တနင်္သာရီတိုင်း၊ မြိတ်မြို့၊ ကလွင်နယ်မြေမှာ ပလမြို့ကနေ ပြောင်းရွှေ့နေထိုင်တဲ့ လူငယ်အမျိုးသမီး ၂ ယောက်ကို စစ်ကောင်စီက နေအိမ်တွေမှာ လာရောက်ဖမ်းဆီးသွားတယ်လို့ မိသားစုဝင်တွေနဲ့နီးစပ်သူတွေဆီက သိရပါတယ်။
ဖမ်းဆီးခံရတဲ့ အမျိုးသမီး ၂ ယောက်ဟာ ပုလောမြို့နယ်၊ ပလမြို့က အသက် ၂၆ နှစ်အရွယ်ရှိ မခင်မှီမှီကျော်နဲ့ မနီလာသဇင်မြင့် ဆိုသူတို့ဖြစ်ကြပြီး စက်တင်ဘာ ၂ ရက်နေ့ ညနေမှာ စစ်ကောင်စီလက်ပါးစေဖြစ်တဲ့ စရဖ တွေကနေ နေအိမ်တွေမှာ လာရောက်ဖမ်းဆီးသွားတယ်လို့ မိသားစုဝင်နဲ့ နီးစပ်သူတယောက်က ပြောပါတယ်။
“သူတို့က သူငယ်ချင်းတွေပါ၊ မြိတ်မှာ အိမ်ငှားနေကြတယ်။ ပလမှာ တိုက်ပွဲကြောင့် မနေရတော့လို့လေ။ အိမ်ငှားနေတာတောင် ၁ လမပြည့်သေးဘူး။ နှစ်ယောက်က အိမ်မတူကြဘူး။ တယောက်ကို အရင်ဖမ်းပြီးမှ နောက်တယောက်အိမ်ကို လိုက်ပြခိုင်းပြီး ဖမ်းတာပါ။ ဘာကြောင့်ဖမ်းလဲတောင် မသိကြသေးဘူး။”
ပုလောမြို့နယ်၊ ပလမြို့တဝိုက်မှာ ပြီးခဲ့တဲ့ သြဂုတ်လအတွင်း တိုက်ပွဲတွေ ပြင်းထန်တာကြောင့် မြိတ်မြို့ကို မိသားစုအလိုက် ရွှေ့ပြောင်းနေထိုင်လာကြတာလို့ ဆိုပါတယ်။
ဖမ်းဆီးထားတဲ့ ပလဒေသခံအမျိုးသမီး ၂ ယောက်ကို လက်ရှိအချိန်ထိ မြိတ်မြို့မ ရဲစခန်းမှာ ထိန်းသိမ်းထားပြီး မိသားစုဝင်တွေနဲ့ အဆက်အသွယ်ရပေမဲ့ တွေ့ဆုံခွင့်မရသေးကြောင်း အဆိုပါ မိသားစုဝင်နဲ့ နီးစပ်သူတွေက ပြောပါတယ်။
မြိတ်-ပုလောကားလမ်းရှိ ပလမြို့ပေါ်မှာ ပြီးခဲ့တဲ့ ဇူလိုင် ၂၄ ရက်ကစလို့ တော်လှန်ရေးတပ်ဖွဲ့တွေနဲ့ စစ်ကောင်စီတပ်တွေ တိုက်ပွဲတွေ ပြင်းထန်ခဲ့ပြီး ပလမြို့ခံပြည်သူတွေ အကုန်နီးပါး ဘေးလွတ်ရာ နေရာတွေကို တိမ်းရှောင်ခဲ့ကြတယ်လို့ ဒေသခံတွေဆီက သိရပါတယ်။
