စစ်ကောင်စီတပ်တွေဟာ  တိုးတက်သော ဗုဒ္ဓဘာသာ ကရင်အမျိုးသားတပ်မတော် (DKBA) ဗိုလ်ဘိအဖွဲ့၊ ကရင်နယ်ခြားစောင့်တပ် (BGF) အကူအညီနဲ့ တပ်မ ၄၄၊ ၂၂၊ ၅၅၊ ၆၆ တို့ကို စစ်မှုထမ်းတပ်သားသစ်တွေကို အင်အားဖြည့်တင်းပြီး စက်တင်ဘာ ၅ ရက်က အာရှလမ်း၊ ကော့ကရိတ်-မြဝတီ လမ်းဟောင်းနဲ့ သင်္ကန်းညီနောင်ဘက်ကနေ ထိုးဖောက်ဝင်ရောက်လာပါတယ်။

စစ်ကောင်စီတပ်ဘက်က သာလွန်အင်အားအပြင် လေကြောင်း၊ လက်နက်ကြီး၊ ဒရုန်းပစ်ကူ ရယူပြီး ထိုးဖောက်လာတာကြောင့် ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းစစ်ကြောင်းဘက်က ယာယီဆုတ်ပေးခဲ့ရတာကြောင့် ကော့ကရိတ်-မြဝတီ (အာရှ) လမ်းနဲ့ သင်္ကန်းညီနောင်ကို စက်တင်ဘာ ၆ ရက် မနက်ပိုင်းက စစ်တပ်က ပြန်လည်ထိန်းချုပ်ခဲ့ပါတယ်။

ကရင်စစ်ရေးလေ့လာသူတယောက်က “နံပါတ် ၁ အချက်ကတော့ BGF အဖွဲ့အစည်းရဲ့ လုပ်ကိုင်နေတဲ့ စီးပွားရေးလုပ်ငန်းတွေ မအလဘက်ကနေပြီးတော့မှ ဖိအားပေးတာမျိုး၊ လေယာဉ်နဲ့ ဗုံးကြဲတာမျိုး လာရောက်မလုပ်ဆောင်နိုင်အောင်ဆိုတဲ့ သဘောတရားအရ မအလကို အလျှော့ပေးပြီးတော့မှ ပေါင်းတယ်။ အလျှော့ပေးပြီးတော့မှ ကူညီတယ်ဆိုတဲ့ အသွင်သဏ္ဌာန် ပုံစံမျိုးကိုလည်း တွေ့ရတယ်။ ဒုတိယအချက်ကျတော့ သူတို့ခေါ်ထားတဲ့ သူဌေးတွေ ရင်းနှီးမြှုပ်နှံထားတဲ့ ရွှေကုက္ကိုတို့ KK Park တို့မှာ ရင်းနှီးမြှုပ်နှံထားတဲ့ တရုတ်တွေရဲ့ဖိအား ရှိတယ်လို့ ယူဆရတယ်။ သူတို့ပိုင်ဆိုင်မှုတွေ မဆုံးရှုံးရအောင် အဓိက တာဝန်ရှိတာက BGF မှာ ဖြစ်နေတယ်။ တတိယအချက်က  ကရင်လက်နက်ကိုင် ၄ ဖွဲ့ထဲမှာ တဖွဲ့နဲ့တဖွဲ့ ခေါင်းဆောင်ချင်း တယောက်နဲ့တယောက်ကြားမှာလည်း ပြတ်ပြတ်သားသား ပြောဆိုဆွေးနွေးထားတာမျိုးတွေလည်း ရှိသင့်တယ်လို့ မြင်တယ်။ နောက်မဟုတ်လို့ရှိရင် BGF က နောက်ကြောကို ဓားနဲ့ထိုးတဲ့ အကွက်တွေ ဖြစ်လာနိုင်တယ်လို့ ယူဆရတယ်။ အဲဒီသဘောတရားလေးကိုတော့ သုံးသပ်ချင်ပါတယ်။ လက်ရှိအခြေအနေအရတော့” လို့ ပြောပါတယ်။

ဆက်လက်ပြီး ဆုံးရှုံးထားတဲ့ တပ်စခန်းတွေကို ပြန်လည်ရယူဖို့ မြဝတီမြို့တောင်ဘက်ကို စစ်ကောင်စီတပ်က စစ်ကြောင်းထိုးနေပါတယ်။ စက်တင်ဘာ ၉ ရက်က မြဝတီမြို့တောင်ဘက် လက်ခတ်တောင်ကို စစ်ကောင်စီတပ်က  ပြန်လည် သိမ်းပိုက်ခဲ့ပါတယ်။

အခုလိုဖြစ်ရတာဟာ ကရင်လူမျိုးတွေ မညီညွတ်တဲ့အပြင် တဖက်မှာလည်း အကျိုးစီးပွားတွေ ရှိကြတယ်လို့ ဒေသခံတွေက ပြောပါတယ်။

ဒေသခံတယောက်က “အမှန်တော့ မဖြစ်သင့်ဘူး။ ကလေးတွေ အချိန်တွေ နှစ်တွေအကြာကြီး တောင့်ခံထားတယ်လေ။ အမှန်တော့ ကရင်တွေက မညီညွတ်ဘူး။ ကရင်တွေ စည်းလုံးညီညွတ်တယ်ဆိုရင် တောင်ကြီးကို ဘယ်လို့မှ ဖြိုနိုင်စရာ အကြောင်းမရှိဘူး။ တဖက်ကလည်း သူတို့ရဲ့ စီးပွားရေးတွေရှိတယ်၊ အကန့်တွေရှိတယ်။ တဖက်ကလည်း ဖိအားရှိတယ်။ တဖက်ကလည်း တခုခုဆို အကူအညီပေးတာတွေရှိတယ်။ သူတို့အချင်းချင်းမှာ ဘယ်လိုညှိထားလဲ မသိဘူး။ အကျိုးစီးပွားတွေရှိလို့ အဲလိုတွေဖြစ်နေတာလည်း ပါတယ်” လို့ ပြောပါတယ်။

ဘယ်လက်နက်ကိုင်ဖြစ်ဖြစ် စစ်ကောင်စီရဲ့ ခြိမ်းခြောက်မှုအောက်မှာ ရှိတယ်လို့ ကရင်လက်နက်ကိုင်တပ်ဖွဲ့ဝင် တယောက်က ပြောပါတယ်။

NCA လက်မှတ်ထိုးထားတဲ့ စစ်ရေးသတင်းရင်းမြစ်တယောက်က “စစ်ကောင်စီက ရွေးကောက်ပွဲအတွက် BGF ကို အကူအညီတောင်းမှာပေါ့။ ဒီ အာရှလမ်းကြီး ဖွင့်ဖို့အတွက်နဲ့ နောက်ပြီး နယ်မြေစိုးမိုးမှုတွေ ဘာတွေ BGF ကို အကူအညီတောင်းတာ BGF က မလုပ်ပေးရင် မရဘူးလေ။ မလုပ်ပေးရင် BGF ရဲ့ ရွှေကုက္ကို မြို့တွေ အမှုန့်ကြိတ်ကုန်မှာ။ နမူနာအနေနဲ့ ကြည့်မယ်ဆိုရင် DKBA ရဲ့ ကျောက်ခက်ဆေးရုံတို့ ဆုံဆည်းမြိုင်တို့မှာ ဒရုန်းဗုံးချလိုက်တယ်။  ကြည့်မယ်ဆိုရင်  ဘယ်လက်နက်ကိုင်ဖြစ်ဖြစ် စစ်ကောင်စီရဲ့ ခြိမ်းခြောက်မှုအောက်မှာ ပြောမယ်ဆို တခုခုလိုချင်တယ်ဆိုရင် သူက ခြိမ်းခြောက်လိုက်မှာ။ ဒီရွာတွေ အမှုန့်ကြေမယ်။ ဒီနယ်မြေတွေ မအေးချမ်းအောင် လေယာဉ်တွေနဲ့ ဗုံးလာကြဲမယ်ဆိုရင် ရွာသူရွာသားတွေ မြို့ရွာတွေ ထိခိုက်မှာစိုးလို့ သူတို့ လိုက်လျောပေးရတာတွေ ရှိတယ်။ အဲဒီအတွက်တော့ ပြည်သူတွေအနေနဲ့ နားလည်ပေးစေချင်တယ်” လို့ ပြောပါတယ်။

ကော့ကရိတ်ဘက်ကနေ မြဝတီ(အာရှ)လမ်း ထိုးဖောက်နိုင်ရေး DKBA ဗိုလ်ဘိအဖွဲ့ဟာ စစ်ကောင်စီရဲ့ သိမ်းသွင်းခံရပြီး BGF ဗိုလ်မှူးချုပ် စောချစ်သူ အနေနဲ့ သူ့ရဲ့ကိုယ်ကျိုးစီးပွား ကာကွယ်ဖို့အတွက် စစ်ကောင်စီကို အနှောင့်အယှက် အတားအဆီးမရှိ ကူညီနေတာလို့ ကရင်အရပ်ဖက်အဖွဲ့အစည်းတွေက ပြောပါတယ်။

ကရင်အရပ်ဖက်အဖွဲ့အစည်းဝင် တယောက်က “ဗိုလ်ဘိအဖွဲ့ကို  တိုက်လို့ သိမ်းလို့ ရပြီဆိုရင် DKBA နယ်မြေအဖြစ် လုပ်ပေးမယ်ပေါ့။ အဲဒါနဲ့ သိမ်းသွင်းပြီး လုပ်လိုက်တဲ့အပေါ်မှာ ဗိုလ်ဘိတို့က ပေါင်းပြီး လုပ်လိုက်တယ်။ ဒီဘက်က ဗိုလ်ချစ်သူက သူ့ရဲ့ကိုယ်ကျိုးစီးပွားကို ကာကွယ်ဖို့အတွက်ကို ဘာလုပ်ပေးရလဲဆိုတော့ ဒီလမ်းကြောင်းမှာ အနှောင့်အယှက် အတားအဆီးမဖြစ်ဖို့ သူက နေပေးလိုက်တာ။ ကျနော်မြင်တယ်” လို့ ပြောပါတယ်။

အခုလို ကူညီပေးခဲ့တဲ့အပေါ် ကရင်ပါတီတခုဖြစ်တဲ့ KNDP ရဲ့ သဘောထားကရော ဘယ်လိုရှိပါလဲ။ ကရင်အမျိုးသား ဒီမိုကရက်တစ်ပါတီ (KNDP) ဥက္ကဋ္ဌ မန်းအောင်ပြည်စိုး ကတော့ လမ်းပွင့်သွားရင် ပြည်သူတွေအတွက် ကောင်းတာမို့ တခြားဟာ မဝေဖန်လိုဘူးလို့ ပြောပါတယ်။

“အဲဒီအပိုင်းကတော့ ကျနော်တို့ကတော့ ဘာမှ မပြောလိုဘူး။ ကျနော်တို့ ပြောချင်တာ တခုကတော့  လမ်းပွင့်သွားရင်တော့ ပြည်သူတွေအတွက် ကောင်းတယ်။ ကျနော်တို့က အဲဒါပဲ ပြောချင်တယ်။ တခြားဟာတော့ ကျနော်တို့ မဝေဖန်ချင်ဘူး၊ မသုံးသပ်ချင်ဘူး။ သုံးသပ်လို့လည်း မကောင်းဘူးလေ။”

ကော့ကရိတ်-မြဝတီ(အာရှ)လမ်းနဲ့ သင်္ကန်းညီနောင်ကို စစ်ကောင်စီက ပြန်လည်ထိန်းချုပ်နိုင်ဖို့ ကူညီပေးခဲ့တဲ့အပေါ် ကရင်ပြည်သူတွေရဲ့ ဝေဖန်ခံနေရတဲ့ DKBA၊ BGF တာဝန်ရှိသူတွေကို DVB က အကြိမ်ကြိမ် ဆက်သွယ်မေးမြန်းခဲ့ပေမဲ့ ပြန်လည်ဖြေဆိုတာ မရှိပါဘူး။

စက်တင်ဘာ ၈ ရက် မနက် ၁၀ နာရီလောက်က မြဝတီမြို့တောင်ဘက် လေးကေ့ကော်မြို့သစ်နဲ့ ရသေ့ဂူကျေးရွာကို စစ်ကောင်စီက လေကြောင်းကနေ ပေါင် ၅၀၀ ဗုံး ၂ လုံးကြဲ တိုက်ခိုက်ခဲ့ပါတယ်။ ဒေသခံပြည်သူတွေကတော့ ကြိုတင်စစ်ရှောင်ခဲ့တဲ့အတွက် ထိခိုက်သူ မရှိခဲ့ပါဘူး။

လက်ရှိမှာလည်း စစ်ကောင်စီစစ်ကြောင်းတွေ ထိုးဖောက်ဝင်ရောက်လာတာကြောင့် မင်းလက်ပံ၊ ဖလူး၊ ရသေ့ဂူ၊ ထီးမယ်ဝါးခီး စတဲ့ကျေးရွာက ထောင်နဲ့ချီတဲ့ ဒေသခံပြည်သူတွေဟာ သောင်ရင်းမြစ်တဖက်ကမ်း ထိုင်းနိုင်ငံဘက်နဲ့ နီးစပ်ရာတွေမှာ ထွက်ပြေးတိမ်းရှောင်နေရပါတယ်။

အောင်ခန့်