မကွေးတိုင်း၊ မြိုင်မြို့နယ်ထဲကို စစ်တပ်က စက်တင်ဘာ ၁၇ ရက် မနက် ၁၁ နာရီခွဲဝန်းကျင်မှာ စက်တပ်လေထီးတွေနဲ့ ဗုံးကြဲချခဲ့တာကြောင့် အမျိုးသမီး တယောက် သေဆုံးသလို ၃ ယောက် ထက်မနည်း ဒဏ်ရာရရှိတယ်လို့ ဒေသခံတွေဆီကနေ သိရပါတယ်။

မြိုင်အနောက်ခြမ်းမှာရှိတဲ့ ရေနံမှော်တွေဘက်ကို တိုက်ပွဲဖြစ်နေတာမရှိဘဲနဲ့   ပခုက္ကူ တပ်မ ၁၀၁ က တက်လာတဲ့ စက်တပ်လေထီး ၂ စီးနဲ့  ဗုံးကြဲသွားတာလို့  မြိုင်အခြေစိုက်တော်လှန်ရေးတပ်ဖွဲ့ဝင်တယောက်က ပြောပါတယ်။

မြိုင်ဒေါင်းမင်း မြေပြင်သတင်းမှန်ပြန်ကြားရေးအဖွဲ့ရဲ့ ပြန်ကြားရေးတာဝန်ရှိသူက “ကျောက်ခွက်ရေနံမှော်နဲ့ ဝဲတူးရေနံမှော်တွေနားကို ပါရာမော်တာ ၂ စီးနဲ့ ၉၀ မမဗုံးသီးလို့လည်းခေါ်တယ်၊ ၉၀ မမ မော်တာကျည်လို့လည်း ခေါ်တယ်၊ အဲ့ဒါတွေနဲ့ပစ်သွားတာ။ ရေနံခပ်တဲ့ အမျိုးသမီးတယောက်ကတော့ နေရာမှာတင်ဆုံးသွားတယ်လို့ သိရတယ်။ အဲ့ဒိဘက်မှာက ဖုန်းနဲ့ အင်တာနက်လိုင်းအခက်အခဲရှိနေလို့ သေဆုံးသွားသူရဲ့ အသက်အရွယ်နဲ့ တခြားအချက်အလက်တွေကို စုံစမ်းနေဆဲဖြစ်ပါတယ်”လို့ DVB ကို ပြောပါတယ်။

​လေကြောင်းတိုက်ခိုက်ခံရမှုအတွင်း ရေနံမှော်လုပ်သား ၃ ယောက်ထက်မနည်းဟာလည်း ဒဏ်ရာရရှိခဲ့ကြပြီး စိုးရိမ်ရသူတွေလည်း ပါဝင်နေပါတယ်။

စက်တင်ဘာ ၁၆ ရက်ကလည်း မြိုင်မြို့နယ် အနောက်တောင်ခြမ်းက ဆူးဝင်းကျေးရွာအနီး အရှေ့မြောက်ဘက်ကို စစ်တပ်က စက်တပ်လေထီး ၂ စီးနဲ့ဗုံးကြဲတိုက်ခိုက်ခဲ့ပြီး ထိခိုက်ပျက်စီးမှုတော့ မရှိခဲ့ပါဘူး။

အာဏာသိမ်းစစ်တပ်ဟာ အခုရက်ပိုင်းမှာ မြိုင်မြို့နယ်ထဲကို လေကြောင်းတိုက်ခိုက်တာတွေ ခပ်စိပ်စိပ်ပြုလုပ်လာနေလို့ ဒေသခံပြည်သူတွေအနေနဲ့ ဗုံးခိုကျင်းတူတာတွေအပြင် လေကြောင်း ကာကွယ်ရေးအစီအမံတွေကို အထူးပြုလုပ်ထားကြဖို့နဲ့ လေကြောင်းရန်သတိပေးချက်တွေကို အထူးလိုက်နာကြဖို့  မြိုင်အခြေစိုက်တော်လှန်ရေးတပ်ဖွဲ့တွေက သတိပေးထားပါတယ်။