ရန်ကုန်မြို့လယ်ကောင်၊ ပန်းဘဲတန်းမြို့နယ် အမှတ် ၁၁ ရပ်ကွက်၊  ၃၂ လမ်း အထက်ဘလောက်မှာရှိတဲ့ Beauty Land Hotel မှာ အောက်တိုဘာ ၆ ရက် ဒီနေ့မနက် အမျိုးသမီး တယောက် အပိုင်းပိုင်းခုတ်ထစ် သတ်ဖြတ်ခံခဲ့ရတယ်လို့ မြို့ခံတွေဆီက သိရပါတယ်။

ဒီကနေ့ မနက် ၉ နာရီခွဲက Beauty Land Hotel အခန်းနံပါတ် ၅၀၂ မှာ တည်းခိုတဲ့အမျိုးသမီးကို လူသတ်သမားက အပိုင်းပိုင်းခုတ်ထစ်သတ်ဖြတ်ကာ အခန်းအပြင်ဘက် လေအေးပေးစက် တပ်ဆင်ထားတဲ့စင်ပေါ်မှာ အမှိုက်အိတ်အပြာနဲ့ စွန့်ပစ်ခဲ့တာလို့ မြို့ခံတယောက်က  ပြောပါတယ်။

“ဘယ်အချိန်ကတည်းက သတ်သွားလဲ မသိဘူး။ လူကို အသားငါးခုတ်သလို အပိုင်းပိုင်း ခုတ်ထစ်ပြီး အမှိုက်အိတ်ထဲ ထည့်ထားပြီး လေအေးပေးစက်ပေါ် တင်ထားတာ။ လက်တဖက်ထွက်နေမှ သိတာ။  အတော်လေးကြောက်ဖို့ကောင်းတယ်။  ဟိုတယ်ထဲမှာ ဒီလို ခုတ်ထစ် သတ်ဖြတ်နေတာကို မသိဘူးဆိုတော့ စဥ်းစားလို့မရဘူး။" 

လတ်တလောမှာ စစ်ကောင်စီတပ်နဲ့ ရဲတွေက အဆိုပါဟိုတယ်အတွင်း ဝန်ထမ်းတွကို စစ်ဆေးနေပြီး CCTV မှတ်တမ်းတွေကို တိုက်ဆိုင်စစ်ဆေးနေတယ်လို့ အုပ်ချုပ်ရေးနဲ့နီးစပ်သူတယောက် က ပြောပါတယ်။

“သေတဲ့အမျိုးသမီးရဲ့ ကိုယ်ရေးအချက်အလက်တွေနဲ့ CCTV တွေ တိုက်ပြီး စစ်ဆေးနေတယ်၊ သတ်သွားတဲ့သူကို မိဖို့ဆိုတာတော့ မလွယ်ဘူး။ မြို့လယ်ကောင်က ဟိုတယ်မှာ ဒီလို လူသတ်မှု ဖြစ်တယ်ဆိုတော့ အုပ်ချုပ်ရေးပိုင်းက စောက်ရှက်ကွဲတာပေါ့။”

ပြီးခဲ့တဲ့ သြဂုတ်လအတွင်းက မရမ်းကုန်းမြိုနယ် ကမ္ဘာအေးကွန်ဒိုမှာ နေထိုင်တဲ့ တောင်ကိုရီးယားနိုင်ငံသားတယောက် လုယက်သတ်ဖြတ်ခံရသလို လသာမြို့နယ်က နယူးပါတီ KTV မှာ တရုတ်နိုင်ငံသားတယောက် သေနတ်နဲ့ ပစ်ခတ်သတ်ဖြတ်ခံခဲ့ရပါတယ်။

အလားတူ အခုနှစ် ဇန်နဝါရီလအစောပိုင်းက ဒေါပုံ၊ သာကေတ၊ မရမ်းကုန်း၊ ကွမ်းခြံကုန်းနဲ့ ရွှေပြည်သာမြို့နယ်မှာ လူ ၅ ယောက် လုယက်သတ်ဖြတ်ခံရပြီး ပြစ်မှု ကျူးလွန်သူတွေကို အခုချိန်ထိ ရဲတွေက ဖမ်းဆီးရမိခြင်းမရှိသေးပါဘူး။