ပြီးခဲ့တဲ့တလအတွင်း ဧရာဝတီတိုင်းကိုရောက်နေတဲ့ ရခိုင်လူမျိုး ၃၇ ယောက်ကို စစ်ကောင်စီတပ်နဲ့ ရဲတပ်ဖွဲ့က ဖမ်းဆီးထားတယ်လို့ ဒေသခံတွေဆီကနေ သိရပါတယ်။

ရခိုင်ပြည်နယ်ထဲက တိုက်ပွဲတွေနဲ့ အကြောင်းအမျိုးမျိုးကြောင့် ဧရာဝတီတိုင်းထဲကို ရောက်ရှိလာတဲ့ ရခိုင် အမျိုးသား ၃၁ အယောက်နဲ့ အမျိုးသမီး ၆ ယောက်ကို အာရက္ခတပ်တော် AA နဲ့ ဆက်သွယ်မှုရှိတယ်ဆိုတဲ့ စွပ်စွဲချက်နဲ့ဖမ်းဆီးခဲ့တာလို့ ဆိုပါတယ်။

ရဲတပ်ဖွဲ့နဲ့ နီးစပ်သူတယောက်က “စကစတပ်က AA နဲ့ အဆက်အသွယ်ရှိတယ်၊ AA ကြားခံသတင်းပေး လုပ်နေသူတွေ၊ အကြမ်းဖက်အားပေးတွေလို့ဆိုပြီး ဖမ်းခဲ့တာ။ အဖမ်းခံရသူတွေအားလုံးက အရပ်သား ရခိုင်တိုင်းရင်းသားတွေလို့သိရပါတယ်” လို့ ပြောပါတယ်။

ငရုတ်ကောင်းမြို့မှာ ၅ ယောက်၊ ငပုတောမြို့နယ်မှာ ၄ ယောက်၊ ဟိုင်းကြီးကျွန်းမြို့မှာ ၆ ယောက်၊ ရွှေသောင်ယံမြို့မှာ ၇ ယောက်၊ ငါးသိုင်းချောင်းမြို့မှာ ၇ ယောက်၊ ရေကြည်မြို့နယ်မှာ ၈ ယောက် ဖမ်းဆီးခံခဲ့ရတာလို့ စစ်ကောင်စီလက်အောက်ခံ ရဲတပ်ဖွဲ့နဲ့ နီးစပ်သူက ဆိုပါတယ်။

စစ်ဘေးရှောင်အရေးကူညီပေးသူတယောက်က “ဒီနေ့အထိတော့ အမှုဖွင့်ခံရတယ်လို့ မကြားမိသေးပါဘူး။ စုံစမ်းနေပါတယ်။ တချို့လည်း စုံစမ်းလို့လည်းမရသေးတာပေါ့နော်။ အမျိုးသမီး ၆ ယောက်ပါတယ်။ အားလုံးက စစ်ရှောင်တွေပါ။ ဒီဘက်ကမိသားစုတွေဆီ စစ်ရှောင်လာရင်း အဖမ်းခံရတာ” လို့  ပြောပါတယ်။

ဖမ်းဆီးခံထားရသူတွေကို စစ်ကောင်စီတပ်နဲ့ ရဲတွေက သက်ဆိုင်ရာမြို့နယ်တွေက တပ်စခန်းတွေနဲ့ ရဲစခန်းတွေမှာ ဖမ်းဆီးထားတယ်လို့ သိရပါတယ်။

ပြီးခဲ့တဲ့ ဇူလိူင်လကလည်း လေးမျက်နှာမြို့ကိုရောက်နေတဲ့ ရခိုင်စစ်ဘေးရှောင် ၁၁ ယောက်ကို စစ်ကောင်စီတပ်က ဖမ်းဆီးခဲ့ပြီး ၆ ယောက်ကို အမှုဖွင့်ထားပေမဲ့ ကျန်တဲ့သူတွေလည်း ဒီနေ့အထိ ပြန်လွှတ်မပေးသေးဘူးလို့ သိရပါတယ်။