ထိုင်းနိုင်ငံ၊ တာ့ခ်ရိုင်၊ မဲဆောက်မြို့မှာ ပြီးခဲ့တဲ့ရက်ပိုင်းတွင်း မူးယစ်ဆေးဝါးနှိမ်နင်းရာမှာ တရားမဝင် မြန်မာလုပ်သား ၁၀ ယောက်နဲ့ ထိုင်း ၁ ယောက်တို့ ဖမ်းဆီးခံရတယ်လို့ မဲဆောက်မြို့နယ် အုပ်ချုပ်ရေးရုံး ထုတ်ပြန်ချက်အရ သိရပါတယ်။
မြို့နယ်အုပ်ချုပ်ရေးမှူးရုံး၊ နယ်မြေခံရဲတပ်ဖွဲ့၊ မူးယစ်ရဲ၊ လဝကနဲ့ ရပ်ကျေးအုပ်ချုပ်ရေးမှူးတွေပါတဲ့ ပူးပေါင်းအဖွဲ့ဟာ မြို့နယ်တွင်း မူးယစ်ဆေးဝါးနှိမ်နင်းရေးစီမံချက်ဆောင်ရွက်ရာမှာ အောက်တိုဘာ ၇ ရက် ညနေပိုင်းက မဲဆောက်မြို့၊ ထုန့်ထောင်းရပ်ကွက်၊ ဝပ်လုံဘုန်းကြီးကျောင်းအနီးရှိ အိမ်နံပါတ်မရှိတဲ့ နေအိမ်တအိမ်ကနေ မူးယစ်ဆေးသုံးနေတဲ့ အသက် ၂၀ နှစ် နဲ့ ၂၄ နှစ်ရွယ်ရှိ မြန်မာလုပ်သား ၂ ယောက်ကို စိတ်ကြွဆေး ၃ ပြားနဲ့အတူ ဖမ်းမိတယ်၊ ၂ ယောက်စလုံးက ထိုင်းမှာ နေထိုင်ခွင့်အထောက်အထားမရှိတာကြောင့် တရားမဝင် ဝင်ရောက်နေထိုင်မှုပါ အရေးယူခံရမယ်လို့ ဆိုပါတယ်။
အလားတူ အောက်တိုဘာ ၈ ရက် ည ၈ နာရီခွဲလောက်က မဲဆောက်မြို့ မိုးရုံ မွတ်ဆလင်ရပ်ကွက်ထဲ သွားရောက်စစ်ဆေးတာမှာ အသက် ၃၀ နှစ်ရွယ် မြန်မာအမျိုးသမီးတယောက်ထံကနေ စိတ်ကြွဆေးပြား ၁၀၀ ၊ အသက် ၂၈ နှစ်ရွယ် မြန်မာ တယောက်ထံက စိတ်ကြွဆေး ၁၀ ပြား၊ အသက် ၂၃ နှစ်မှ ၅၀ အတွင်းရှိ မြန်မာအမျိုးသား ၄ ယောက်နဲ့ ၁၉ နှစ်ရွယ် မြန်မာလူငယ် ၂ ယောက်တို့ကို ဝိုင်းဖွဲ့ မူးယစ်ဆေးဝါးသုံးစွဲမှုတွေနဲ့ ဖမ်းဆီးအရေးယူထားတယ်လို့ ဆိုပါတယ်။
ဖမ်းဆီးခံရသူတွေဟာ နေထိုင်ခွင့်အထောက်အထားမပြည့်စုံတာကြောင့် မူးယစ်ဆေးမှုအပြင် တရား မဝင် ဝင်ရောက်နေထိုင်မှုနဲ့ပါ အရေးယူခံရမယ်လို့ ဆိုပါတယ်။
အောက်တိုဘာ ၈ ရက် ည ၁၁ နာရီခွဲမှာတော့ သတင်းအရ မယ်ကုရပ်ကွက်ရှိ အိမ်တအိမ်ကို ဝင်ရောက်စစ်ဆေးပြီး အသက် ၄၄ နှစ်ရွယ်ရှိ နိုင်းဧကချိုင်းဆိုသူ ထိုင်းအမျိုးသားတယောက်ကို စိတ်ကြွဆေးပြား ၁၆၀၀ ၊ အိုက်စ်ဆေး ၁ ဂရမ် ၊ အော်တိုသေနတ် ၁ လက် ၊ ကျည်ဆန် ၆ တောင့်၊ ဆိုင်ကယ် ၁ စီး ၊ ငွေသား ဘတ် ၂၅၁၀ နဲ့အတူ ဖမ်းဆီးရမိတယ်လို့ ဖော်ပြထားပါတယ်။
ထိုင်းနိုင်ငံမှာ မူးယစ်ဆေးဝါးနှိမ်နင်းရေးကို အရှိန်မြှင့်ဆောင်ရွက်နေတာဖြစ်ပြီး စိတ်ကြွဆေးပြား အရေအတွက် တပြားတွေ့ရင်တောင် မူးယစ်မှုနဲ့ အရေးယူရမယ်လို့ ထိုင်းဝန်ကြီးချုပ် အနုထင်း ချန်းဝီရကွန်းက ပြောထားပါတယ်။
Source: မဲဆောက်မြို့နယ်အုပ်ချုပ်ရေးရုံး
