ယူကရိန်းနိုင်ငံ အရှေ့မြောက်ပိုင်းနဲ့ နယ်နိမိတ်ချင်းထိစပ်နေတဲ့ ရုရှားနိုင်ငံ ကာ့စ်ခ် ဒေသမှာ ယူကရိန်းကို တိုက်ခိုက်ရာမှာ ပါဝင်ခဲ့တဲ့ မြောက်ကိုရီးယားစစ်သားတွေကို ပြသဖို့ ရည်ရွယ်ထားတဲ့ ဗီဒီယိုဖိုင်ကို မြောက်ကိုရီးယား နိုင်ငံပိုင်ရုပ်မြင်သံကြား KRT က သြဂုတ် ၂၂ ရက် သောကြာနေ့မှာ ထုတ်လွှင့်ခဲ့ပါတယ်။ 

မြောက်ကိုရီးယားစစ်သားတွေဟာ နှင်းဖုံးနေတဲ့ စစ်မြေပြင်တွေတလျှောက် ချီတက်လာကာ ပျက်စီးနေတဲ့ အဆောက်အဦတွေနဲ့ တိမ်းမှောက်နေတဲ့ မော်တော်ယာဉ်တွေကြားကနေ စစ်ရေးလှုပ်ရှားခြင်းတွေအပြင် အမြောက်တွေ၊ ဒုံးကျည်တွေ ပစ်ခတ်နေတာတွေကို ဗီဒီယိုတွေထဲမှာ ပြသထားပါတယ်။ 

မြောက်ကိုရီးယားခေါင်းဆောင် ကင်မ်ဂျုံအန်း ဦးဆောင်တဲ့ အခမ်းအနားတခုအတွင်းမှာ စနစ်တကျ ပြင်ဆင်ဖန်တီးထုတ်လုပ်ထားတဲ့ ဒီဗီဒီယိုကို ပြသခဲ့တာဖြစ်ပြီး နိုင်ငံရပ်ခြားစစ်မြေပြင်မှ ပြန်ရောက်လာတဲ့ စစ်သည်တွေကို ဂုဏ်ပြုခြင်းနဲ့ စစ်ပွဲအတွင်း အသက်ဆုံးရှုံးခဲ့ရတဲ့ စစ်သည်တွေကို အောက်မေ့ဂါရဝ ပြုခဲ့ပါတယ်။ KRT မှ ပေးပို့လာတဲ့ ဗီဒီယိုကို ရိုက်တာက ၂ မိနစ်ကို တည်းဖြတ်ထားတာဖြစ်ပါတယ်။ 

သောကြာနေ့ အခမ်းအနားမှာ ကင်မ်ဂျုံအန်းက ပြန်လည်ရောက်ရှိလာတဲ့ စစ်သည်တွေကို ဂုဏ်ပြုဆုတံဆိပ်တွေ၊ ချီးမြှင့်ပေးခဲ့ပြီးတော့ ကျဆုံးစစ်သည်တွေရဲ့ ကျန်ရစ်သူ မိသားစုဝင် ကလေးတွေကို ပွေ့ဖက် နှစ်သိမ့်ပေးကာ ရုရှားနိုင်ငံအတွက် တိုက်ပွဲဝင်ခဲ့တဲ့ သူ့ရဲ့ သူရဲကောင်း တပ်ဖွဲ့တွေကို ဂုဏ်ပြုပြောကြားခဲ့ကြောင်း နိုင်ငံပိုင် မီဒီယာက သောကြာနေ့မှာ ထုတ်လွှင့်ခဲ့ပါတယ်။ 

“နိုင်ငံရပ်ခြား စစ်ဆင်ရေးတပ်ဖွဲ့တွေရဲ့ တိုက်ခိုက်ရေး လှုပ်ရှားမှုတွေဟာ သူရဲကောင်းဆန်တဲ့ မြောက်ကိုရီးယားစစ်တပ်ရဲ့ စွမ်းအားကို နောင်တမရှိ သက်သေပြခဲ့နိုင်ကြောင်းနဲ့ ‘ကာ့စ်ခ်ဒေသ လွတ်မြောက်မှု’ဟာ ‘သူရဲကောင်းတွေရဲ့ တိုက်ပွဲဝင်စိတ်ဓာတ်’ ကို သက်သေပြခဲ့တာ”လို့ ကင်မ်ဂျုံအန်း ရဲ့ မိန့်ခွန်းကို ကိုးကားပြီး KCNA က ဖတ်ကြားသွားပါတယ်။ 

မြောက်ကိုးရီးယားနဲ့ ရုရှားကြား စစ်ရေးပူးပေါင်းဆောင်ရွက်မှုဟာ ၂၀၂၃ ခုနှစ်မှာ ပေါ်ပေါက်လာခဲ့ပြီး ရုရှားရဲ့ ကာ့စ်ခ် ဒေသကို မြောက်ကိုရီးယားက တပ်ဖွဲ့ဝင်တွေ၊ လက်နက် စနစ်တွေနဲ့ ခဲယမ်းမီးကျောက်တွေ ပေးပို့ခဲ့ပြီး ယူကရိန်းရဲ့ ကျူးကျော်တပ်ဖွဲ့ လက်ကျန်တွေကို မောင်းထုတ်ဖို့ ရုရှားဘက်ကနေ အားဖြည့်ပေးခဲ့ချိန်မှာ ပိုပြီး ထင်ရှားလာတာဖြစ်ပါတယ်။  

Source: Reuters