အိန္ဒိယအုပ်ချုပ်တဲ့ ကက်ရှ်မီးယားရှိ နာမည်ကြီး ဟိန္ဒူဘုရားဖူးလမ်းကြောင်းမှာ သြဂုတ် ၂၆ ရက်က မြေပြိုကျလို့ လူ ၅ ယောက်ထက်မနည်း သေဆုံးခဲ့ပြီး အနည်းဆုံး လူ ၁၀ ယောက် ဒဏ်ရာရခဲ့တယ်လို့ ဒေသန္တရအုပ်ချုပ်ရေးအဖွဲ့ကို ကိုးကားပြီး ANI သတင်းအေဂျင်စီက ထုတ်ပြန်ပါတယ်။
ကက်ရ်ှမီးယားဒေသမှာ အဆက်မပြတ် မိုးသည်းထန်စွာ ရွာသွန်းမှုကြောင့် လျှပ်တပြက်ရေကြီးမှုတွေနဲ့ မြစ်ရေမြင့်တက်လာမှုတွေနဲ့အတူ သြဂုတ် ၂၆ ရက်မှာ အိန္ဒိယဘက်ခြမ်း ဒေသအနှံ့က နယ်မြေအစိတ်အပိုင်းတွေမှာ ပျက်စီးခဲ့ပါတယ်။
ချယ်နဘ်မြစ်ရေမြင့်တက်မှုကြောင့် ပူလ်ဒိုဒါတံတား ဘေးကင်းမှုကို အပြင်းအထန် ခြိမ်းခြောက်ခံနေရကြောင်း ဒေသတာဝန်ရှိသူတွေက ပြောပါတယ်။
တံတားအနီးမှာ ရေကြီးရေလျှံနေပြီး အဆောက်အဦတွေ ပျက်စီးသွားမှာကို စိုးရိမ်နေကြပါတယ်။ မြေပြိုမှုတွေနဲ့ ကျောက်တုံးကြီးတွေ ပြိုကျမှုတွေကြောင့် ခရိုင်အတွင်း လမ်းပန်းဆက်သွယ်ရေး ပြတ်တောက်ခဲ့ပြီး ကျေးရွာအများအပြားဆီ သွားရေးလာရေး ပြတ်တောက်ခဲ့ပါတယ်။
မြစ်ချောင်းရေကန်တွေအနီးမှာ စွန့်စားသွားလာတာ မလုပ်ကြဖို့နဲ့ လူတွေကိုလည်း အိမ်ထဲမှာသာ နေကြဖို့ အာဏာပိုင်တွေက သတိပေးထားပါတယ်။
အခုလအတွင်း ဂျမူးနဲ့ ကက်ရှ်မီးယားမှာ ရေလွှမ်းမိုးမှုတွေကြောင့် အနည်းဆုံး လူ ၆၀ သေဆုံးပြီး ပါကစ္စတန် အနောက်မြောက်ပိုင်းမှာတော့ နောက်ထပ် လူ ၄၀၀ နီးပါး သေဆုံးခဲ့ပါတယ်။
Source: Reuters
