စစ်ကိုင်းတိုင်း၊ ခင်ဦးမြို့နယ် သံဘိုရွာအနီးမှာ စစ်ကောင်စီတပ်နဲ့ ဒေသခံ ပြည်သူ့ကာကွယ်ရေးတပ်တို့ စက်တင်ဘာ ၁၈ ရက် ညနေ ၄ နာရီကျော်လောက်မှာ တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။
စစ်ကောင်စီစစ်ကြောင်းဟာ ဖုတ်ကုန်းရွာကနေ မကျည်တုံ ပျူရွာဘက်ကို စစ်ကြောင်းထိုးလာတဲ့ အချိန်မှာ ဒေသခံ ပြည်သူ့ကာကွယ်ရေးတပ်တွေနဲ့ ထိပ်တိုက်တွေဆုံရာကနေ ပစ်ခတ်မှု ဖြစ်ပွားခဲ့တာလို့ ဆိုပါတယ်။
သံဘိုရွာသားတယောက်က “ညနေပိုင်းကတည်းက တိုက်ပွဲကဖြစ်ကြတာ။ ညပိုင်း ၈ နာရီလောက်မှ တိုက်ပွဲသိမ်းသွားတာ။ စစ်တပ်ဘက်က အထိများတယ်လို့တော့ သိထားရတယ်။ စစ်ကြောင်းလာရင်တော့ ပြေးရတာပဲ။ မပြေးဘဲ ရွာထဲနေရင်လည်း သူတို့က တွေ့တဲ့သူ အကုန်သတ်ပစ်တာ။ မနေညပိုင်းကတော့ ခဏ စစ်ဘေးရှောင်လိုက်ရသေးတယ်။ စစ်ကြောင်းက တိုက်ပွဲဖြစ်ပြီး ရှေ့မတိုးနိုင်ဘဲ နောက်ပြန်ဆုတ်သွားရတယ်။ ကျနော်တို့အရပ်သား သေဆုံးတာတော့ မရှိဘူး” လို့ ပြောပါတယ်။
အဆိုပါတိုက်ပွဲအတွင်း စစ်ကောင်စီဘက်က တယောက်ကျဆုံးပြီး ၅ ယောက်ထက်မနည်း ဒဏ်ရာပြင်းထန်ရသွားတယ်လို့ ဒေသခံပြည်သူ့ကာကွယ်ရေးတပ် ရဲဘော်တယောက်က ပြောပါတယ်။
“ကျနော်တို့ ပကဖရယ်၊ တိုက်နယ်ရယ်၊ တပ်ရင်းပူးပေါင်းအဖွဲ့တွေနဲ့ တိုက်ပွဲဖြစ်ကြတာဗျ။ စစ်တပ်က မကျည်းတုံကို မသွားနိုင်ဘဲ စစ်ကြောင်း နောက်ပြန်ဆုတ်သွားရတယ်။ စစ်တပ်ဘက်က တကောင် သေပြီး ၅ ကောင်ထက်မနည်း ဒဏ်ရာရသွားတယ်။ ကျနော်တို့ဘက်ကတော့ ရဲဘော်တဦး မစိုးရိမ်ရဒဏ်ရာ ရတာကလွဲပြီး ကျန်တာ ဘေးကင်းပါတယ်ဗျ။”
ခင်ဦးမြို့နယ် သံဘိုကျေးရွာကို စက်တင်ဘာ ၁၀ ရက် ည ၈ နာရီကျော်လောက်ကလည်း စစ်တပ်က လက်နက်ကြီး ပစ်ခတ်ခဲ့တာကြောင့် ကလေးငယ်တယောက်အပါအဝင် ပြည်သူ ၃ ယောက် ဒဏ်ရာရခဲ့တယ်လို့ သိရပါတယ်။
