ထိုင်း-မြန်မာနယ်စပ်၊ ချင်းရိုင်းခရိုင်၊ မယ်ဆိုင်မြို့နယ်ထဲမှာ အောက်တိုဘာ ၆ ရက် ညက ထိုင်းစစ်တပ်နဲ့ မူးယစ်ဆေးသယ်ဆောင်တဲ့အဖွဲ့တို့ ပစ်ခတ်မှုဖြစ်ပွားပြီး အိုက်စ်မူးယစ်ဆေး အလေးချိန် ၂၄၅ ကီလိုဂရမ် ဖမ်းမိတယ်လို့ ထိုင်းတော်ဝင်စစ်တပ်သတင်းက ထုတ်ပြန်ပါတယ်။
ထိုင်းအမှတ် ၃ ထပ်ကျောက်တာ့ခ်စစ်ကြောင်းက ကွန်မန်ဒိုတပ်ဖွဲ့ဝင်တွေဟာ ပြီးခဲ့တဲ့ အောက်တိုဘာ ၆ ရက် ညက မယ်ဆိုင်မြို့နယ်၊ ကော်ချန့်အုပ်စု၊ ပါဆန်းငမ်းကျေးရွာအုပ်စုတွင်း လုံခြုံရေးစောင့်ကြပ်စစ်ဆေးစဉ် မြန်မာနယ်စပ်မျဉ်းဘက်က လူ ၈ ယောက်မှ ၁၂ ယောက်ခန့်ပါ အဖွဲ့ အိတ်တွေကိုယ်စီနဲ့ ဝင်ရောက်လာခဲ့တယ်၊ တာဝန်ရှိသူတွေက စစ်ဆေးဖို့ ရပ်မိန့်ပေးလိုက်တယ်၊ ဒါပေမဲ့ တဘက်က အမျိုးအမည်မသိ သေနတ်အမျိုးအစားနဲ့ စပြီးပစ်လာတာကြောင့် နှစ်ဖက် ၅ မိနစ်ကြာ အပြန်အလှန် ပစ်ခတ်ခဲ့ကြတယ်လို့ ဆိုပါတယ်။
အောက်တိုဘာ ၇ ရက် မနက်မိုးလင်းတော့ တာဝန်ရှိသူတွေက အဆိုပါနေရာကို သွားရောက်ပြီး နယ်မြေရှင်းလင်းတာမှာ ကျောပိုးအိတ်အသွင်ပြောင်း ဆာလာအိတ် ၁၀ အိတ် ပြန့်ကျဲနေတယ်၊ အဆိုပါအိတ်ထဲမှာ တအိတ်ကို အိုက်စ်မူးယစ်ဆေး ၂၅ ကီလိုဂရမ်ပါ ၉ အိတ်နဲ့ ၂၀ ကီလိုဂရမ်ပါ ၁ အိတ်တို့ တွေ့ရှိပြီး စုစုပေါင်း အိုက်စ်မူးယစ်ဆေး အလေးချိန် ၂၄၅ ကီလိုဂရမ် သိမ်းဆည်း ရမိတယ်လို့ ထုတ်ပြန်ချက်မှာ ဖော်ပြထားပါတယ်။
အောက်တိုဘာ ၆ ရက် တနေ့တည်းမှာပဲ မယ်ဆိုင်ကနေ ချင်းရိုင်းကိုသွားတဲ့ ကားတစီးပေါ် ကနေ စိတ်ကြွဆေးပြား ၉၀၀,၀၀၀ ဖမ်းဆီးရမိခဲ့တယ်လို့ မယ်ဆိုင်ပရက်စ် သတင်းမှာ ဖော်ပြပါတယ်။
၆ ရက်နေ့ မနက်စောစော (သန်းခေါင်ကျော်) က ချင်းရိုင်းခရိုင်၊ မယ်ဖာ့လုံမြို့နယ်၊ ထာ့ခေါက်ပိုတ်ရွာဘက်ကနေ ချင်းရိုင်းမြို့နယ်ဘက်ကို ဦးတည်သွားနေတဲ့ ဆိုင်ကယ်တစီးနဲ့ မီးခိုးရောင် ဆလွန်းကားတစီးတို့ကို မသင်္ကာတာကြောင့် တာဝန်ရှိသူတွေက နောက်ယောင်ခံပြီး မယ်ဖာ့လုံလေဆိပ်သွား အနောက်မြို့ရှောင်လမ်းပေါ်ကနေ တားဆီးစစ်ဆေးခဲ့တယ်။ အမှန်ပဲ အဆိုပါကားပေါ်ကနေ စိတ်ကြွဆေးပြား ၉ သိန်း ဖမ်းမိတယ်။ ယာဉ်မောင်းမှာ ပန်းရောင် ရွှေ့ပြောင်းလုပ်သားကတ် ကိုင်ဆောင်သူ မြန်မာနိုင်ငံသား နိုင်လိမူ (၂၁ နှစ်) ဖြစ်ပြီး ရှေ့က ဆိုင်ကယ်မောင်းပြီး လမ်းပြသူမှာလည်း မြန်မာဘက်ခြမ်းမှာနေတဲ့ မြန်မာတယောက်ဖြစ်တယ်လို့ သတင်းမှာ ဖော်ပြပါတယ်။
ထိုင်း-မြန်မာနယ်စပ်မှာ အောက်တိုဘာ ၁ ရက်မှ ၆ ရက်နေ့အတွင်း မူးယစ်ဆေးဝါး ဖမ်းဆီးသိမ်းဆည်းရမိမှု ၉ ကြိမ်ရှိတယ်၊ ပမာဏမှာ စိတ်ကြွဆေး ၁,၄၇၀,၂၆၆ ပြား၊ ဘိန်းဖြူ ၁ ဒသမ ၀၄ ကီလိုဂရမ်၊ အိုက်စ်မူးယစ်ဆေး ၂၄၅ ကီလိုဂရမ် ဖြစ်ပြီး မူးယစ်သယ်အဖွဲ့နဲ့ ပစ်ခတ်မှု ၂ ကြိမ် ဖြစ်ပွားခဲ့တယ်၊ မူးယစ်သယ်အဖွဲ့မှ တယောက် သေဆုံး၊ တရားခံ ၉ ယောက် ဖမ်းဆီးရမိတယ်လို့ ထိုင်းသတင်းတွေမှာ ဖော်ပြပါတယ်။
Source: Maesaipress / Royal Thai Army
