ထိုင်း-မြန်မာနယ်စပ်၊ မဲဆောက်မြို့မဈေးကြီးထဲမှာ မြန်မာနိုင်ငံက ရွှေ့ပြောင်း ဈေးသည်တွေ အချင်းချင်း ခိုက်ရန်ဖြစ်ပွားခဲ့လို့ မြန်မာ အမျိုးသမီး  ၆ ယောက် ဖမ်းဆီး အရေးယူခံခဲ့ရပါတယ်။ 

ဩဂုတ် ၂၃ ရက်နေ့က မဲဆောက်ဈေးမှာ ငရုတ်သီးပြန်ရောင်းဖို့ အကြွေးနဲ့ယူသွားတာ ပြန်မဆပ်လို့ အကြွေးတောင်းရင်း စကားများကြရာက တုတ်တွေ၊ ဓားတွေ ပါလာကာ ရိုက်နှက်ကြတယ်၊ သူ့ဘက် ကိုယ့်ဘက်က လူတွေပါ ပါလာပြီး  နှစ်ဖက်လုံး  ထိခိုက်ဒဏ်ရာရခဲ့တယ်လို့ ထိုင်းရဲတပ်ဖွဲ့က ပြောပါတယ်။

ငရုတ်သီးရောင်းတဲ့ ဈေးသည်တွေ ဩဂုတ် ၂၃ ရက်က စကားများပြီး ရန်ဖြစ်ကြချိန်  ထိုင်းစစ်တပ်က တွေ့ရှိလို့ ခဏငြိမ်သွားခဲ့ပေမဲ့ ဩဂုတ် ၂၄ ရက် မနက်ပိုင်းမှာ ဒုတိယကြိမ် ရန်ထပ်ဖြစ်ကြလို့ အနီးအနားက ထိုင်းဈေးသည်တွေက စိုးရိမ်စိတ်နဲ့ ထိုင်းရဲကို တိုင်ကြားခဲ့ပြီးနောက်  ဖမ်းဆီးခဲ့ရတာပါ။

ဒီအမှုကိစ္စနဲ့ပတ်သက်ပြီး  ခိုက်ရန်ဖြစ်ပွားခဲ့တဲ့  မခင်စန်းဦး  (၄၄ နှစ်)၊  ခင်ဆွေမိုး (၃၃ နှစ်)၊ မေတ္တာခိုင် (၃၅ နှစ်)၊ စန်းစန်းထွေး (၃၅ နှစ်)၊ ထိုက်ထိုက်အောင် (၃၁ နှစ်) ၊ မိုးမိုးကြည် (၃၅ နှစ်) စတဲ့  မြန်မာအမျိုးသမီး ၆ ယောက်ကို ရဲက ဖမ်းဆီးခဲ့ပါတယ်။

မြန်မာဈေးသည်တွေ ရန်ဖြစ်ချိန်မှာ ရိုင်းစိုင်းစွာ ဆဲဆိုနေကြပုံ၊ အုပ်စုဖွဲ့ တုတ်တွေနဲ့ လိုက်ရိုက်နေကြတဲ့ ဗွီဒီယိုဖိုင်တွေ အွန်လိုင်းပေါ် ပြန့်လာပြီးနောက် လူမှုကွန်ရက်မှာ ထိုင်းနိုင်ငံသားတွေရဲ့  ဝေဖန်ရှုတ်ချမှုတွေလည်း မြင့်တက်ခဲ့ပါတယ်။

ဒီအမှုကိစ္စနဲ့ပတ်သက်ပြီး  မဲဆောက်မြို့နယ်ရဲစခန်းက ရဲမှူးကြီး ညွှန်ကြားချက်နဲ့ တာဝန်ရှိသူတွေဟာ မနေ့က အခင်းဖြစ်ပွားရာ  မဲဆောက်ဈေးထဲ သွားရောက်စစ်ဆေးခဲ့ကြတယ်လို့  Siamrath ထိုင်းသတင်းမှာ ဖော်ပြပါတယ်။

ဖမ်းဆီးခံရတဲ့ မြန်မာအမျိုးသမီးတွေကို အများနဲ့ သက်ဆိုင်တဲ့နေရာမှာ ဆူပူရန်ဖြစ်တာ၊ ဒါမှမဟုတ်  အများပြည်သူပိုင်နေရာရဲ့ တည်ငြိမ်အေးချမ်းမှုကို အနှောင့်အယှက်ဖြစ်စေတဲ့ အပြုအမူလုပ်ဆောင်တာ စတဲ့ ပုဒ်မတွေနဲ့  မဲဆောက်မြို့နယ် ရဲတပ်ဖွဲ့က စွဲချက်တင်ထားပါတယ်။

အဲဒီထဲက ၂ ယောက်ကတော့ တရားမဝင် နေထိုင်လုပ်ကိုင်မှု၊  ခွင့်ပြုချက်မရတဲ့ အလုပ်မှာ ဝင်ရောက်လုပ်ကိုင်မှုတွေနဲ့ပါ အရေးယူခံရဖို့ရှိပါတယ်။

အလားတူ ဆူပူသောင်းကျန်းမှုတွေ မဖြစ်စေရေးအတွက် လုံခြုံရေး ပိုမိုတင်းကျပ် စစ်ဆေးသွားမယ်လို့ မဲဆောက်ရဲစခန်း တာဝန်ရှိသူက ပြောပါတယ်။ 

Source : Siamrath News