မန္တလေးတိုင်း၊ မဟာအောင်မြေမြို့နယ်မှာ ဆိုင်ကယ်တွေကို ဖမ်းဆီးလုယက်နေတဲ့ ရဲမွန်တောင် ပြည်သူ့စစ် ၃ ယောက်ကို စက်တင်ဘာ ၉ ရက်က စစ်ကောင်စီလက်အောက်ခံ ရဲတွေက ဖမ်းမိခဲ့တယ်လို့ မြို့ခံတွေဆီက သိရပါတယ်။
စက်တင်ဘာ ၈ ရက် ည ၁၀ နာရီခွဲက ရဲမွန်တောင်ရပ်ကွက်၊ ၅၈ လမ်း ၄၁ လမ်းမှာ လူငယ် ၃ ယောက်ကို ပြည်သူ့စစ် ၅ ယောက်က စစ်ဆေးမယ်ဆိုပြီး ဖမ်းဆီးကာ ဆိုင်ကယ်နဲ့ ဖုန်းတွေ လုယက်ခဲ့တာလို့ မြို့ခံတယောက်က ပြောပါတယ်။
“ကား ၂ စီးနဲ့ ရောက်လာပြီး ကလေးတွေကို ခြိမ်းခြောက် ရိုက်နှက်ပြီး ဆိုက်ကယ်တွေရော ဖုန်းတွေရော လုသွားတာ၊ ၅ ယောက်၊ စစ်တပ်က ဖမ်းမိတော့ ၃ ယောက်၊ အမှုဖွင့်တော့ လုယက်မှုမဟုတ်ဘူး အယောင်ဆောင်မှု။”
ပြစ်မှုကျူးလွန်သူ ၅ ယောက်ထဲက ၃ ယောက်ကို ပြစ်မှုကျူးလွန်ရာမှာ အသုံးပြုတဲ့ ယူနီဖောင်း၊ အိမ်စီးကားနဲ့အတူ စက်တင်ဘာ ၉ ရက်က ဖမ်းမိခဲ့ပြီး မဟာအောင်မြေမြို့နယ် ရဲစခန်းမှာ ချုပ်ထားတယ်လို့ သူကပြောပါတယ်။
မဟာအောင်မြေပြည်သူ့စစ်အဖွဲ့ကို လူမိုက် နေမျိုးကျော် ဦးဆောင်နေပြီး သူ့ရဲ့အောက်မှာ ချမ်းမြသာစည်၊ ချမ်းအေးသာစံ၊ ပြည်ကြီးတံခွန် ပြည်သူ့စစ်အဖွဲ့တွေရှိပြီး စစ်တပ်နဲ့ပေါင်းကာ လောင်းကစားဝိုင်းတွေ ဖွင့်လှစ်ထားတယ်လို့ အုပ်ချုပ်ရေးနဲ့နီးစပ်သူတယောက်က ပြောပါတယ်။
“မဟာအောင်မြေမှာ အဆိုးဆုံးက ရဲမွန်တောင် ပြည်သူ့စစ်အဖွဲ့ပဲ။ လူမိုက် နေမျိုးကျော် အုပ်ချုပ်တာ။ ပေါက်ကိုယ်တော်တပည့်။ ပြီးခဲ့တဲ့လက ဆိုင်ကယ်စီးလာတဲ့ ကလေးတွေကို ပြည်သူ့စစ်အဖွဲ့က ဖိနပ်နဲ့ ပါးတွေရိုက်တယ်။ ဖမ်းမိတော့ စစ်တပ်ရော ပြည်သူ့စစ်ရော သူတို့အဖွဲ့က မဟုတ်ဘူးဆိုပြီး ငြင်းတာ။”
မဟာအောင်မြေမြို့နယ်မှာ လုယက်မှု အဖြစ်များပြီး ဇူလိုင် ၂၄ ရက်က ၃၉ လမ်း၊ ၈၄ x ၈၅ လမ်းမှာ ရှိတဲ့ ရွှေနန်းသုခ ရွှေဆိုင်ကို သေနတ်ပစ် လုယက်ခံရတဲ့ ဖြစ်စဥ်လည်း ရှိတယ်လို့ ဆိုပါတယ်။
မန္တလေးတိုင်းနဲ့ မကွေးတိုင်းမြောက်ပိုင်းက တပ်ထောက်ခံသူတွေနဲ့ ထောင်ထွက်လူမိုက်တွေကို ၂၀၂၃ အောက်တိုဘာလကစပြီး ပြည်သူ့စစ်သင်တန်းပေးခဲ့တဲ့ လပခ တိုင်းစစ်ဌာနချုပ်ရဲ့ အကျိုးဆက်တွေကို ပြည်သူတွေ ခံစားနေရတယ်လို့ မြို့ခံတွေက ဝေဖန်ပြောဆိုပါတယ်။
၂၀၂၄ ခုနှစ် စက်တင်ဘာ ၁၁ ရက်က ပြည်ကြီးတံခွန်မြို့နယ်က နေအိမ်တအိမ်က အိမ်စီးကားနဲ့ iPhone လုယက်မှုမှာ ပါဝင်ခဲ့တဲ့ ပေါက်ကိုယ်တော်ရဲ့ ပြည်သူ့စစ်အဖွဲ့ဝင် ၇ ယောက်ကို ရဲတွေက ဖမ်းမိခဲ့ပါတယ်။
