စစ်တပ်က အာဏာသိမ်းပြီးနောက် မြန်မာနိုင်ငံဟာ စီးပွားရေးကျဆင်းတာနဲ့အတူ ပြည်တွင်းက လူ ၃ ယောက်မှာ ၁ ယောက်နှုန်း ဝမ်းရေးမဖူလုံတာကို ရင်ဆိုင်နေရတယ်လို ကမ္ဘာ့စားနပ်ရိက္ခာ အစီအစဉ် (WFP) က ထုတ်ပြန်ပါတယ်။
လက်ရှိ မြန်မာနိုင်ငံဟာ တကမ္ဘာလုံးမှာ ဆာလောင်မွတ်သိပ်မှုကို ပြင်းထန်စွာ ရင်ဆိုင်နေရတဲ့ လူဦးရေ ပဥ္စမမြောက် အများဆုံးရှိနေတဲ့နိုင်ငံဖြစ်နေပြီး၊ စုစုပေါင်း လူဦးရေ ၁၆ ဒသမ ၇ သန်းဟာ ဝမ်းရေးမဖူလုံမှုကို ရင်ဆိုင်နေရတယ်လို WFP က ဆိုပါတယ်။
ဒါဟာ ၂၀၂၄ ခုနှစ်က ဝမ်းရေးမဖူလုံမှုကို ခံစားနေရတဲ့ လူဦးရေ ၁၃ ဒသမ ၃ သန်းထက် လူဦးရေ ၃ ဒသမ ၄ သန်း ပိုတိုးလာတာ ဖြစ်ပါတယ်။
အခြေခံ စားသောက်ကုန်တွေရဲ့ ပျမ်းမျှကုန်ဈေးနှုန်းဟာ ၂၀၂၁ ခုနှစ် စစ်တပ်အာဏာမသိမ်းခင် အစောပိုင်းကာလတွေနဲ့ နှိုင်းယှဉ်မယ်ဆိုရင် လက်ရှိကုန်ဈေးနှုန်းက ၄ ဆအထိ တိုးမြင့်နေတာဖြစ်ပါတယ်။
သန်းနဲ့ချီတဲ့ ပြည်သူတွေဟာ အခြေခံအကျဆုံး အစားအစာတွေကိုတောင် ဝယ်မစားနိုင်တော့တဲ့ အခြေအနေကြုံနေရပြီး ပြည်တွင်းမှာ လူဦးရေ ၂ ဒသမ ၈ သန်းဟာ ထမင်းတနပ်အတွက် နေ့စဉ် ရုန်းကန်နေရတဲ့ အရေးအပေါ်အခြေအနေကို ရင်ဆိုင်နေရတယ်လို ဆိုပါတယ်။
၂၀၂၅ ခုနှစ်၊ ဧပြီလမှာ WFP က ရန်ပုံငွေမလုံလောက်တဲ့အတွက် မြန်မာနိုင်ငံမှာရှိတဲ့ လူဦးရေ ၁ သန်းအတွက် အရေးပေါ်အကူအညီတွေ ရပ်တန့်ခဲ့ရပါတယ်။
အခုအခါမှာတော့ ကိုရီးယားနိုင်ငံရဲ့ အမေရိကန်ဒေါ်လာ ၁၀ သန်း ရန်ပုံငွေနဲ့ မြန်မာနိုင်ငံမှာ ပဋိပက္ခနဲ့ ငလျင်ဒဏ်ခံစားခဲ့ရတဲ့ လူဦးရေ ၃ သိန်း ဝန်းကျင်ကို REACH အစီအစဉ်နဲ့ ၂ လစာ စားနပ်ရိက္ခာဖိုး ထောက်ပံ့သွားမယ်လို့ ဆိုပါတယ်။
ဒါ့အပြင် ကိုယ်ဝန်ဆောင်၊ နို့တိုက်မိခင်နဲ့ ကလေးငယ် စုစုပေါင်းဦးရေ ၂၄,၀၀၀ အတွက်လည်း အာဟာရချို့တဲ့မှုကာကွယ်ရေးနဲ့ ကုသရေးအကူအညီတွေပေးသွားမယ်လို့ စက်တင်ဘာ ၅ ရက် ဒီနေ့မှာ WFP က ထုတ်ပြန်ထားပါတယ်။
ကုလသမဂ္ဂ လူသားချင်းစာနာထောက်ထားရေးဆိုင်ရာ လုပ်ငန်းများ ညှိနှိုင်းရေးရုံးကလည်း လူသားချင်းစာနာထောက်ထားရေးဆိုင်ရာ လိုအပ်ချက်နဲ့တုံ့ပြန်မှုစီမံကိန်းရဲ့ ၂၀၂၅ ခုနှစ် ဒုတိယသုံးလပတ် အချက်အလက်တွေကို စက်တင်ဘာ ၅ ရက်မှာ ထုတ်ပြန်လိုက်ပြီး စစ်ကိုင်း ငလျင်ကြောင့် လူပေါင်း ၂၂ သန်းလောက်ဟာ အကူအညီတွေလိုအပ်နေပေမဲ့ ရန်ပုံငွေကတော့ ၁၇ ရာခိုင်နှုန်းပဲ ရသေးတယ်လို့ ဆိုပါတယ်။
အကူအညီပေးရေးလုပ်ငန်းတွေမှာလည်း စစ်ဆေးရေးဂိတ်တွေမှာ နှောင့်နှေးကြန့်ကြာတာတွေ၊ သွားလာရေးကန့်သတ်တာတွေ၊ လက်နက်ကိုင်အဖွဲ့အစည်းတွေရဲ့ ဝင်ရောက်စွက်ဖက်တာတွေ၊ ဘဏ်လုပ်ငန်းဆိုင်ရာနဲ့ ငွေသားစီးဆင်းမှုဆိုင်ရာပြဿနာ စတာတွေကြောင့် ခက်ခဲနေတယ်လို့ ဆိုပါတယ်။
ဇွဲသစ်
