တိုက်ပွဲတွေရှိနေတဲ့ ဧရာဝတီတိုင်း၊ ရေကြည်မြို့နယ်ထဲက ကျေးရွာတချို့မှာ ဈေးဝယ်ဖို့အတွက် ထောက်ခံစာပါမှ သွားခွင့်ပေးပြီး ထောက်ခံစာတစောင်ကိုလည်း စစ်ကောင်စီခန့် ကျေးရွာအုပ်ချုပ်ရေးမှူးက ကျပ် ၁၀,၀၀၀ တောင်းတယ်လို့ ဒေသခံတွေဆီက သိရပါတယ်။
ရေကြည်မြို့နယ်၊ ညောင်မှော်ကျေးရွာအုပ်စု အုပ်ချုပ်ရေးမှူး မင်းဇော်က စက်တင်ဘာလတတိယ အပတ်ကစတင်ပြီး ရွာသားတွေအနေနဲ့ ရေကြည်မြို့ပေါ်နဲ့ တခြားဒေသတွေကို သွားရောက်ပြီး ဘယ်ကုန်ပစ္စည်းမဆိုဝယ်ယူလိုရင် ဈေးဝယ်ထောက်ခံစာတရွက်ကို ကျပ် ၁၀,၀၀၀ ပေးမှ လုပ်ပေးတာဖြစ်ပြီး ထောက်ခံစာမလုပ်ဘဲ ဈေးဝယ်သွားခွင့်မပေးဘူးလို့ သိရပါတယ်။
ဒေသခံ တယောက်က “ထောက်ခံစာမပါဘဲ ဈေးသွားဝယ်လို့အဖမ်းခံရရင် တာဝန်မယူဘူးလို့ပြောတာ။ ထောက်ခံစာကျတော့ တရွက် ၁၀,၀၀၀ အထိကောက်တာ။ ရွာကနေ ရေကြည်ဘက်သွားသွား။ ငါးသိုင်းချောင်းဘက်သွားလုပ်ရတာ” လို့ ပြောပါတယ်။
ထောက်ခံစာမပါဘဲ ဈေးဝယ်ထွက်တဲ့သူတွေကို စစ်ကောင်စီခန့်အုပ်ချုပ်ရေးမှူးနဲ့ စစ်ကောင်စီတပ်၊ ပြည်သူ့စစ်တွေက ရွာထိပ်စစ်ဆေးရေးဂိတ်ကနေ စောင့်ဖမ်းပြီး ငွေကျပ် ၁ သိန်းအထိ ဒဏ်ရိုက်နေတယ်လို့ ဒေသခံတွေက ဆိုပါတယ်။
စစ်ကောင်စီခန့် အုပ်ချုပ်ရေးအဖွဲ့နဲ့ နီးစပ်သူတယောက်က “ထောက်ခံစာပါ၊ မပါကို ရွာထိပ်မှာစစ်ဆေးတယ်။ ထောက်ခံစာပါမှ ဆက်သွားခွင့်ရတာ။ မပါရင်အဖမ်းပါခံရတာ။ အဖမ်းခံရပြီးဆို ထောက်ခံစာဖိုးထက် ၁၀ ဆ ပိုပေးရတယ်။ အုပ်ချုပ်ရေးမှူး လုပ်ပေးတဲ့ ထောက်ခံစာကလည်း လုပ်ပေးတဲ့နေ့နဲ့ နောက်တနေ့၊ ၂ ရက်လောက်ပဲသက်တမ်းက အကျုံးဝင်တယ်” လို့ ပြောပါတယ်။
ပြီးတော့ စစ်ကောင်စီခန့် အုပ်ချုပ်ရေးမှူး မင်းဇော်နဲ့အဖွဲ့ဟာ ရွာသားတွေ အပြင်ထွက်ဝယ်ယူလာတဲ့ ကုန်ပစ္စည်းမှန်သမျှကို ဖွင့်ဖောက်စစ်ဆေးပြီး ထောက်ခံစာကြေးနဲ့ အပြင်ထွက် ခွင့်ကန့်သတ်ချက်တွေကြောင့် ကုန်ပစ္စည်းအများအပြား ဝယ်လာရင်လည်း PDF အတွက် ဝယ်လာတာလားလို့ မေးပြီး သိမ်းယူနေတယ်လို့ သိရပါတယ်။
ဒါ့အပြင် မှတ်ပုံတင်၊ ဒါမှမဟုတ် စမတ်ကတ်တွေကိုပါ စစ်ဆေးပြီး စစ်ဆေးတာကိုငြင်းဆန်မိတဲ့ အရပ်သား ၉ ယောက်ကိုလည်း စစ်ကောင်စီတပ်နဲ့အုပ်ချုပ်ရေးအဖွဲ့က ဖမ်းဆီးရိုက်နှက် စစ်ဆေးဖူးတယ်လို့ သိရပါတယ်။
