လူမှုကွန်ရက်မှာ သမီးဆိုးလို့ လူသိများတဲ့ ShweThet အကောင့်ပိုင်ရှင် မသက်ကို ကို စစ်ကောင်စီတပ်က အောက်တိုဘာ ၁၃ ရက်က ပြင်ဦးလွင်မြို့မရဲစခန်းမှာ ပုဒ်မ ၅၀၅(က)နဲ့ ထပ်မံအမှုဖွင့်လိုက်တယ်လို့  အုပ်ချုပ်ရေးနဲ့နီးစပ်တဲ့ သတင်းရင်းမြစ်တွေဆီက သိရပါတယ်။

အာဏာသိမ်းစစ်ခေါင်းဆောင်ဇနီး ဒေါ်ကြူကြူလှရဲ့ နိုင်ငံခြားခရီးစဥ်နဲ့ ဒေါ်အောင်ဆန်းစုကြည်ရဲ့ နိုင်ငံခြားခရီးစဥ်ကို ခိုင်းနှိုင်းရေးထားတဲ့ Post နဲ့ စစ်တပ်အရာရှိတွေကို ဝေဖန် Live လွှင့်ပြောဆိုမှုတွေကြောင့် ပုဒ်မ ၅၀၅ (က)နဲ့ ထပ်မံအမှုဖွင့်ထားတာ ဖြစ်ပါတယ်။

အုပ်ချုပ်ရေးနဲ့ နီးစပ်တဲ့ သတင်းရင်းမြစ်က “အမေစုက နိုင်ငံခြားခရီးစဥ်သွားရင် စမတ်ကျအောင် ဘယ်လို ဝတ်စားဆင်ယင်တတ်တာ။ ဘယ်အခမ်းအနားမှာ ဘာဝတ်ရမယ်ဆိုတာ ရွေးတတ်တယ်။ ဒေါ်ကြူကြူလှရဲ့ ဝတ်စားဆင်ယင်မှုက တောကျတယ်။ အဲဒီလိုတွေမြင်ရတော့ နိုင်ငံတော် ပုံရိပ်ကျတယ်ဆိုပြီး တင်ထားတဲ့ ပို့စ်ရယ်၊ စစ်တပ်အရာရှိတွေကိုလည်း Live လွှင့်ပြီးပြောတာ တွေကြောင့် ပုဒ်မ ၅၀၅ (က)နဲ့ ထပ်ဖွင့်တာ”လို့ ပြောပါတယ်။

စစ်ကောင်စီက အောက်ဘာ ၁၄ ရက် ညပိုင်းမှာ မြောက်ဒဂုံမြို့နယ် ၄၆ ရပ်ကွက်နေ မသက်ကိုကို(ခ)သမီးဆိုးကို  ပြင်ဦးလွင်မြို့မရဲစခန်းမှာ ထိန်းသိမ်းထားပြီး စစ်ဆေးနေတယ်လို့ ထုတ်ပြန်ခဲ့ပေမဲ့ ပုဒ်မ ၅၀၅ (က)နဲ့ အမှုဖွင့်ထားတယ်ဆိုတာကိုတော့ ဖော်ပြခြင်းမရှိပေ။

သမီးဆိုးဟာ အမေရိကန်မှာ နေထိုင်စဥ် ပြင်ဦးလွင်မြို့နယ်နေ ဒေါ်အေသင်ကိုအား Live လွှင့် ပြောဆိုခဲ့လို့ အောက်တိုဘာ ၅ ရက်မှာ ပြင်ဦးလွင်မြို့မရဲစခန်းမှာ ပုဒ်မ ၆၆(ဃ)နဲ့ အမှုဖွင့်ခံရတာလို့ ဖြစ်စဥ်ကိုသိသူတယောက်က ပြောပါတယ်။

“သူ နိုင်ငံခြားမှာရှိနေတုန်း အေသင်ကိုနဲ့ တပ်က အရာရှိတယောက်ကိစ္စကို  Live လွှင့်ပြီးပြောတာ။ တခြားကိစ္စတွေလည်း ပါတယ်။ တောင်းပန်ဖို့ ပြောတယ်၊ မရဘူး။ သူ မြန်မာပြည်ပြန်လာတော့ ပြင်ဦးလွင်မှာ အမှုဖွင့်ပြီး နေပြည်တော်ကနေ တိုင်းခရိုင်မြို့နယ်အဆင့်ဆင့် စာတင်ပြီး ပြည်ပထွက်ခွင့်ကို ပိတ်တာ။ သူ အဖမ်းမခံရခင် မြောက်ဒဂုံက မိသားစုဝင်တွေကိုတောင် ခေါ်စစ်ခံရသေးတယ်။”

အမေရိကန်နိုင်ငံသား ခံယူထားတဲ့ သမီးဆိုးဟာ  သြဂုတ် ၂၂ ရက်က မြန်မာပြည်ကို ပြန်လာပြီး အောက်တိုဘာ ၁၂ ရက် မနက် ၇ နာရီက ထိုင်းနိုင်ငံကို ထွက်ခွာမယ့်အချိန် ဖမ်းဆီးခံရပြီး မင်္ဂလာဒုံမြို့မရဲစခန်းမှာ ခေတ္တချုပ်နှောင်ထားကာ ညပိုင်းမှာတော့ ပြင်ဦးလွင်မြို့မရဲစခန်းကို လွှဲပြောင်းပေးခဲ့တာ ဖြစ်ပါတယ်။

အငြိမ်းစား စစ်တပ်အရာရှိတယောက်ရဲ့ ဇနီးဖြစ်တဲ့  သမီးဆိုးဟာ လူမှုကွန်ရက်မှာ Follower ၁ သိန်းလောက်ရှိတဲ့ Shwe Thet အကောင့်နဲ့ အလှကုန်ပစ္စည်းတွေ Live လွှင့်ရောင်းချရင်း ပြည်တွင်းမှာဖြစ်နေတဲ့ စစ်ကောင်စီတပ်၊ ရုပ်ရှင်အသိုက်အဝန်း၊ စီးပွားရေးသမားတွေရဲ့ အမြင်မတော်တဲ့ လုပ်ရပ်တွေကို ပြောဆိုဝေဖန်ခဲ့သူဖြစ်ပြီး  ပြည်တွင်းကို ပြန်ဝင်လာချိန် ဖမ်းဆီးခံရတာ ဖြစ်ပါတယ်။