ကချင်ပြည်နယ်၊ ဗန်းမော်မှာ ဩဂုတ် ၂၅ ရက်က တိုက်ပွဲ ပြန်ပြင်းထန်ပြီး စစ်တပ်ဘက်က အများအပြား သေဆုံးကာ လက်နက်ခဲယမ်းတချို့ပါ သိမ်းဆည်းရမိထားကြောင်း ကချင်လွတ်လပ်ရေးတပ်မတော် (KIA)နဲ့ နီးစပ်သူထံက သိရပါတယ်။

KIA ရှေ့တန်းနဲ့ နီးစပ်တဲ့သူတယောက်က  “လေယာဉ်ကွင်း မသိမ်းသေးတဲ့ဘက်က စစ်ကောင်စီတွေ အရင် ထိုးစစ်ဆင်လို့ ‌KIA နဲ့ ပူးပေါင်းတပ်ဖွဲ့ဘက်က တန်ပြန် ခုခံတိုက်ခိုက်တာ၊ စစ်ကောင်စီဘက်က ၅၄ ယောက်လောက် သေတယ်လို့ ပြောတယ်” လို့ ပြောပါတယ်။

လေယာဉ်ကွင်း အကုန်မသိမ်းရသေးဘဲ တခြမ်းမှာ စစ်ကောင်စီတပ်တွေရှိပြီး ကျန်တခြမ်းမှာ KIA နဲ့ ပူးပေါင်းတပ်ဖွဲ့တွေ ရှိထားတယ်လို့ သူက ပြောပါတယ်။

ရေကြောင်းနဲ့ စစ်ကူခေါ်လာတဲ့ စစ်ကောင်စီတပ်ဖွဲ့တချို့လည်း KIA နဲ့ ပူးပေါင်းတပ်ဖွဲ့ဆီ ထွက်ပြေး ဝင်ရောက်လာတာ ရှိတယ်လို့ ဆိုပါတယ်။

ထွက်ပြေးရောက်ရှိလာတဲ့ သူတွေထဲမှာ တချို့က လက်ထိပ်ခတ်ထားတဲ့သူတွေပါဝင်ပြီး ၅ ယောက်၊ ၁၅ ယောက် စသဖြင့် တစုတစု ရောက်လာကြတာရှိသလို ဖရိုဖရဲ ရောက်လာသူတွေလည်း ရှိတယ်လို့ ဆိုပါတယ်။

KIA နဲ့ နီးစပ်သူတ‌ယောက်က “ဗန်းမော်မှာတော့ ထိရောက်မှုရှိတယ်လို့ ပြောတယ်။ စစ်ကောင်စီဘက်က အတော်သေတယ်လို့ သိရတယ်” လို့  ပြောပါတယ်။

ဗန်းမော် စကခ ၂၁ ဝန်းကျင်ဘက်မှာလည်း တိုက်ပွဲပြင်းထန်နေခဲ့ပြီး စစ်ကောင်စီလေတပ်ဘက်က လေကြောင်းကနေ ၁၀ ကြိမ်‌လောက် ဗုံးကြဲတိုက်ခိုက်ခဲ့ပါယ်။

ဗန်းမော်မြို့ကို ပြီးခဲ့တဲ့ ၂၀၂၄ ဒီဇင်ဘာလကစပြီး KIA နဲ့ ပူးပေါင်းတပ်ဖွဲ့တွေက ထိုးစစ်ဆင် တိုက်ခိုက်နေတာ ဖြစ်ပါတယ်။