အာရက္ခတပ်တော်(AA) ထိန်းချုပ်ထားတဲ့ ရခိုင်ပြည်နယ်၊ မင်းပြားမြို့နယ်၊ ကျောက်ခုတ် ကျေးရွာကို စစ်ကောင်စီတပ်က ဩဂုတ် ၂၆ ရက် ဒီနေ့ နေ့လယ်ပိုင်းကစပြီး ဂျက်တိုက်လေယာဉ်နဲ့ လေကြောင်းကနေ ဗုံးဆက်တိုက်ကြဲချခဲ့တယ်လို့ ဒေသခံတွေဆီက သိရပါတယ်။
ဒီနေ့ နေ့လယ် ၃ နာရီ ကျော်ကနေစပြီး အနည်းဆုံး ဗုံး ၃ လုံးလောက် ကြဲချခဲ့တာဖြစ်ပြီး ထိခိုက်ဒဏ်ရာရရှိသူတွေတော့ မရှိဘူးလို့ ဒေသခံတယောက်က ပြောပါတယ်။
အခုလို စစ်ကောင်စီတပ်က ဗုံးဆက်တိုက်လာကြဲတဲ့အတွက် ကျောက်ခုတ်ရွာသားတွေဟာ ဘေးလွတ်ရာကို ရှောင်တိမ်းနေထိုင်နေကြရပါတယ်။
ဩဂုတ် ၂၅ ရက် ည ၁၁ ခွဲလောက်ကလည်း မြောက်ဦးမြို့ ဒိုင်းကျီရပ်ကွက်ကို စစ်ကောင်စီတပ်က ပေါင် ၅၀၀ ဗုံး ၂ လုံးနဲ့ ဗုံးကြဲချတိုက်ခိုက်ခဲ့တာကြောင့် ကလေးငယ်တွေအပါအဝင် ဒေသခံပြည်သူ ၁၂ ယောက် သေဆုံးခဲ့ရပြီး အယောက် ၂၀ ဒဏ်ရာရခဲ့တယ်လို့ AA က ဒီကနေ့ သတင်းထုတ်ပြန်ထားပါတယ်။
နိုင်ငံတဝန်း စစ်ရှုံးနေတဲ့ စစ်ကောင်စီတပ်က စစ်ဘက်နဲ့မသက်ဆိုင်တဲ့ စာသင်ကျောင်း၊ ဆေးရုံဆေးခန်း၊ ဈေး၊ ဘာသာရေးအဆောက်အုံ၊ စစ်ဘေးရှောင်စခန်းတွေနဲ့ လူနေထူထပ်တဲ့ နေရာတွေကို လေကြောင်းတိုက်ခိုက်မှုတွေ ပြုလုပ်ကာ စစ်ရာဇဝတ်မှုတွေကို ချိုးဖောက်ကျူးလွန်နေတယ်လို့ AA ရဲ့ ထုတ်ပြန်ချက်မှာ ရေးသားထားပါတယ်။
ကေခိုင်
