ရန်ကုန်၊ သန်လျင်မြို့နယ်၊ အလယ်ကျေးရွာ၊ သီလဝါ ၆ လမ်းသွားကားလမ်းမှာ အောက်တိုဘာ ၅ ရက်က အငှားယာဥ်မောင်းကို သတ်ပြီး ကားလုယူခဲ့သူလို့ သံသယရှိသူ ၂ ယောက်ကို သန်လျင်မြို့မရဲစခန်းက ပုဒ်မ ၂ ခုနဲ့ အမှုဖွင့်ထားတယ်လို့ မြို့ခံတွေဆီက သိရပါတယ်။
လုယက်သူ ၂ ယောက်မှာ သန်လျင်မြို့နယ်၊ စစ်ပင်ကွင်းကျေးရွာ တောင်ဘက်ကွင်းနေ ထက်ရှိုင်းဇော်နဲ့ သုံးခွမြို့နယ်၊ ပုလဲစံပြကျေးရွာနေ သက်ဝေဦး တို့ဖြစ်ပြီး အောက်တိုဘာ ၆ ရက် ညပိုင်းက ဖမ်းမိခဲ့တာလို့ မြို့ခံတယောက်က ပြောပါတယ်။
“ကားငှားစီးရင်း ကားပေါ်မှာ ယာဥ်စီးခကိစ္စနဲ့ စကားများပြီး ယာဥ်မောင်းကို ဝက်အူလှည့်နဲ့ ထိုးသတ်ပြီး အလောင်းကို ၆ လမ်းသွားလမ်းမှာ လွှင့်ပစ်ပြီး ကားကိုယူသွားတာ။ ရဲတွေက ကားကို သန်လျင်မှာပဲ လာသိမ်းသွားတယ်။ လုယက်သတ်ဖြတ်သွားတဲ့ ၂ ယောက်က အသက် ၁၇ နှစ်ပဲ ရှိသေးတယ်။”
သေဆုံးသူမှာ သာကေတမြို့နယ်၊ အမှတ် ၃ ရန်ပြေရပ်ကွက်၊ ရန်ပြေ ၁၈ လမ်းနေ ဦးစံသိန်း ဖြစ်ပြီး သူမောင်းနှင်တဲ့ YGN-21 BB/8983 TOYOTA PROBOX အဖြူရောင်ယာဥ်ကိုလည်း ပြန်လည်သိမ်းဆည်းရမိခဲ့တယ်လို့ အုပ်ချုပ်ရေးနဲ့ နီးစပ်သူတယောက်က DVB ကို ပြောပါတယ်။
“လုတဲ့ ၂ ယောက်ကို မိပါပြီ။ စကားများလို့ သတ်တယ်လို့ ပြောပေမဲ့ ဝက်အူလှည့်၊ ကတ်ကြေးနဲ့ ၃၁ ချက် ထိုးသတ်ပြီး အလောင်းကိုပစ်၊ ကားနံပါတ်ပြားတွေပါ ဖြတ်လွှင့်ပစ်ပြီး ကားယူသွားတာ။ လူသတ်မှုရော လုယက်မှုရော ပုဒ်မ ၂ ခုနဲ့ အမှုဖွင့်ထားတယ်။”
လတ်တလောမှာ ပြစ်မှုကျူးလွန်သူ ထက်ရှိုင်းဇော်နဲ့ သက်ဝေဦး တို့ကို သန်လျင်မြို့မရဲစခန်းက (ပ)၃၅၅/၂ဝ၂၅၊ ပုဒ်မ ၃ဝ၂/၃၉၂ နဲ့ အမှုဖွင့်ထားတယ်လို့ ဆိုပါတယ်။
