မကွေးတိုင်း၊ အောင်လံမြို့နယ်မှာ အာဏာသိမ်းစစ်တပ်ရဲ့ပါတီဖြစ်တဲ့ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီကို  ဝင်ရင် စစ်မှုထမ်းကင်းလွတ်ခွင့်ပေးမယ်ဆိုပြီး စစ်ကောင်စီဘက်က စည်းရုံးတာတွေ ရှိနေတယ်လို့ ဒေသခံတွေကပြောပါတယ်။ 

စစ်ကောင်စီက မကွေးတိုင်းအထက်ပိုင်း ပေါက်၊ မြိုင်၊ ဆော၊ ထီးလင်း၊ ရေစကြိုမြို့နယ်တွေကို  ဩဂုတ် ၁ ရက်က ထုတ်ပြန်တဲ့ အရေးပေါ်စစ်အုပ်ချုပ်ရေး ၆၃ မြို့နယ်မှာ ထည့်သွင်းခဲ့ပေမဲ့ အဲဒီမြို့နယ်တွေအပါအဝင် မကွေးတိုင်းတခုလုံးနီးပါးမှာ ရွေးကောက်ပွဲ ကျင်းပမယ်လို့ ထုတ်ပြန်ထားပါတယ်။

မကွေးတိုင်းအောက်ပိုင်း မြို့နယ်တွေမှာတော့ ကြံခိုင်ရေးပါတီကို ဝင်တဲ့သူတွေကို စစ်မှုထမ်း ကင်းလွတ်ခွင့်ပေးမယ်ဆိုပြီး ပြောဆိုစည်းရုံးတာတွေ ရှိနေတယ်လို့ ဒေသခံတွေက ပြောပါတယ်။

အောင်လံမြို့ခံတယောက်က “သူတို့ကြံ့ဖွံ့ပါတီထဲကိုပါရင် စစ်မှုထမ်းကင်းလွတ်ခွင့်ပေးမယ် ဘာညာနဲ့ အဲဒါအသံလွှင့်ရုံပဲ ရှိသေးတယ်၊ အခုလက်တွေ့ လုပ်နေတာကလေ ညအိပ်နေတာကို အိမ်ထဲ လိုက်ဆွဲနေတယ်။ နေ့တိုင်းဆွဲတာ အောင်လံတမြို့လုံးမှာ၊ အဲဒီတမြို့လုံး အဆိုးဆုံးပဲ။ ကျန်တဲ့နေရာတွေ အဲဒီလောက် မကြောက်ရဘူး။ ဗိုက်ကြီးသည် နေ့စေ့လစေ့ မွေးခါနီးမိန်းမရဲ့ ယောက်ျားတောင် လိုက်ဆွဲတာ ဟိုကထွက်ပြေးတာ။ အကုန်လိုက်ဆွဲတာ၊ အလုပ်က ပြန်လာတဲ့သူရော ဘာရော ဆိုင်ကယ်ရော လူရော၊ အသက်ကြီးတဲ့သူဆိုရင် ကျပ် ၁၇ သိန်း၊ သိန်း ၂၀ ပေးရတယ်။ အချုပ်က ၁၅ ရက် ၁ လ ကြာသေးတယ်။ ပိုက်ဆံမထိုးတတ်တဲ့သူ မလိုက်တတ်တဲ့သူဆို ၁ လလောက် ကြာတယ်။ လိုက်တတ်တဲ့သူဆို ၁၅ ရက်လောက်နဲ့ ပြန်ထွက်ရတယ်။ ၁၇ သိန်းက အောက်ထစ်ပဲ ကုန်တာ။ ကြာလှနေပြီ စစ်မှုထမ်းအပတ်စဉ် ၁၅ တောင် ရှိနေပြီ၊ အောင်လံက ဆွဲတာမှ တောဘက်တွေရော ဘာတွေရော အလုပ်သမားတွေရော အကုန်လုံးဆွဲနေတာ။ ပျူစောထီးတွေ စိန်ပန်းကျောင်း-ဘုန်းကြီးကျောင်းမှာ တပ်စွဲနေတာ၊ အဲဒီတပ်စွဲတဲ့ကျောင်းကို နေ့တိုင်းနေ့တိုင်း ပျူစောထီးတွေ ဘာထီးတွေ ညာထီးတွေက သေနတ်တွေ လွယ်လွယ်ပြီးတော့ နေ့တိုင်းသွားတာ”လို့ပြောပါတယ်။

လာမယ့် ဒီဇင်ဘာ ၂၈ ရက်မှာ ရွေးကောက်ပွဲအပိုင်း ၁ ကို ကျင်းပမှာ ဖြစ်ပြီး အဆိုပါ အပိုင်း ၁ ကိုတော့ မြို့နယ်ပေါင်း ၁၀၂ မြို့နယ်မှာ ကျင်းပသွားမှာဖြစ်တယ်လို့လည်း ရွေးကောက်ပွဲကော်မရှင်က ထုတ်ပြန်ထားပါတယ်။

လက်ရှိအချိန်အထိ ၂၀၂၅ အထွေထွေရွေးကောက်ပွဲအတွက် မှတ်ပုံတင်ခွင့်ပြုပြီးပါတီ ၆၁ ပါတီရှိပြီး တနိုင်ငံလုံးယှဉ်ပြိုင်မယ့် ပါတီ ၉ ပါတီ၊ တိုင်းဒေသကြီးနဲ့ ပြည်နယ်တွေမှာ ယှဉ်ပြိုင်မယ့်ပါတီ ၅၂ ပါတီရှိတယ်လို့လည်း သိရပါတယ်။

ဒီပါတီတွေထဲမှာ စစ်တပ်ကျောထောက်နောက်ခံပေးထားတဲ့  ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီက အင်အားအကြီးဆုံးဖြစ်ပြီး  ပြိုင်ဘက်ပါတီ လောက်လောက်လားလား မရှိပေမဲ့ အနိုင်ရအောင် စစ်အုပ်စုက နည်းမျိုးစုံနဲ့ စည်းရုံး လုပ်ဆောင်နေတာဖြစ်ပါတယ်။     

သုတချမ်းသာ