တအာင်းအမျိုးသားလွတ်မြောက်ရေးတပ်မတော် (TNLA) ထိန်းချုပ်ထားတဲ့ ရှမ်းပြည်နယ် မြောက်ပိုင်း၊ သီပေါမြို့ကို အောက်တိုဘာ ၁၆ ရက် ညပိုင်းမှာ စစ်ကောင်စီတပ်တွေ ဝင်ရောက်လာတယ်လို့ ဒေသခံတွေဆီက သိရပါတယ်။

အောက်တိုဘာလဆန်းကစပြီး စစ်ကောင်စီတပ်တွေက ကျောက်မဲကနေ သီပေါဘက်ကို ထိုးစစ်ဆင်တာဖြစ်ပြီး အခုရက်ပိုင်းမှာ သီပေါမြို့အနီးထိ စစ်ကြောင်းထိုး ဝင်ရောက်လာကာ သီပေါမြို့ထဲကို လက်နက်ကြီးတွေနဲ့ ပစ်ခတ်ခဲ့ပြီးနောက် အခုလို မနေ့ညက မြို့ထဲ ဝင်ရောက်လာတာပါ။

သီပေါဒေသခံ အမျိုးသားတယောက်က “သေချာပြီဗျ။ စစ်ကောင်စီတွေ မြို့ထဲဝင်ပြီ။  အောက်တိုဘာလ ၁၆ ရက်နေ့ ည ၈ နာရီလောက်က” လို့ ပြောပါတယ်။

စစ်တပ်က သီပေါမြို့ထဲ ဝင်ရောက်ခါနီး အောက်တိုဘာ ၁၆ ရက် ညနေ ၃ နာရီခွဲလောက်ကစပြီး သီ‌ပေါမြို့ရှိ ဌာနဆိုင်ရာရုံးတချို့နဲ့ ဟိုတယ်တခု မီးလောင်ကျွမ်းကြောင်း ဒေသခံတွေက ပြောပါတယ်။

သီပေါမြို့ခံ နောက်တယောက်က “ရဲစခန်း၊ ထွေအုပ်ရုံး၊ မြေစာရင်းရုံး၊ စိုက်ပျိုးရေးရုံး၊ ထောင်ကြီးတွေ မီးလောင်တာ။ ရှို့မီးပါ။ ဘယ်ဘက်က ရှို့တာလဲတော့ မသိဘူး။ ဟိုတယ်သီပေါမှာတော့ အမိုး slab ပေါ် လောင်နေတာကြောင့် လက်နက်ကြီးကျလို့ လောင်တာထင်တယ်။ ည ၈ နာရီထိ လောင်နေတယ်” လို့ ပြောပါတယ်။

အရပ်ဝတ်နဲ့ မျက်နှာဖုံးအုပ်ထားတဲ့ လူ ၄ ယောက်က မီးလိုက်ရှို့နေတာတွေ့ရပြီး နေအိမ်တွေနဲ့ နီးကပ်တဲ့ စိုက်ပျိုးရေးရုံးနဲ့ မြေစာရင်းရုံးကို ဒေသခံတချို့ မီးလိုက်ငြှိမ်းသတ်နေချိန် မိုးရွာလာတာကြောင့် ဟိုတယ်သီပေါကလွဲပြီး နာရီဝက်လောက် အကြာမှာ မီးလောင်နေတာတွေ အကုန်လုံး ငြိမ်းသွားတယ်လို့ ဒေသခံက ပြောပါတယ်။

မြို့ထဲ ဌာနဆိုင်ရာရုံးတွေ မီးလောင်နေချိန် လက်နက်ကြီး၊ လက်နက်ငယ် ပစ်ခတ်သံတွေလည်း ကြားရပြီးနောက် သီပေါ ဒုဌဝတီတံတားလည်း အဝင်၊ အထွက် ပိတ်သွားတယ်လို့ ဆိုပါတယ်။

အောက်တိုဘာ ၁၆ ရက် ဒီမနက်မှာတော့ စစ်တပ်က လေကြောင်းနဲ့ ဗုံးကြဲတိုက်ခိုက်မှုထက် ဒရုန်းတွေ အဓိက အသုံးပြု ပစ်ခတ်တိုက်ခိုက်သံ ကြားရကြောင်း ဒေသခံတွေက ပြောပါတယ်။

သီပေါမြို့ရဲ့ မြောက်ဘက် မြို့နဲ့ တဖာလုံကျော်လောက် အကွာက ဖာဖိတ်ရွာ၊ နားလွယ်ရွာ အနီးတွေမှာ မနေ့မနက် ၁၁ နာရီကျော်က တိုက်ပွဲပြင်းထန်နေချိန် သီပေါမြို့တွင်းရှိ အရင် စစ်ကောင်စီ ဌာနဆိုင်ရာရုံးတချို့ မီးလောင်နေကြောင်း၊ ဌာနဆိုင်ရာရုံးတွေ မီးလောင်ပျက်စီး ဆုံးရှုံးမှု အသေးစိတ် အချက်အလက်တွေကို လက်ရှိ အတည်မပြုနိုင်သေးကြောင်း SSPP ဘက်က သတင်းထုတ်ထားပါတယ်။

သီပေါမြို့ အစပ်တွေဘက် အောက်တိုဘာ ၁၆ ရက် ညနေပိုင်းအထိ လက်နက်ကြီး၊ လက်နက်ငယ်သံတွေ မကြာခဏ ကြားနေရတယ်လို့ ဆိုပါတယ်။

အောက်တိုဘာ ၁၅ ရက် မနက် ၈ နာရီခွဲခန့်ကစ ညသန်းခေါင်အထိ သီပေါမြို့ အနီး ကောင်းခါးရွာနဲ့ နားခိုင်ရွာတွေဘက်မှာ တိုက်ပွဲပြင်းထန်ခဲ့ပြီး ကောင်းခါးရွာက အသက် ၆၀ အရွယ် လုံးထွန်းလ လက်နက်ကြီးကျည် ထိမှန်သေဆုံးခဲ့ကာ နေအိမ်တချို့၊ ဘုန်းကြီးကျောင်း၊ စေတီတွေ ထိခိုက် ပျက်စီးခဲ့ပါတယ်။

သီပေါမြို့ကို ပြီးခဲ့တဲ့ ၂၀၂၄ အောက်တိုဘာ ၁၃ ရက်မှာ TNLA နဲ့ ပူးပေါင်းတပ်ဖွဲ့တွေ သိမ်းပိုက် ထိန်းချုပ်ခဲ့တာ ဖြစ်ပါတယ်။