အမေရိကန်သမ္မတ ဒေါ်နယ်ထရမ့်ပ်က ဥပဒေကဲ့သို့ အာဏာတည်သောအမိန့်ကို ထုတ်ပြန်ခဲ့ပြီးနောက် အိန္ဒိယနိုင်ငံအပေါ် ၅၀ ရာခိုင်နှုန်း အခွန်စည်းကြပ်မှုဟာ ဩဂုတ် ၂၇ ရက်မှာ စတင်အသက်ဝင်ပြီ ဖြစ်ပါတယ်။

ဒါဟာ ရုရှားဆီက ရေနံနဲ့ လက်နက်တွေကို ဆက်လက်ဝယ်ယူနေတဲ့ အိန္ဒိယအပေါ် ဒဏ်ခတ်မှုအဖြစ် အခွန် ၂၅ ရာခိုင်နှုန်း ထပ်တိုးပြီး သတ်မှတ်ခဲ့တာ ဖြစ်ပါတယ်။

ဒါကြောင့် အင်ဒို-ပစိဖိတ်ဒေသမှာ အမေရိကန်အတွက် အခိုင်မာဆုံးသော မဟာမိတ်နိုင်ငံဖြစ်တဲ့ အိန္ဒိယဟာ ကမ္ဘာ့အမြင့်ဆုံး အခွန်နှုန်းထားနဲ့ ရင်ဆိုင်နေရပြီ ဖြစ်ပါတယ်။

ဒါ့အပြင် အမေရိကန်က အိန္ဒိယရဲ့ အကြီးမားဆုံး ကုန်သွယ်ဘက်နိုင်ငံ ဖြစ်ခဲ့တဲ့အလျောက် ပြည်တွင်းပို့ကုန်နဲ့ စီးပွားရေးဖွံ့ဖြိုးမှုကို အကြီးအကျယ် ထိခိုက်စေနိုင်ပါတယ်​။

ဒါပေမဲ့လည်း အိန္ဒိယဟာ ကမ္ဘာပေါ်မှာ ပဉ္စမမြောက်နဲ့ အာရှမှာ တတိယမြောက် စီးပွားအင်အား အကြီးဆုံးနိုင်ငံအဖြစ် ရပ်တည်လျက် ရှိပါတယ်။

အခုလအစောပိုင်းမှာ အိန္ဒိယဝန်ကြီးချုပ် နာရန်ဒြာမိုဒီ ကလည်း စီးပွားရေးအပေါ် သက်ရောက်မှု လျော့ပါးစေဖို့ရာ သာမန်ပြည်သူတွေ အပါအဝင် အသေးစားစီးပွားရေးလုပ်ငန်း သန်းနဲ့ချီအတွက် အခွန်နှုန်းထား လျှော့ချပေးမယ်ဆိုပြီး ကတိပြုခဲ့ပါတယ်။

ဒီနှစ် ဒေဝါလီပွဲတော်ရဲ့ လက်ဆောင်အဖြစ် “ဧရာမအခွန်လျှော့ချမယ့်” အစီအစဉ်ရှိသလို ပြည်တွင်းမှာ ကိုယ့်အားကိုယ်ကိုးကြဖို့ အတွက်လည်း တိုက်တွန်းခဲ့ပါတယ်။

အခုလိုမျိုး မိုဒီရဲ့ ဒေါ်လာ ၁၂ ဘီလီယံဖိုး အခွန်သက်သာခွင့်ပေးမယ့် ကြေညာချက်ကြောင့် အပေါ့စားဆိုင်ကယ်တွေ၊ ကားအသေးစားတွေ၊ အထည်အလိပ်နဲ့ ဘိလပ်မြေလိုမျိုး လူသုံးကုန်ပစ္စည်းထုတ်တဲ့ ကဏ္ဍတွေမှာ အများဆုံး အကျိုးရှိနိုင်ပါတယ်။

လွန်ခဲ့တဲ့လပိုင်းမှာ အတိုးနှုန်း တစ်ရာခိုင်နှုန်း လျှော့ချပေးခဲ့တဲ့ အိန္ဒိယဗဟိုဘဏ်ကတော့ အလားတူ နောက်ထပ် လုပ်ဆောင်နိုင်ခြေရှိပြီး ပြည်တွင်းစားသုံးမှုကို မြှင့်တင်နိုင်ဖို့အတွက် ရည်မှန်းထားပါတယ်။

လာမယ့်နှစ် အစောပိုင်းမှာ စတင်ဖို့ရှိတဲ့ အိန္ဒိယအစိုးရဝန်ထမ်း ၅ သိန်းအတွက် လစာတိုးမြှင့်မှုကလည်း စီးပွားရေးတိုးတက်မှု အရှိန်အဟုန်ကို ဆက်ထိန်းထားနိုင်ဖို့ရာ ကူညီပေးလိမ့်မယ်ဆိုပြီး ကျွမ်းကျင်သူတွေအနေနဲ့ သုံးသပ်ထားပါတယ်။

တချိန်တည်းမှာ နှစ်နိုင်ငံကြား စကားစစ်ထိုးမှု ပိုမိုပြင်းထန်လာခဲ့ပြီး အခုတပတ်အစောပိုင်းမှာ စတင်ဖို့ စီစဉ်ထားခဲ့တဲ့ ဒေလီနဲ့ ဝါရှင်တန်ကြားက ကုန်သွယ်ရေးဆွေးနွေးပွဲကိုပါ ဖျက်သိမ်းခဲ့ကြောင်း သိရပါတယ်။

Source: Reuters