တိုင်ဖွန်းမုန်တိုင်း ကာဂျီကီဟာ သြဂုတ် ၂၅ ရက်မှာ ဗီယက်နမ်အလယ်ပိုင်း ကမ်းရိုးတန်းဆီ ရွေ့လျားခဲ့လို့ ကုန်းတွင်းကိုမဝင်ခင် နီအန်းပြည်နယ်မှာ မိုးသည်းခဲ့ပြီး လမ်းတွေ ရေလျှံခဲ့သလို အိမ်ခေါင်မိုးတွေလည်း ပျက်စီးသွားခဲ့ပါတယ်။

ဗင်းမြို့မှာ လှိုင်းလုံးတွေ တဟုန်ထိုးတက်လာပြီး ကမ်းခြေ ပန်းခြံတွေကို ရိုက်ခတ်ခဲ့ပါတယ်။

ဒေသခံတွေက မုန်တိုင်းရောက်လာတာကို ခံနိုင်အောင် အိမ်တွေနဲ့ တခြားအဆောက်အအုံတွေရဲ့ တံခါးတွေကို သဲအိတ်တွေနဲ့ အားဖြည့်ထားကြပါတယ်။

အသက် ၄၈ နှစ်အရွယ် ဟိုတယ်စားဖိုမှူး ဒပ်စွမ်းဖွန်းက “လှိုင်းလုံးတွေက ၂ မီတာလောက် မြင့်တာကို မြင်နိုင်တယ်၊ ငါတို့ပတ်ဝန်းကျင်က လမ်းတွေ ရေလျှံသွားတယ်၊ မုန်တိုင်းက ၅ နာရီ ၆ နာရီလောက် ရှိသေးတဲ့အတွက် ဒါက ကြောက်စရာကောင်းတယ်”လို့ ပြောပါတယ်။

ဗီယက်နမ်ဟာ အခုနှစ်အတွင်း အပြင်းထန်ဆုံး မုန်တိုင်းအတွက် ပြင်ဆင်နေလို့ လေဆိပ်တွေ၊ ကျောင်းတွေကို ပိတ်ထားပြီး လူတွေ အစုလိုက်အပြုံလိုက် ဘေးလွတ်ရာ ရွှေ့ပြောင်းခဲ့ရပါတယ်။

ကမ်းရိုးတန်းဒေသတွေကနေ လူပေါင်း ၃၀,၀၀၀ လောက်ကို ဘေးလွတ်ရာဆီ ရွှေ့ပြောင်းခဲ့တယ်လို့ အစိုးရက တနင်္လာနေ့မှာ ပြောပါတယ်။

တိုင်ဖွန်း ကာဂျီကီဟာ ပင်လယ်ပြင်မှာ လေတိုက်နှုန်း ၁ နာရီ ၁၀၃ မိုင်နှုန်းနဲ့ ဗီယက်နမ်နိုင်ငံ အလယ်ပိုင်း ကမ်းရိုးတန်းမြောက်ဘက် ၆၈ မိုင်အကွာမှာ ရှိနေရာက ဂရင်းနစ်စံတော်ချိန် ၃ နာရီမှာ ကုန်းတွင်းပိုင်းဆီ ဝင်ရောက်မယ်လို့ ဗီယက်နမ် မိုးလေဝသအေဂျင်စီက ပြောခဲ့ပါတယ်။

Source: Reuters