အီကွေဒေါအစိုးရရဲ့ ဒီဇယ်ဆီ အမတော်ကြေး ဖြတ်တောက်မှုအား ကန့်ကွက်ဆန္ဒပြသူတွေကို မြို့တော်ကွေတိုမှာ စက်တင်ဘာ ၁၆ ရက်က လူစုခွဲဖို့ ရဲတွေက မျက်ရည်ယိုဗုံးနဲ့ အဓိကရုဏ်း ထိန်းချုပ်ရေး နည်းဗျူဟာတွေကို သုံးခဲ့ကြပါတယ်။

ဆန္ဒပြသူတွေက အဓိကရုဏ်းနှိမ်နင်းရေးရဲတွေကို ပစ္စည်းတွေနဲ့ ပစ်ပေါက်ခဲ့ပြီး ရဲတွေကလည်း လူစုလူဝေးကို မျက်ရည်ယိုဗုံးတွေနဲ့ တုံ့ပြန်ရာက ထိပ်တိုက်ရင်ဆိုင်မှုတွေ ဖြစ်ခဲ့ပါတယ်။

ကွီတိုမြို့ ဆင်ခြေဖုံးမှာ ဆန္ဒပြသူတွေက အဝေးပြေးလမ်းတွေကို ကျောက်တုံးတွေ၊ မြေပုံတွေ၊ မီးလောင်နေတဲ့ အတားအဆီးတွေနဲ့ ပိတ်ဆို့ထားပါတယ်။

အပျက်အစီးတွေကိုဖယ်ဖို့ မြေကော်စက် ဘူဒိုဇာတွေကိုသုံးပြီး ပိတ်ဆို့နေတဲ့ လမ်းတွေကို ရဲတပ်ဖွဲ့နဲ့ စစ်တပ်တို့က ရှင်းလင်းဆောင်ရွက်ခဲ့ပါတယ်။

အကြီးစားသယ်ယူပို့ဆောင်ရေး၊ ခရီးသည်တင်ယာဉ်နဲ့ စိုက်ပျိုးရေးကဏ္ဍတွေအတွက် သုံးတဲ့ ဒေါ်လာ ၁ ဒသမ ၁ ဘီလီယံဖိုး ဒီဇယ်ဆီ အမတော်ကြေးကို ဖယ်ရှားဖို့ ပြီးခဲ့တဲ့သီတင်းပတ်မှာ အစိုးရက ဆုံးဖြတ်ခဲ့တဲ့အတွက် ဆန္ဒပြပွဲတွေ ပေါ်ပေါက်ခဲ့တာပါ။

ဒီထောက်ပံ့ကြေးကို ဖယ်ရှားလိုက်ခြင်းကြောင့် ဒီဇယ်တဂါလန်ကို ဒေါ်လာ ၁ ဒသမ ၈၀ ကနေ ၂ ဒသမ ၈၀ အထိ တိုးမြင့်လာခဲ့ပါတယ်။

လူနေမှုစရိတ်တွေ တိုးလာမယ်လို့ ပြောဆို ငြင်းခုံနေတဲ့ ဆန္ဒပြသူတွေက ကျယ်ကျယ်ပြန့်ပြန့် ကန့်ကွက်ခဲ့ကြပါတယ်။

သမ္မတ ဒန်နီရယ် နိုဘိုအာက ပြည်နယ် ၇ ခုမှာ စက်တင်ဘာ ၁၆ ရက်က အရေးပေါ်အခြေအနေ ကြေညာခဲ့ပါတယ်။

ရက်ပေါင်း ၆၀ ကြာ အရေးပေါ်အခြေအနေ ကြေညာချက်က ဘေးဒဏ်သင့်ပြည်နယ် ၇ ခုမှာ လွတ်လပ်စွာ စုဝေးခွင့်ကို ဆိုင်းငံ့ထားပါတယ်။

နိုင်ငံသားလုံခြုံရေးကို ခြိမ်းခြောက်နေတဲ့ လူစုလူဝေးတွေကို တားဆီးဖြိုဖျက်ဖို့ ရဲတပ်ဖွဲ့နဲ့ စစ်တပ်တို့ကို လုပ်ပိုင်ခွင့်ပေးထားပါတယ်။

Source: Reuters