းနဲ့ နီးစပ်သူထံက သိရပါတယ်။
အောက်တိုဘာ ၉ ရက်မှာ ရဲတပ်သား သန်းထိုက်အောင်ဟာ လုံခြုံရေး ဂျူတီ တာဝန်ထမ်းဆောင်ဖို့ မိန်းမဖြစ်သူက သတိပေးစကားပြောတဲ့ အချိန်မှာ ခါးကြားက သေနတ်ကို ထုတ်ပြီး မိန်းမဖြစ်သူ မသူဇာဝင်းရဲ့ နားထင်ကို သေနတ်နဲ့တေ့ ပစ်သတ်လိုက်တယ်လို့ သိရပါတယ်။
သေဆုံးတဲ့ ရဲတပ်သားရဲ့ မိန်းမ မသူဇာဝင်းဟာ အသက် ၂၃ နှစ်သာ ရှိသေးပြီး သူ့မှာ လူမမည် ကလေးတယောက်လည်း ကျန်ရစ်ခဲ့တယ်လို့ ဒေါပုံ ရဲစခန်းနဲ့ နီးစပ်သူက ပြောပါတယ်။
ဒီနေ့ အောက်တိုဘာ ၁၃ ရက် နေ့လယ်ပိုင်းက မသူဇာဝင်းရဲ့အလောင်းကို ဒဂုံမြို့သစ်တောင်ပိုင်း မြို့နယ်ရှိ ကျည်စုသုသာန်မှာ သင်္ဂြိုဟ်ခဲ့ပါတယ်။
ရဲစခန်းနဲ့ နီးစပ်သူ တယောက်က “ရဲစခန်းတွေမှာက အရက်နဲ့ မူးယစ်ဆေးက အကြိုက်သုံးနေကြတာလေ။ အခု ရဲကလည်း သူ့မိန်းမနဲ့ စကားများ ရန်ဖြစ်တာ မဟုတ်ဘူး။ ဆေးကြောင်နေတာ။ အရက်ကလည်း မူးနေတုန်း အဲဒီလို ဖြစ်တာ။ သူ့မိန်းမက ကလေးသိပ်ပြီးတော့ သန်းထိုက်အောင်ကို လုံခြုံရေးအတွက် သွားဖို့ ပြောတဲ့အချိန်မှာ ပစ်သတ်တာလို့ သိရတယ်။ တချက်တည်း ပွဲချင်းပြီးပဲ။ လူမှုကူညီရေးအသင်းက သင်္ဃန်းကျွန်းစံပြဆေးရုံကို ပို့ကြတယ်”လို့ပြောပါတယ်။
ရဲတပ်သား သန်းထိုက်အောင်ဟာ မကြာသေးခင်ကမှ ဧရာဝတီတိုင်းကနေ ရန်ကုန်ကို ပြောင်းရွှေ့ တာဝန်ထမ်းဆောင်တာဖြစ်ပြီး လက်ရှိမှတော့ စစ်တပ်က ဖမ်းဆီးသွားတယ်လို့ သိရပါတယ်။
