လိဒ်ယူနိုက်တက်နဲ့ပွဲမှာ ဒဏ်ရာကိုယ်စီရရှိခဲ့ကြတဲ့ အာဆင်နယ်ကစားသမား အိုဒီဂတ်နဲ့ ဆာကာတို့ဟာ ကာလရှည်အနားယူရမှာမဟုတ်ဘူးလို့ သိရပါတယ်။
အိုဒီဂတ်ဟာ လိဒ်ကွင်းလယ်လူနဲ့ ဘောလုံးယှဉ်လုစဉ်မှာ ပခုံးဒဏ်ရာ ရရှိခဲ့တာဖြစ်ပြီး ဆာကာက ဒုတိယပိုင်း ၅၃ မိနစ်မှာ တံကောက်ကြောဒဏ်ရာရရှိသွားတာပါ။
ကနဦး စစ်ဆေးချက်တွေအရ ၂ ယောက် စလုံးဟာ ကာလရှည်အနားယူရဖို့မရှိဘဲ ရက်သတ္တပတ် အနည်းငယ်သာ အနားယူရနိုင်ပြီး နိုင်ငံတကာပွဲစဉ်တွေအပြီး လာမယ့် စက်တင်ဘာ ၁၃ ရက်မှာ ကစားမယ့် နော်တင်ဟမ်နဲ့ပွဲမှာ ပြန်လည်ကစားနိုင်လိမ့်မယ်လို့ မီဒီယာတွေက ဖော်ပြကြပါတယ်။
ဆာကာဟာ မနှစ်ကလည်း တံကောက်ကြောဒဏ်ရာကြောင့် ခွဲစိတ်ကုသမှု ခံယူခဲ့ရပြီး အသင်းရဲ့ပွဲစဉ် ၁၂ ပွဲ လွဲချော်ခဲ့ဖူးပါတယ်။
အာဆင်နယ်ဟာ လာမယ့်သီတင်းပတ် သြဂုတ် ၃၁ ရက်မှာ လီဗာပူးနဲ့ ပွဲကြီးပွဲကောင်း ကစားရမှာ ဖြစ်ပြီး အိုဒီဂတ် ပါဝင်လာနိုင်ပေမဲ့ ဆာကာ ပါဝင်ဖို့ကတော့ ခက်ခဲနိုင်တယ်လို့ သိရပါတယ်။
