မန္တလေးတိုင်း၊ မဟာအောင်မြေမြို့နယ်မှာ အောက်တိုဘာ ၁၀ ရက်မနက်ပိုင်းက အိပ်ရာပေါ် ဖုန်းအားသွင်းဖို့အတွက် မီးပလပ်ခုံ သွယ်တန်းရာကနေကနေ အပူလွန်ကဲပြီး မီးလောင်ခဲ့တယ်လို့ ဒေသခံတွေဆီကနေ သိရပါတယ်။

ရဲမွန်တောင်ရပ်ကွက်၊ ၅၉ လမ်း၊ ၃၉ D လမ်းနဲ့ ၃၉ E လမ်းကြားမှာ အိပ်ရာပေါ်တင်ထားတဲ့ ပလပ်ခုံ အပူလွန်ကဲလို့ မီးလောင်ခဲ့တာဖြစ်ပြီး ၃၅ ပေ ၂၀ ပေ၊ သွပ်မိုး ထရံကာ၊ တထပ် အဆောက်အအုံနဲ့ အတွင်းပစ္စည်းတွေ၊ ဆိုင်ကယ် ၂ စီး မီးလောင်ဆုံးရှုံးခဲ့တယ်လို့ သိရပါတယ်။

ဖြစ်စဉ်ကို သိရှိတဲ့သူတယောက်က “မီးလောင်မှုက အောက်တိုဘာ ၁၀ ရက် မနက် ၇ နာရီ မိနစ် ၃၀ လောက်မှာဖြစ်တာ။ မီးလောင်မှုကြောင့် ပစ္စည်းတွေတော့ ဆုံးရှုံးခဲ့တယ်။ လူတော့အချိန်မီရှောင်နိုင်ခဲ့လို့ ထိခိုက်သေဆုံးမရှိပါဘူး။ ဆုံးရှုံးတဲ့ အသေးစိတ်ကို စိစစ်တွက်ချက်နေပါတယ်” လို့ပြောပါတယ်။

အဲဒီ မီးလောင်မှုကို သန္ဓေမီးသတ်တပ်ဖွဲ့ဝင် အယောက် ၃၀၊ အရန်မီးသတ်တပ်ဖွဲ့ဝင် အယောက် ၇၀ နဲ့ မီးငြိမ်းသတ်ယာဉ် ၁၀ စီး၊ ရေသယ်ယာဉ် ၅ စီး၊ အုပ်ချုပ်မှုယာဉ် ၃ စီး အသုံးပြုငြှိမ်းသတ်ခဲ့ပြီး မနက် ၇ နာရီ မိနစ် ၅၀ အချိန်ခန့် မှာ မီးလုံးဝငြိမ်းသွားတယ်လို့ သိရပါတယ်။

မန္တလေးမြို့ခံတယောက်က “ဆင့်ပွားမီးကူးစက်တာမရှိပါဘူး။ အချိန်မီ မီးထိန်းနိုင်ခဲ့လို့လေ။ မီးလောင်မှုကြောင့် အထိတ်တလန့်တော့ဖြစ်ရတယ်။ သက်ဆိုင်ရာက စက်အင်အား၊ လူအင်အား အများအပြားနဲ့ ငြှိမ်းသတ်နိုင်ခဲ့တာကြောင့်ပါ” လို့ ပြောပါတယ်။

မီးလောင်မှုနဲ့ပတ်သက်ပြီး အိပ်ရာပေါ်မှာ ပလပ်ခုံနဲ့ ဖုန်းအားသွင်းဖို့ လုပ်ခဲ့တဲ့ အသက် ၂၂ နှစ်အရွယ် လူငယ်အမျိုးသားကို အမှတ် ၉ မြို့မရဲစခန်းမှာ အမှုဖွင့်ထားတယ်လို့ သိရပါတယ်။

အောက်တိုဘာ ၆ ရက် ညပိုင်းကလည်း မန္တလေး၊ ပြည်ကြီးတံခွန်မြို့နယ်၊ ၁၃၁x ၁၃၂x ၅၉(B)လမ်းမှာ နှစ်ထပ်အိမ်တလုံးခေါင်မိုးပေါ်ကို မီးပုံးပျံပျက်ကျလို့ မီးလောင်ခဲ့သလို ၆၂ လမ်း ၆၃ လမ်းကြား၊ ၁၀၂ လမ်းနားမှာ မီးလောင်ပြီး လူ ၂ ယောက် ထိခိုက်ဒဏ်ရာရရှိခဲ့သေးတယ်လို့ သိရပါတယ်။