ဧရာဝတီတိုင်း၊ သာပေါင်းမြို့နယ် ကြက်သွန်ကွင်း စစ်ဆေးရေးဂိတ်မှာ စစ်ကောင်စီတပ်က အရပ်သားတွေ ဝယ်ယူလာတဲ့ ကုန်ပစ္စည်းတွေကို လုယက်ယူဆောင်နေတယ်လို့ ဒေသခံတွေဆီကသိ ရပါတယ်။

စစ်တပ်က အောက်တိုဘာ ၁၀ ရက်နဲ့ ၁၁ ရက် ရက်ညနေမှာ သာပေါင်းမြို့နယ်ထဲက ကြက်သွန်ကွင်း စစ်ဆေးရေးဂိတ်မှာ စစ်ဆေးနေတဲ့ စစ်ကောင်စီ တပ်သားတွေက အရပ်သားတွေ ဝယ်ယူလာတဲ့ ကုန်စည်တွေကို လိုအပ်တာကြောင့် သိမ်းဆည်းတယ်ဆိုပြီး လုယက်ယူဆောင်နေတာလို့ သိရပါတယ်။ 

ဒေသခံတယောက်က “ဂိတ်မှာစောင့်နေတဲ့ စစ်ကောင်စီတပ်နဲ့ အရပ်ဝတ် ဝတ်ထားတဲ့သူတချို့က သိမ်းယူတာ။ ကုန်စည်တွေ များများဝယ်လာရင် ပိုသိမ်းယူတယ်။ အရပ်ဝတ်သမားတွေက ပျူစောထီးတွေက ဖြစ်မယ်ထင်တယ်။ သူတို့ (စစ်ကောင်စီ)တပ်က သိမ်းယူတဲ့ ပစ္စည်းကို အသာတကြည် မပေးရင် လူပါဖမ်းလို့ရတယ်ဆိုပြီး ပြောတာ” လို့ ပြောပါတယ်။

လုယက်ယူဆောင်နေတဲ့ စစ်ကောင်စီတပ်ဖွဲ့ဝင်တွေထဲက တချို့က အရက်မူးနေကြပြီး ဆန်၊ ငါးခြောက်တွေ၊ စက်သုံးဆီနဲ့ အသား ငါးတွေဖြစ်ပြီး စစ်သုံး FAW ကားတွေပေါ် တင်ထားတာ တွေ့ရတယ်လို့ ဆိုပါတယ်။

သာပေါင်းရဲတပ်ဖွဲ့နဲ့နီးစပ်သူတယောက်က “ပေါ်တင်သိမ်းယူနေတာ။ ပစ္စည်းတွေကို လိုချင်တာကြောင့် တမင်လုယက်ယူနေတာလား။ တော်လှန်ရေးတပ်တွေဆီ ကုန်စည်မရောက်အောင် တားမြစ်ချင်တာကြောင့်လားတော့ မသိဘူး။ အဲဒီ စစ်ဆေးရေးဂိတ်က နာမည်ဆိုးနဲ့ ကျော်ကြားတဲ့ ဂိတ်” လို့ ပြောပါတယ်။

ကြက်သွန်ကွင်း စစ်ဆေးရေးဂိတ်မှာ စစ်ကောင်စီတပ်ဖွဲ့ဝင် အနည်းဆုံး ၁၀ ယောက်နဲ့ ပျူစောထီးတွေက အရပ်သားတွေရဲ့ ပစ္စည်းတွေကို သိမ်းယူနေတာဖြစ်ပြီး  ပစ္စည်းမယူဖို့ မေတ္တာရပ်ခံတဲ့ အရပ်သားတွေကို ရိုက်နှက်တဲ့အထိပါ လုပ်နေတယ်လို့ သိရပါတယ်။

စက်တင်ဘာလ ပထမအပတ်ကလည်း အဲဒီ ကြက်သွန်ကွင်း စစ်ဆေးရေးဂိတ်မှာ အရပ်သားတွေ ဆန်အိတ်တင်မောင်းလာတဲ့ကားကို စစ်တပ်က PDF ထောက်ပို့ကားဆိုပြီး ဖမ်းဆီးခဲ့ပါတယ်။