နေပြည်တော်ကောင်စီနယ်မြေ၊ ပုဗ္ဗသီရိမြို့နယ်၊ ဖြုတ်ခွဲကျေးရွာမှာ အောက်တိုဘာ ၁၆ ရက် မနက်အစောပိုင်းက အသက် ၁၄ နှစ်အရွယ် ၈ တန်းကျောင်းသားတယောက် မိမိကိုယ်ကိုယ် ဆွဲကြိုးချ သေဆုံးခဲ့တယ်လို့ မြို့ခံတွေဆီက သိရပါတယ်။
တရွာတည်းနေ ကုန်စုံဆိုင်တဆိုင်ကနေ ပိုက်ဆံခိုးယူတဲ့ကိစ္စနဲ့ လူအများရှေ့မှာ မိဘဖြစ်သူက ပြောဆိုဆုံးမခဲ့တာကြောင့် အရှက်ရပြီး မိဘတွေ တောင်ယာထဲမှာ ငရုတ်သီးသွားခူးနေတဲ့အချိန် မိမိကိုယ်ကိုယ် ဆွဲကြိုးချ သတ်သေသွားတာလို့ မြို့ခံတယောက်က ပြောပါတယ်။
“ပြီးခဲ့တဲ့တပတ်လောက်က ရွာထဲက ကုန်စုံဆိုင်ကနေ ပိုက်ဆံနှိုက်တယ်။ ပိုင်ရှင်က မိဘတွေ တိုင်တော့ လူအများရှေ့မှာ ဆုံးမတာပေါ့။ သားသမီးကို စိုးရိမ်ပြီး ဆုံးမတာ မှန်ပေမဲ့ လူပုံအလယ်မှာဆိုတော့ ရှက်တာပေါ့။ အိမ်ထဲက မထွက်ဘူး။ ဒီနေ့မနက် မိဘတွေ ငရုတ်သီး သွားခူးတဲ့အချိန် ဆွဲကြိုးချ သတ်သေသွားတာ။ မိဘတွေအနေနဲ့ သားသမီးတွေ ဆုံးမတဲ့အခါ သတိထားသင့်တယ်။”
နေအိမ်မှာ ဆွဲကြိုးချသေဆုံးနေတာကို တောင်ယာထဲက ပြန်လာတဲ့ မိခင်ဖြစ်သူက အရင်တွေ့ခဲ့ပြီးနောက် ရပ်မိရပ်ဖတွေက သဗ္ဗသုခ လူမှုကူညီရေးအသင်းကို အကြောင်းကြားကာ ရုပ်အလောင်းကို နေပြည်တော် ခုတင် ၃၀၀ ဆေးရုံကို ပို့ဆောင်ခဲ့တယ်လို့ အုပ်ချုပ်ရေးနဲ့ နီးစပ်တဲ့ သတင်းအရင်းအမြစ်က ပြောပါတယ်။
“ပုဗ္ဗသီရိမှာလည်း ဆွဲကြိုးချသတ်သေတာ ၂ ကြိမ်ရှိပြီ။ ၁၃ ရက်နေ့က ရွာတော်မှာ ကောင်မလေးတယောက် ဂိမ်းရှုံးပြီး အကြွေးတွေများနေလို့ သတ်သေသွားတယ်။ အခု ၈ တန်းကျောင်းသားလေး အဆင်မပြေမှုတွေပေါ့။ မိဘကလည်း တနေ့လုပ်မှ တနေ့စားဆိုတော့ သားသမီးကို မကြည့်နိုင်ဘူး။ စေတနာဇောနဲ့ ပြောလိုက်တာ ကိုယ့်သားသမီး အသက်ဆုံးရှုံးသွားတယ်။”
အောက်တိုဘာ ၁၃ ရက်ကလည်း ပုဗ္ဗသီရိမြို့နယ်၊ ရွာတော်ကျေးရွာအုပ်စု၊ ရွာသစ်ကျေးရွာမှာ အွန်လိုင်းဂိမ်းတွေ ရှုံးကာ အသက် ၂၃ နှစ်အရွယ် အမျိုးသမီးတယောက် မိမိကိုယ်ကိုယ် ဆွဲကြိုးချ သတ်သေခဲ့တဲ့ ဖြစ်စဥ်လည်း ရှိပါတယ်။
ပြီးခဲ့တဲ့ စက်တင်ဘာ ၇ ရက်ကလည်း ဇေယျာသီရိမြို့နယ်၊ ပြည်စံအောင်ရပ်ကွက်မှာ အကြွေးတွေ ပြန်မဆပ်နိုင်လို့ အသက် ၅၇ နှစ်အရွယ် အမျိုးသားတယောက် မိမိကိုယ်ကို ဆွဲကြိုးချ သတ်သေသွားတဲ့ ဖြစ်စဥ်လည်း ရှိပါတယ်။
