ရန်ကုန်မှာ လုံခြုံရေးဝန်ထမ်းတယောက် လုပ်ငန်းခွင်မှာ ဆွဲကြိုးချသေဆုံးခဲ့တယ်လို့ မေတ္တာသီတာရေစင် လူမှုကယ်ဆယ်ရေးအသင်းကနေ သိရပါတယ်။
ဒီကနေ့ စက်တင်ဘာ ၁၆ ရက် မနက်က ရန်ကုန်တိုင်း၊ တောင်ဥက္ကလာပမြို့နယ်၊ ၆ ရပ်ကွက်က ဆောက်လုပ်ရေးလုပ်ငန်းထဲမှာ အဲဒီလုံခြုံရေးဝန်ထမ်း အမျိုးသားရဲ့ ဆွဲကြိုးချ သေဆုံးနေတဲ့ အလောင်းကို စည်ပင်ဝန်ထမ်းတချို့က တွေ့ခဲ့တာလို့ သိရပါတယ်။
သေဆုံးသူဟာ အသက် ၃၅ နှစ်နဲ့ ၄၀ ကြား အရွယ်ရှိပြီး သူအလုပ်လုပ်နေတဲ့ ဆောက်လုပ်ရေးလုပ်ငန်းရုံး အသေးစား အဆောက်အအုံထဲမှာ မီးကြိုးကို လည်ပင်းပတ်ပြီး အဆုံးစီရင်ခဲ့တာလို့ သိရပါတယ်။
ဒါကြောင့် စစ်ကော်မရှင်လက်အောက်ခံ ရဲကို အကြောင်းကြားခဲ့တာကြောင့် ရဲက တောင်ဥက္ကလာပမှာရှိတဲ့ မေတ္တာသီတာရေစင် လူမှုကယ်ဆယ်ရေးအသင်းကို အခင်းဖြစ်တဲ့ နေရာကို လာဖို့ ခေါ်လိုက်တာလို့လည်း သိရပါတယ်။
မြေပြင်မှာ လိုက်ပါကူညီတဲ့သူက “ဒီမနက် စောစောက မနက် ၄ နာရီလောက် ရှိမယ်တဲ့။ အမှိုက်သိမ်းတဲ့ စည်ပင်အလုပ်သမားတွေက တွေ့တာ။ သူတို့က ရဲစခန်းကို အကြောင်းကြားတော့ ရဲစခန်းကလည်း အလောင်းသယ်ဖို့ ခေါ်တာကြောင့် သွားရတယ်။ ဆောက်လုပ်ရေးလုပ်ငန်းခွင်မှာ သူတယောက်တည်းပဲ ရှိနေတာဖြစ်မယ်လို့ သုံးသပ်ရပါတယ်။ သူ့အိတ်ထဲက သူ့ရဲ့ လုံခြုံရေးကုမ္ပဏီကတ်ကို တွေ့လို့ ဆက်သွယ်ထားပါတယ်” လို့ ပြောပါတယ်။
လက်ရှိမှာတော့ သေဆုံးသူအမျိုးသားရဲ့ ရုပ်အလောင်းကို မေတ္တာသီတာရေစင် လူမှုကယ်ဆယ်ရေးအသင်းက သင်္ကန်းကျွန်း စံပြဆေးရုံ အအေးတိုက်(ရင်ခွဲရုံ)ကို ပို့ထားတယ်လို့ သိရပါတယ်။
“ရဲကတော့ လုပ်ထုံးလုပ်နည်းအရ သေမှုသေခင်းဖွင့်ပြီး စစ်ဆေးကြဦးမယ်ထင်ပါတယ်” လို့ သူက ပြောပါတယ်။
