နေပြည်တော်၊ ဇမ္ဗူသီရိမြို့နယ်၊ သုခသိဒ္ဓိရပ်ကွက် သဗ္ဗမင်္ဂလသိဒ္ဓိဘုရားကုန်းပေါ်မှာ ထိုးသွင်းဒဏ်ရာတွေနဲ့ အမျိုးသမီးတယောက်ရဲ့ အလောင်းတွေ့ရှိတယ်လို့ ဒေသခံတွေက ပြောပါတယ်။

ဩဂုတ် ၂၁ ရက် မနက်ပိုင်းကအစောပိုင်းက လည်ပင်းထိုး သွင်းဒဏ်ရာနဲ့ အသက် ၆၀ ကျော်အရွယ်ရှိအမျိုးသမီး တယောက်ရဲ့ ရုပ်အလောင်းတခုကို သတ်ဖြတ်ပြီးလာစွန့်ပစ်ထားတဲ့ အနေအထားနဲ့ဒေသခံတွေက စတင်တွေ့ရှိခဲ့ပါတယ်။

သေဆုံးသူက သုခသိဒ္ဓိရပ်ကွက်ထဲက အသက် ၆၃ နှစ်အရွယ်အမျိုးသမီးတယောက်ဖြစ်ပြီး လုယက်သတ်ဖြတ်ခံရတာဖြစ်နိုင်တယ်လို့ ရဲကသုံးသပ်ထားတဲ့အကြောင်း ဖြစ်စဉ်ကို သိရှိတဲ့ ဒေသခံက ပြောပါတယ်။

အဲ့ဒီ အမျိုးသမီးအလောင်းတွေ့ရှိတဲ့ ဖြစ်စဉ်နဲ့ ပတ်သက်လို့ နေပြည်တော် ရဲတပ်ဖွဲ့က အလောင်း တွေ့တဲ့နေရာကို လာရောက်ကြည့်ရှုပြီး  အလောင်းကို ဆေးရုံသယ်ယူကာ အသေးစိတ်ကို ဆက်လက် စစ်ဆေးနေ ပါတယ်။

ရဲတပ်ဖွဲ့နဲ့ နီးစပ်သူက "အလောင်းကို ကူညီကယ်ဆယ်ရေးအဖွဲ့က နေပြည်တော် ဆေးရုံကြီး ရင်ခွဲရုံကို သယ်သွားပြီး စစ်ဆေးတော့လည်း သတ်ဖြတ်ခံထားရတာလို့ စစ်ဆေး ချက်အရသိရတယ်။ ဒါ့ကြောင့်သတ်ဖြတ်သူကို ဖမ်းဆီးရမိရေးရဲက စစ်ဆေး ရှာဖွေနေတယ်''လို့ ပြောပါတယ်။

ဇူလိုင် ၂၈ ရက်ကလည်း နေပြည်တော်၊ ဇမ္ဗူသီရိမြို့နယ် အဆင့်‌မြင့်ဈေးကြီးအနီးမှာ လုယက် သတ်ဖြတ်မှုဖြစ်ပွားခဲ့ပြီး ရဲကစစ်ဆေးတော့ ငွေပေးပြီး သတ်ခိုင်းခဲ့တဲ့လူသတ်မှု ပေါ်ပေါက်ခဲ့ ပါတယ်။