ကရင်ပြည်နယ်၊ မြဝတီမြို့၊ အမှတ် ၄ ရပ်ကွက်၊ ပြည်တော်သာလမ်းမှာ သြဂုတ် ၂၇ ရက် ည ၈ နာရီ ကျော်လောက်က အသက် ၂ နှစ်အရွယ် ကလေးငယ် အပါအဝင် မိသားစုဝင် ၃ ယောက်  သေနတ်နဲ့ ပစ်ခတ်ခံရပြီး သေဆုံးသွားတယ်လို့ မြို့ခံတွေက ပြောပါတယ်။

နေအိမ်နဲ့ တဆက်တည်း ဖွင့်လှစ်ထားတဲ့ သန့်ဇင် အနှိပ်ခန်းကို အမည်မသိ သေနတ်သမားတယောက်က ဝင်‌ရောက်ပစ်ခတ်ခဲ့တာကြောင့် အနှိပ်ခန်းပိုင်ရှင် ကိုသောင်းထိုက်ဝင်း၊ သူ့ရဲ့ဇနီးဖြစ်သူနဲ့ သားငယ်ကလေး အပါအဝင် ၃ ယောက်လုံး နေရာမှာတင် သေဆုံးခဲ့ရတာလို့ ဆိုပါတယ်။

အနှိပ်ခန်းနဲ့ နီးစပ်တဲ့ မြဝတီမြို့ခံက “ည ၈ နာရီကျော်လောက်ကဖြစ်တာ၊ အသတ်ခံရတာ၊ ဆိုင်ပိုင်ရှင်တွေပါ၊ လက်နက်ကိုင်တယောက် အရပ်ဝတ်နဲ့ပဲ လာပစ်သွားတာပေါ့။ မိဘနှစ်ပါးနဲ့ ကလေးအပါ ၃ ယောက်လုံး ပွဲချင်းပြီးပဲ။ အမျိုးသားက သေနတ်ဒဏ်ရာတချက် ရင်ညွန့်မှာ၊ အမျိုးသမီးက ၂ ချက် ထိပါတယ်။ ကလေးက ကျည် ၄ ချက် မှန်တယ်” လို့ ပြောပါတယ်။

လက်ရှိမှာ အလောင်းတွေအား မြဝတီပြည်သူ့ဆေးရုံကြီး ရင်ခွဲရုံကို ပို့ဆောင်စစ်ဆေးနေပြီး သေနတ်နဲ့ပစ်သွားတဲ့သူကိုတော့ ဖမ်းဆီးရမိတာမရှိသေးဘူးလို့  မြို့ခံက ပြောပါတယ်။

ဒီလူသတ်မှုမှာ ဘယ်သူက၊ ဘာကြောင့် သတ်သွားတာလဲ ဆိုတဲ့ အသေးစိတ်အချက်အလက်တွေကိုတော့  မသိရသေးပါဘူး။ 

ဩဂုတ် ၂၄ ရက်ကလည်း မြဝတီမြို့၊ အမှတ် ၄ ရပ်ကွက်၊ မြေနီကုန်း၊ ရတနာစံလမ်းမှာနေတဲ့ အမျိုးသားတယောက်က အရက်မူးပြီး ရာအိမ်မှူးကို ဆဲဆိုတဲ့အတွက် ရာအိမ်မှူးက  KNU/KNLA - PC အဖွဲ့ကို တိုင်တန်းကာ ဖမ်းဆီးခိုင်းခဲ့ပြီး နောက်တနေ့မှာ သေဆုံးသွားတယ်လို့ မြဝတီ မြိူ့ခံတွေဆီက သိရပါတယ်။