အာဖဂန်နစ္စတန်နိုင်ငံ အရှေ့ပိုင်းမှာ ငလျင်ကြောင့် လူပေါင်း ၂၂၀၀ လောက် သေဆုံးခဲ့ရတဲ့ဒေသမှာ စက်တင်ဘာ ၅ ရက်က အချိန် ၁၂ နာရီခြားပြီး အင်အားပြင်း နောက်ဆက်တွဲ ငလျင်ငယ် ၂ ခု ထပ်မံလှုပ်ခတ်ခဲ့ပါတယ်။

နောက်ဆက်တွဲ ငလျင်လှုပ်ခတ်ခဲ့တာကြောင့် လူအသေအပျောက်နဲ့ အပျက်အစီးတွေ ပိုများလာမှာကို စိုးရိမ်နေကြပြီး ကယ်ဆယ်ရေးသမားတွေလည်း တောင်ထူထပ်တဲ့ မြေပြင်နဲ့ ကြမ်းတမ်းတဲ့ ရာသီဥတုကို ရင်ဆိုင်နေရပါတယ်။

ငလျင်ဒဏ်ခံဒေသရှိ အသက်ရှင်ကျန်ရစ်သူတွေဟာ အခြေခံအသုံးအဆောင်ပစ္စည်းတွေအတွက် ရုန်းကန်နေရပြီး ကုလသမဂ္ဂနဲ့ တခြားအေဂျင်စီတွေက ရန်ပုံငွေ၊ အစားအသောက်၊ ဆေးဝါးနဲ့ အမိုးအကာတွေ လိုအပ်နေကြောင်း သတိပေးထားပြီးတော့ ကမ္ဘာ့ကျန်းမာရေးအဖွဲ့မှ ရန်ပုံငွေ ဒေါ်လာ ၄ သန်း ရှာဖွေနေပါတယ်။ 

အခုနောက်ဆုံး အားပြင်း ငလျင်အသေး ၂ ခုဟာ စစ်ပွဲ၊ ဆင်းရဲမွဲတေမှုနဲ့ ပြင်ပအကူအညီတွေ လျော့နည်းသွားလို့ အထိနာနေပြီးသား နိုင်ငံကို ပျက်စီးခြင်းရောက်စေခဲ့တဲ့ ငလျင်ကြီးတွေအပြီးမှာ ထပ်ပြီး လှုပ်ခတ်ခဲ့တာပါ။

စက်တင်ဘာ ၄ ရက်မှာ သေဆုံးသူ ၂,၂၀၅  ယောက်နဲ့ ဒဏ်ရာရသူ ၃၆၄၀  ယောက် ရှိကြောင်း တာလီဘန်အစိုးရက  ခန့်မှန်းထားပါတယ်။

ပါကစ္စတန်နယ်စပ်အနီးရှိ ရှီဝါခရိုင်မှာ ငလျင်ဗဟိုချက်ပြုပြီး နန်ဂါဟာပြည်နယ်မှာ ကြာသပတေးနေ့ ညပိုင်းက ပြင်းအား ရစ်ချ်တာစကေး  ၆ ဒသမ ၂ ရှိတဲ့ ငလျင်ကြောင့် ဒဏ်ရာရသူ ၁၃  ယောက် ကို အရေးပေါ် လူနာတင်ယာဉ်တွေနဲ့ ပို့ဆောင်ခဲ့ပါတယ်လို့ ဒေသဆိုင်ရာ ကျန်းမာရေး ပြောရေးဆိုခွင့်ရှိသူ နာကီဘူလာ ရာဟီမီက ပြောပါတယ်။

ဆေးကုသမှုခံယူပြီးနောက်မှာ ၁၀ ယောက်က ဆေးရုံမှဆင်းလာခဲ့ပြီး ၃ ယောက် ကတော့ အခြေအနေ တည်ငြိမ်နေကြောင်းလည်း ဆိုပါတယ်။

ကဘူးလ်မှ ကီလိုမီတာ ၁၅၀ အကွာရှိ နန်ဂါဟာပြည်နယ်နဲ့ သူ့ရဲ့မြို့တော် ဂျလာလာဘဒ် နောက်ဆက်တွဲငလျင် အသေးစားတွေ ဆက်တိုက် လှုပ်ခတ်နေခဲ့အပြီးမှာ ပျက်စီးဆုံးရှုံးမှု အသေးစိတ် အချက်အလက်တွေကို စုဆောင်းနေတယ်လို့ ရိုက်တာသတင်းဌာနရဲ့ မျက်မြင်သက်သေက ပြောကြားပါတယ်။

နောက်ဆက်တွဲငလျင်တခုက ပြင်းအား ရစ်ချ်တာစကေး  ၅ ဒသမ ၄ ရှိပြီး အရှေ့တောင်ဘက် ၁၀ ကီလိုမီတာ အနက်  ၆ ဒသမ ၂ မိုင်မှာ လှုပ်သွားလို့ ဂျာမန် ဘူမိသိပ္ပံ သုတေသနဌာန (GFZ) က ပြောပါတယ်။

Source: Reuters