ပဲခူးတိုင်း၊ ပဲခူးမြို့၊ ဥဿာမြို့သစ်၊ ၇ ရပ်ကွက်က ပွင့် ကွမ်းယာနဲ့ ကုန်မျိုးစုံ စတိုးဆိုင်ကို စက်တင်ဘာ ၈ ရက် ည ၇ နာရီဝန်းကျင်မှာ လူငယ် ၃ ယောက်က ဓားပြဝင်တိုက်ခဲ့ပြီး ငွေကျပ် သိန်း ၃၀၀ နီးပါး၊ ရွှေထည်ပစ္စည်းတွေနဲ့ ဖုန်းတွေပါသွားတယ်လို့ သိရပါတယ်။
ဓားပြတိုက်သူတွေက ပဲခူးမြို့၊ ဥဿာမြို့သစ် ၈ ရပ်ကွက်မှာနေထိုင်တဲ့ နိုင်မင်းထွန်း အပါအဝင် ဘုရားကြီးမြို့နယ်မှာ နေထိုင်တဲ့ ဇင်ကိုနဲ့ လမင်း ဆိုသူတို့ဖြစ်ပြီး နိုင်မင်းထွန်းက ပွင့် ကုန်စုံဆိုင်ရဲ့ အလုပ်သမားဟောင်း ဖြစ်တယ်လို့ ဖြစ်စဥ်ကို သိရှိထားသူတယောက်က ပြောပါတယ်။
“အနုကြမ်းစီးတဲ့သဘောပေါ့လေ။ သူတို့မှာလည်း ဓားတွေပါတယ်။ မိသားစုအကုန်လုံးကို သေချာ ကြိုးတွေနဲ့တုပ် ပါးစပ်တွေပိတ်ပြီး ပစ္စည်းတွေယူသွားတာ။ ဓားပြတိုက်တဲ့သူတွေထဲမှာ လူရင်း ပါတယ်။ အရင် သူတို့ဆိုင်မှာ အလုပ်လုပ်ဖူးတယ်။ လူရင်းက ဆိုင်ထဲ တော်တော်ကြာကြာ ဝင်စကားပြောပြီးတော့မှ အပြင်က နောက် ၂ ယောက်ကို အချက်ပေးခေါ်လိုက်တာ။”
ဓားပြတိုက်သူတွေကို စက်တင်ဘာ ၈ ရက် ည ၁၀ နာရီဝန်းကျင်မှာပဲ ပဲခူးမြို့မှာရှိတဲ့ FIVE STAR KTV မှာ ဖမ်းမိပြီး ပဲခူးမြို့ အမှတ် ၃ ရဲစခန်းမှာ လိုအပ်တဲ့စစ်ဆေးမှုတွေ ပြုလုပ်နေတယ်လို့ သိရပါတယ်။
ပဲခူးမြို့၊ မဟာစေတီရပ်ကွက်မှာ မေ ၂၀ ရက်ကလည်း တရပ်ကွက်တည်းနေထိုင်တဲ့ အမျိုးသား ၃ ယောက်က အသက် ၁၄ နှစ်အရွယ် ၇ တန်းကျောင်းသားကို ပြန်ပေးဆွဲသတ်ဖြတ်မှု ဖြစ်ခဲ့ပါသေးတယ်။
