မိုးသည်းထန်စွာ ရွာသွန်းမှုနဲ့ ဆည် ၂ ခုက ရေတွေဖောက်ချဖို့ အိန္ဒိယရဲ့ လုပ်ရပ်ကြောင့် အိမ်နီးချင်း ပါကစ္စတန်နိုင်ငံဟာ ရေကြီးရေလျှံမှု အန္တရာယ်ကို ရင်ဆိုင်နေရပြီး ရေဘေးက လွတ်မြောက်စေဖို့ သူ့ရဲ့ စိုက်ပျိုးရေးဗဟိုချက်ထဲရှိ မြစ် ၃ စင်းတလျှောက်ရှိ နယ်မြေတွေထဲက အနည်းဆုံး လူပေါင်း ၁၅၀,၀၀၀ ကို ဘေးလွတ်ရာ ရွှေ့ပြောင်းပေးခဲ့ပါတယ်။
သြဂုတ် ၂၆ ရက်က ပါကစ္စတန်နိုင်ငံအရှေ့ပိုင်း ကာ့ဆိုခရိုင်မှာ ဒေသခံတွေဟာ သူတို့ရဲ့ ပစ္စည်းတွေနဲ့ တိရစ္ဆာန်တွေကို ဘေးလွတ်ရာ ရွှေ့ပြောင်းခဲ့ကြရပါတယ်။
မကြာသေးခင် ရက်သတ္တပတ်တွေအတွင်းမှာ မုတ်သုံမိုး သည်းထန်စွာ ရွာသွန်းမှုနဲ့ ရေကြီးရေလျှံမှုတွေကြောင့် အဓိကပြိုင်ဘက်နိုင်ငံတွေဖြစ်တဲ့ အိန္ဒိယနဲ့ ပါကစ္စတန်တို့မှာ ထိခိုက်ပျက်စီးမှုတွေ ကြုံခဲ့ရပါတယ်။
မိုးသည်းထန်စွာ ရွာသွန်းခြင်းအပြင် အိန္ဒိယရဲ့ ဆည်တွေကနေ ပိုလျှံရေတွေ စွန့်ထုတ်ဖောက်ချမှုဟာ ပါကစ္စတန်နိုင်ငံရဲ့ စားနပ်ရိက္ခာ ထုတ်လုပ်ထောက်ပံ့ရာ အဓိကဒေသဖြစ်တဲ့ ပန်ဂျပ်ပြည်နယ်ရဲ့ အစိတ်အပိုင်းတွေကို ရေလွှမ်းမိုးခံရဖို့ နောက်ထပ်ခြိမ်းခြောက်မှု ဖြစ်နေတာပါ။
ပန်ဂျပ်ပြည်နယ်ဘက်ခြမ်းမှာ ရေအတက်မြန်နေတဲ့ မာ့ဒ်ဟိုဖူဆည်ကနေ ရေတွေဖောက်ချမယ့် အိန္ဒိယဘက်က ဒုတိယမြောက် သတိပေးစာကို သြဂုတ် ၂၅ ရက်မှာ လက်ခံရရှိခဲ့ကြောင်း ပါကစ္စတန် တာဝန်ရှိသူတွေက ပြောကြားခဲ့ပါတယ်။
အိန္ဒိယဟာ သူ့ရဲ့ ရာဗီမြစ်ပေါ်ရှိ သိန်း ရေလှောင်တမံရဲ့ ဆည်တံခါးအားလုံးကို ဖွင့်ထားလိုက်ကြောင်း ပါကစ္စတန် ပြည်နယ် သဘာဝဘေးအန္တရာယ် စီမံခန့်ခွဲရေး အာဏာပိုင်အဖွဲ့က အင်္ဂါနေ့နှောင်းပိုင်းမှာ ပြောပါတယ်။
အိန္ဒိယ ရေအရင်းအမြစ်ဝန်ကြီးဌာနကတော့ မှတ်ချက်ပေးဖို့ တောင်းဆိုချက်ကို ချက်ချင်း တုံ့ပြန်ခြင်း မရှိပါဘူး။
ပါကစ္စတန်ဟာ အိန္ဒိယရဲ့ သတိပေးချက် မထုတ်ပြန်ခင် ပြီးခဲ့တဲ့သောကြာနေ့ သြဂုတ် ၂၂ ရက်မှာ မဖြစ်မနေ ဘေးလွတ်ရာ ရွှေ့ပြောင်းမှုတွေကို စတင်လုပ်ဆောင်ခဲ့ရပြီး ဒီနေ့အထိ ဆက်လုပ်နေကြောင်း ပါကစ္စတန် အမျိုးသား သဘာဝဘေးအန္တရာယ် စီမံခန့်ခွဲရေး အာဏာပိုင်အဖွဲ့ ပြောရေးဆိုခွင့်ရှိသူက ပြောပါတယ်။
ဩဂုတ် ၁၄ ရက်ကတည်းက ရေလွှမ်းမိုးမှု သတိပေးချက်အပြီးမှာ ဆန္ဒအလျောက် ထွက်ခွာသွားသူ ၃၅,၀၀၀ နီးပါး အပါအဝင် ပါကစ္စတန် ပန်ဂျပ်ပြည်နယ်မှာ အခုခါ အိုးအိမ်စွန့်သွားရသူ ၁၅၀,၀၀၀ ကျော်သွားပြီလို့ အမျိုးသားအာဏာပိုင်အဖွဲ့က ပြောပါတယ်။
Source: Reuters
