မွန်ပြည်နယ်၊ ရေးမြို့နယ်၊ အံဒင်ကျေးရွာအုပ်စု၊ နှီးနူးကျေးရွာနဲ့ ဓမင်းဆိပ်ကျေးရွာတို့က အုပ်ချုပ်ရေးမှူးနဲ့ ရာအိမ်မှူးတို့ တနေ့တည်းပစ်ခတ်သတ်ဖြတ်ခံရတယ်လို့ ဒေသခံတွေဆီကနေ သိရပါတယ်။
ပစ်သတ်ခံရသူတွေက နှီးနှူးကျေးရွာနေ အုပ်ချုပ်ရေးမှူး ဦးရွှေအနဲ့ ဓမင်းဆိပ်ကျေးရွာနေရာအိမ်မှူး ဦးသောင်းစိန်တို့ ဖြစ်ကြပြီး မနေ့ စက်တင်ဘာ ၁၄ ရက်ညက သူတို့ရဲ့နေအိမ်တွေကို လက်နက်ကိုင်ဆောင်ထားသူတွေက ဝင်ရောက်ပစ်သတ်ခဲ့တာလို့ သိရပါတယ်။
ဖြစ်စဉ်ကို သိရှိတဲ့သူ ဒေသခံ တယောက်က “အုပ်ကြီးရော၊ ရာအိမ်မှူးရော နှစ်ယောက်လုံး သူတို့အိမ်တွေမှာ ပစ်သတ်ခံရတာ။ အမည်မသိ သေနတ်သမားတွေက ပစ်ခတ် သတ်ဖြတ်သွားတာ။ သေနတ်သံတွေကြားလို့ သွားစုံစမ်းကြည့်တော့ သိရတာ။ တခါတည်းပွဲချင်းပြီး ဆုံးသွားတာ။ ရာအိမ်မှူးက နာမည်ဆိုးနဲ့ ပိုကျော်ကြားတဲ့သူ” လို့ ပြောပါတယ်။
ပစ်ခတ်ခံရလို့ အုပ်ချုပ်ရေးမှူးနဲ့ ရာအိမ်မှူးတို့ဟာ နေရာမှာပင် သေဆုံးသွားပြီး ရုပ်အလောင်းတွေကို ရေးမြို့နယ် ဆေးရုံကို သယ်ဆောင်သွားတာတွေ့ရတယ်လို့ ဒေသခံတွေဆီက သိရပါတယ်။
ရဲတပ်ဖွဲ့နဲ့ နီးစပ်တဲ့သူ တယောက်က “ဘယ်အဖွဲ့က လုပ်တယ်ဆိုတာတော့ မသိရသေးပါဘူး။ အုပ်ကြီးက အရင် ပစ်သတ်ခံရတာပါ။ ပြီးမှ ရာအိမ်မှူးပစ်သတ်ခံရတာ။ အခု ရဲတွေအပြင် တပ်ပါ စစ်ဆေးနေတယ်” လို့ ပြောပါတယ်။
အုပ်ချုပ်ရေးမှူးနဲ့ ရာအိမ်မှူးပစ်သတ်ခံရပြီးနောက် စစ်ကောင်စီတပ် နဲ့ ရဲတွေက ညတွင်းချင်း ကျေးရွာအတွင်း ရောက်လာပြီး ပစ်ခတ်သတ်ဖြတ်သွားတဲ့ သေနတ်သမား တွေကို လိုက်လံရှာဖွေနေကြတယ်လို့ သိရပါတယ်။
အခုနှစ် ဖေဖော်ဝါရီလ ၁၅ ရက်ကလည်း မွန်ပြည်နယ်၊ ရေးမြို့နယ်၊ ကွင်းရှည်ကျေးရွာ အုပ်ချုပ်ရေးမှူး ဦးသက်ပိုင်စိုးဟာ သေနတ်နဲ့ပစ်သတ်ခံရတာကြောင့် သေဆုံးသွားတယ်လို့ ဒေသခံတွေနဲ့ လူမှုကယ်ဆယ်ရေးအဖွဲ့နဲ့ နီးစပ်သူတွေဆီက သိရပါတယ်။
