ချောင်းဦးမြို့နယ်၊ ဘုံတိုရွာမှာ ရွာသားတွေ ငြိမ်းချမ်းစွာ သီတင်းကျွတ် ဆီမီးထွန်းနေတဲ့ နေရာကို  စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ရွာသားတွေ ထိခိုက်သေဆုံးခဲ့ရတာနဲ့ ပတ်သက်ပြီး ကန့်ကွက်ရှုတ်ချတဲ့အနေနဲ့ အမေရိကန်ရောက် မြန်မာ့အရေးဆောင်ရွက်သူတွေက ဝါရှင်တန်ဒီစီ မြန်မာသံရုံးရှေ့မှာ ဒေသစံတော်ချိန် အောက်တိုဘာ ၉ ရက်နေ့ မွန်းလွဲပိုင်းက  ဆန္ဒပြခဲ့ကြပါတယ်။  

အောက်တိုဘာ ၆ ရက်၊ သီတင်းကျွတ်လပြည့်နေ့မှာ  စစ်ကိုင်းတိုင်း၊ ချောင်းဦးမြို့နယ်၊ ဘုံတိုရွာမှာ ရွာသားတွေ ဆီမီးထွန်းနေကြစဉ် စစ်တပ်က  စက်တပ်လေထီးနဲ့ ဗုံးကြဲတိုက်ခိုက်တာကြောင့် ပြည်သူ ၄၀ ကျော်သေဆုံးခဲ့ပြီး ထိခိုက်ဒဏ်ရာရသူတွေထဲကနေ ထပ်မံသေဆုံးသူတွေ ဆက်တိုက်ရှိနေဆဲ ဖြစ်ပါတယ်။

Save Myanmar-USA အဖွဲ့မှ ကိုရင်အေးက “ဘာသာရေးအရအထွတ်အမြတ်အချိန်အခါမှာ ငြိမ်းချမ်းစွာ စုဝေးဆုတောင်းနေချိန်မှာ၊ အခုလို လူမဆန်စွာ ဗုံးကြဲသတ်ဖြတ်မှု၊ ရက်စက်ယုတ်မာမှုဟာ၊ ဘယ်လိုနည်းနဲ့မှ ခွင့်လွှတ်နိုင်စရာမရှိပါဘူး၊ အဲဒီအတွက် အမေရိကန်အစိုးရအပါအဝင် နိုင်ငံတကာအသိုက်အဝန်းအနေနဲ့ ထိထိရောက်ရောက်အရေးယူနိုင်ဖို့ အလေးအနက်တောင်းဆိုပါတယ်။ အပြစ်မဲ့ လက်နက်မဲ့ပြည်သူတွေကို လူမဆန်တဲ့လုပ်ရပ်တွေနဲ့ အကြမ်းဖက်သတ်ဖြတ်နေတဲ့ စစ်ကောင်စီကို အလုပ်အကျွေးပြုနေကြတဲ့ ဝါရှင်တန်ဒီစီ မြန်မာသံရုံးအပါအဝင် ကမ္ဘာ့နိုင်ငံအသီးသီးက အကြမ်းဖက်စစ်ကော်မရှင်ရုံးတွေမှာ အစေအပါးလို နေထိုင်နေကြသူတွေအားလုံး ကိုယ့်လိပ်ပြာကိုယ်သန့်ပြီး ကျေနပ်နေကြတုန်းလား၊ ခင်ဗျားတို့ အမိအဖ ညီအစ်ကိုမောင်နှမတွေနဲ့ သားသမီးတွေဟာ ခင်ဗျားတို့လုပ်ရပ်ကြောင့် ဂုဏ်သိက္ခာ တက်မလား၊ ဂုဏ်သိမ်ငယ်ကျဆင်းစေမလားဆိုတာ စဉ်းစားမိကြရဲ့လားလို့ မေးချင်ပါတယ်” လို့ ပြောပါတယ်။

၂၀၂၁ စစ်အာဏာစသိမ်းကတည်းက ဝါရှင်တန်ဒီစီမြန်မာသံရုံးကို မြန်မာ့အရေးဆောင်ရွက်သူတွေက ဆက်တိုက်ဆန္ဒပြခဲ့ပေမဲ့ ဝန်ထမ်းတချို့သာ CDM ဝင်ခဲ့ပြီး လက်ကျန်ဝန်ထမ်းတွေဟာ စစ်ကောင်စီကို ဆက်လက်ကိုယ်စားပြုနေခဲ့တာပါ။ 

လက်ကျန်ဝန်ထမ်းတွေ CDM ဝင်ပြီး ပြည်သူ့ဘက်ကူးပြောင်းဖို့ ဆက်တိုက်တောင်းဆိုခဲ့ပေမဲ့ မျက်ကွယ်ပြုခဲ့ပြီး စစ်ကောင်စီကို တရားဝင်အသိအမှတ်ပြုခံရရေးအတွက် ဆက်လက်ပြုလုပ်နေကြတာပါ။

ဘုံတိုရွာ လေကြောင်းတိုက်ခိုက်မှုနဲ့ ပတ်သက်ပြီး ကုလသမဂ္ဂနဲ့ နိုင်ငံတကာအဖွဲ့အစည်းတွေကလည်း ကန့်ကွက်ရှုတ်ချထားကြပါတယ်။

DVB ရဲ့ အချက်အလက်မှတ်တမ်းတွေအရ ၂၀၂၅ ခုနှစ်အတွင်းမှာ စစ်ကောင်စီက နိုင်ငံတဝန်း လေကြောင်းတိုက်ခိုက်မှု အကြိမ် ၂၃၀၀ ကျော်ပြုလုပ်ခဲ့တာကြောင့် သေဆုံးပြည်သူ ၁,၈၀၀ ကျော်အထိ ရှိခဲ့ပါတယ်။ 

ဒီသတင်းအချက်အလက်တွေကို အမေရိကန်အစိုးရနဲ့ လွှတ်တော်တာဝန်ရှိသူတွေဆီကို မြန်မာ့အရေးဆောင်ရွက်သူတွေက ဆက်တိုက်ပေးပို့နေပြီး မြန်မာ့အရေးအတွက် အမေရိကန်လွှတ်တော်မှာ ပြဋ္ဌာန်းခဲ့တဲ့ Burma Act နဲ့ Brave Burma Act တွေကို အစိုးရက အဆောတလျင် အသက်သွင်းဆောင်ရွက်နိုင်ရေး ဆက်လက်တိုက်တွန်းနေကြပါတယ်။

သုတချမ်းသာ