မြန်မာပြည် ဒီမိုကရေစီရေး၊ ငြိမ်းချမ်းရေးနဲ့ လွတ်မြောက်ရေး တေးသီချင်းတွေနဲ့ ထင်ရှားတဲ့ ဝါရင့်အဆိုတော် မွန်းအောင်ရဲ့ အရေးကြီးပြီ (သို့) သွေးသစ္စာ တေးဂီတဖျော်ဖြေပွဲကို ကနေဒါနိုင်ငံ၊ ဗန်ကူးဗား၊ ဆာရေးမြို့မှာ ဒေသအချိန် ဩဂုတ် ၂၃ ရက်ညနေပိုင်းက ကျင်းပပါတယ်။

တေးဂီတဖျော်ဖြေမှာ ရဲဘော်ရဲဘက်ဟောင်းတွေနဲ့ လူငယ်မျိုးဆက်သစ်တွေ့ရတဲ့အတွက် ဝမ်းသာတဲ့အကြောင်းနဲ့ တော်လှန်ရေးသီချင်းတွေ ဆိုနိုင်သလောက် ဆက်ဆိုသွားမယ်လို့ အဆိုတော် မွန်းအောင်က DVB ကိုပြောပါတယ်။

“ရဲဘော်၊ ရဲဘက်ဟောင်းတွေ၊  နှစ်ပေါင်း ၃၀ ကျော်ပေါ့၊  အခုပြန်တွေ့ရလို့ ကျန်းကျန်းမာမာရှိနေကြတာတွေ့ရတဲ့အတွက် ဝမ်းသာတယ်။ နောက်တဖက်မှာလည်း ခုနလူငယ်တချို့ တွေ့တယ်။ ကျောင်းလာတက်ကြတယ်လို့ ပြောတယ်။ သီချင်းတွေလည်း လာနားထောင်တယ်။ အဲလိုလူငယ်တွေတွေ့ရလို့ ဝမ်းသာပါတယ်။ ဒါကတော့ မျိုးဆက်သစ်ပေါ့၊ ကျနော်တို့ မတွေ့ခဲ့ဖူးတဲ့ လူငယ်မျိုးဆက်တွေပေါ့။ ကျနော် ဒီကိုလာရတာ လာရကျိုးနပ်ပါတယ်။ တော်လှန်ရေးသီချင်းတွေ ငြိမ်းချမ်းရေးသီချင်းတွေ ဆိုဖို့လိုသလောက်ကတော့ သွားမှာပါ၊ ဆိုနိုင်သလောက်ပေါ့ ဘယ်လောက်အထိဆိုနိုင်မလဲတော့ မသိဘူး။  ဆိုနိုင်သလောက် ဆက်ဆိုသွားမယ်။ဆိုဖြစ်မှာပါ။”

ဂီတဖျော်ဖြေပွဲမှာ အဆိုတော် မွန်းအောင်နဲ့အတူ အဆိုတော် ရွှေရည်ဖြိုးမောင်နဲ့ ဒေသခံ တေးသံရှင်တွေကလည်း အားဖြည့်သီဆိုပေးခဲ့ကြပါတယ်။

အဆိုတော် ရွှေရည်ဖြိုးမောင်က “ကိုမွန်းအောင်နဲ့အတူ တော်လှန်ရေးအတွက် ကိုယ်ရတဲ့ဘက်က အနုပညာနဲ့ ကိုယ်တတ်နိုင်တဲ့ ဝါသနာလေးနဲ့ ပါဝင်ပြီးတော့ အားဖြည့်ခွင့်ရတဲ့အတွက်ကို တကယ့်ဝမ်းသာပါတယ်။ ကိုမွန်းအောင်သည်လည်း ၈၈ မျိုးဆက်အနေနဲ့ သူအခုအချိန်အထိ တတပ်တအားနဲ့၊ ဒီအသက်အရွယ်အထိ တော်လှန်ရေးကို ရွပ်ရွပ်ချွံချွံတိုက်ပွဲဝင်နေတယ်။  သူ့လိုလူမျိုးနဲ့အတူဖျော်ဖြေခွင့်ရတယ်။ ဒီအတွက် ၂၀၂၁ မျိုးဆက်အနေနဲ့ တကယ်ကို ဂုဏ်ယူပါတယ်။ တော်လှန်ရေးကိုလည်း အမြန်ဆုံးပြီးစေချင်ပါတယ်။ မြန်မာနိုင်ငံကြီးကိုလည်း လွတ်လပ်စေချင်ပါတယ်”လို့ ပြောပါတယ်။

ဒီဖျော်ဖြေပွဲမှာ အဆိုတော် မွန်းအောင်ဟာ တော်လှန်ရေးသီချင်းတွေဖြစ်တဲ့ အရေးကြီးပြီ၊ သွေးမုန်တိုင်း၊ ငြိမ်းချမ်းရေးတိုက်ပွဲ စတဲ့ သီချင်းတွေအပြင် သူသီဆို အောင်မြင်ခဲ့တဲ့ လွမ်းရတဲ့ညတွေ လွန်ပါစေ၊ ယု၊ ရိုးရိုးလေး၊ မိုးလုံးမှိုင်း၊ ဝတ်မှုံ၊ ၈/၈၂ အင်းလျား  စတဲ့ သီချင်းတွေအပါအဝင် တေးသီချင်း အပုဒ်ပေါင်း ၂၀ ကျော်ကို အားပါးတရ ဖျော်ဖြေသွားခဲ့ ပါတယ်။

ကိုမွန်းအောင်သီချင်းတွေကို သီဆိုတီးခတ်လေ့ရှိတဲ့ ဗန်ကူးဗားမြို့ခံ ၈၈ မျိုးဆက် ဂီတသမား ဦးမြင့်ဝေက “ကိုမွန်းအောင်သီချင်းတွေကို အရမ်းကြိုက်တယ်၊ ကိုယ်ကြိုက်တဲ့အဆိုတော် တယောက်လည်း ဖြစ်တယ်။ ၁၉၈၈ အာဏာသိမ်းတဲ့အခါ အစ်ကိုတော့ တောထဲရောက်တဲ့အခါ ကိုမွန်းအောင်ကလည်း တောထဲကိုရောက်လာတယ်။ ကိုချစ်မြတ်နိုးတဲ့ ကိုမွန်းအောင်ရဲ့ သီချင်းတွေက အမြဲတမ်း တီးနေကျ၊ ဆိုနေကျပေါ့။ အခုတခါထပ်ပြီးတော့ ပြန်တွေ့ရတာပေါ့။ ကိုမွန်းအောင်ဟာ ဒီနေ့ထိ တော်လှန်ရေးအပေါ်မှာ သစ္စာရှိတယ်၊ သူဟာ အမြဲတမ်း အကျိုးပြုနေတဲ့ အဆိုတော် တယောက်ဖြစ်တဲ့အတွက် အခုအချိန်မှာ သူ့ရဲ့ သီချင်းလေးတွေကို ပြန်ပြီးတော့ နားထောင်ခွင့်ရတဲ့အတွက် အရမ်းဝမ်းသာတယ်၊ ရဲဘော်ဟောင်းတယောက်အနေနဲ့ ပြန်တွေ့ရတာဝမ်းသာတယ်။ သူပြန်သွားတဲ့အခါမှာလည်း သူ့ရဲ့ သီချင်းလေးတွေကို အစ်ကိုတို့က ဆက်ဆိုပြီးတော့ တော်လှန်ရေးအောင်မြင်ဖို့အတွက်ကို ဆက်လက်ပြီးတော့ ပံ့ပိုးပြီးတော့ သူ့သီချင်းလေးတွေကို ဆက်ဆိုသွားမှာ ဖြစ်ပါတယ်။”

၁၉၈၀ ခုနှစ်တွေမှာ အချစ်အလွမ်းသီချင်းတွေနဲ့ နာမည်ကျော်ကြားခဲ့တဲ့ အဆိုတော် ကိုမွန်းအောင်ဟာ ရှစ်လေးလုံးလူထုအရေးတော်ပုံကြီး နောက်ပိုင်းမှာတော့ ABSDF ကျောင်းသားတပ်မတော်မှာ  ဒီမိုကရေစီ လှုပ်ရှားသူ တော်လှန်ရေးသမားတယောက် အဖြစ်ပါဝင်ခဲ့ပြီး ဒီမိုကရက်တစ်မြန်မာအသံ DVB မှာလည်းတာဝန်ထမ်းဆောင်ခဲ့သူဖြစ်ပါတယ်။

ကိုမွန်းအောင်ရဲ့ သီချင်းတွေဟာ ဒီမိုကရေစီရေး လွတ်မြောက်ရေးတို့အတွက် ယနေ့ခေတ် လူငယ်မျိုးဆက်တွေအထိ စိတ်ဓာတ်ခွန်အားတွေဖြစ်စေခဲ့တာဖြစ်ပါတယ်။

လူငယ်ပရိသတ်  မမြတ်သဇင်ဟန် “ ၈၈ ကတည်းက အခုအချိန်အထိ ရင်ထဲမှာ ရှင်သန်နေဆဲ တော်လှန်ရေး စိတ်ဓာတ်တွေ ရှင်သန်နေဆဲ တော်လှန်ရေးစိတ်ဓာတ်တွေ အပြည့်နဲ့  ဝိုင်းဝန်းအားဖြည့်တဲ့အတွက် ကျေးဇူးအများကြီးတင်ပါတယ်။ သွေးသစ္စာသီချင်း အရမ်းကြိုက်ပါတယ်။ ၈၈ တုန်းက  ညီမတို့ကတော့ အရမ်းကို ငယ်သေးတယ်ပေါ့နော်။  ရှေ့က သူတွေရဲ့ ပြောပြချက်အပေါ် မူတည်ပြီး ၈၈ က သီချင်းတွေကိုလည်း နားထောင်ဖူးပါတယ်။ အခုခေတ် နွေဦးတော်လှန်ရေးက GZ သီချင်းတွေကတော့ ပိုပြီးရင်းနှီးကျွမ်းဝင်ပါတယ်။  သီချင်းဆိုတာက လူတွေရဲ့ စိတ်နဲ့ နှလုံးသားကို သိမ်းကျုံးနိုင်စွမ်းရှိတယ်။ လူတွေကိုပိုပြီးခွန်အား ဖြစ်စေတယ်။ ပင်ပန်းနေတဲ့သူတွေကိုလည်း အားဖြစ်စေတယ်။ စည်းလုံး လာဖို့ အတွက်လည်း သီချင်းတွေက အရမ်းကို စွမ်းဆောင်နိုင်ပါတယ်။ အဲဒီအတွက် သီချင်းတွေကို အားပေးပါတယ်”လို့ ပြောပါတယ်။

ဂီတဖျော်ဖြေကို ကနေဒါရောက် ၈၈ မျိုးဆက်တွေ၊ ကျောင်းသားလူငယ်တွေနဲ့ မြန်မာအသိုက်အဝန်းသာမက အမေရိကန်ရောက် မြန်မာတွေပါ လာရောက် ကြည့်ရှုအားပေးခဲ့ကြ ပါတယ်။

ဂီတဖျော်ဖြေနဲ့အတူ နွေဦးတော်လှန်ရေးအတွက် ရန်ပုံငွေရှာ ဈေးရောင်းပွဲနဲ့ ပန်းချီ လေလံတင်ပွဲကိုလည်း ကျင်းပခဲ့ပါတယ်။

အဆိုတော် ကိုမွန်းအောင်ဟာ လက်ရှိနွေဦးတော်လှန်ရေးကာလမှာ ကနေဒါနိုင်ငံအပြင် ယူကေ၊  ဩစတြေးလျ၊ စင်ကာပူ စတဲ့ နိုင်ငံတွေမှာလည်း တော်လှန်ရေး သီချင်းတွေ လှည့်လည် ဖျော်ဖြေနေတာ ဖြစ်ပါတယ်။

ပီတာအောင်