ဧရာဝတီတိုင်း၊ လပွတ္တာခရိုင်၊ မော်လမြိုင်ကျွန်းမြို့နယ်၊ ဂုံညှင်းတန်း ကျေးရွာအုပ်စုအုပ်ချုပ်ရေးမှူးက ကြံ့ခိုင်ရေးပါတီ မဲဆွယ်ပွဲ မတက်တဲ့ အရပ်သားတွေကို ဒဏ်ငွေရိုက်နေတယ်လို့ ဒေသခံတွေဆီက သိရပါတယ်။
စစ်ကောင်စီခန့် ဂုံညှင်းတန်း ကျေးရွာအုပ်စုအုပ်ချုပ်ရေးမှူး ဌေးဝင်းက ဩဂုတ် ၁၇ ရက်က ကြံ့ခိုင်ရေးပါတီမဲဆွယ် စည်းရုံးရေးဆင်းလာတာကို လာရောက်နားမထောင်တဲ့ အရပ်သားတွေကို တအိမ်ထောင် ၅,၀၀၀ နဲ့ ၁၀,၀၀၀ အထိ ဒဏ်ရိုက်နေတာလို့ သိရပါတယ်။
ဒေသခံတယောက်က “အုပ်ကြီးဌေးဝင်းက အရပ်သားတွေအပေါ် အကြောက်တရားနဲ့ အုပ်ချုပ်တာ။ ကောက်တဲ့ငွေကလည်း ပုံစံအမျိုးမျိုးပဲ၊ အခုလည်း ကြံ့ခိုင်ရေးပါတီ မဲဆွယ်တာ သွားနားမထောင်တဲ့သူတိုင်းကို ဒဏ်ရိုက်တာ” လို့ ပြောပါတယ်။
ဂုံညှင်းတန်းကျေးရွာအုပ်စု အုပ်ချုပ်ရေးမှူး ဌေးဝင်းဟာ ကြံ့ခိုင်ရေးပါတီ ဂုဏ်သိက္ခာကျစေမယ့်စကား ပြောဆိုတာနဲ့ တပ်မတော်ကို စော်ကားပြောဆိုပါက ထောင်ဒဏ် နှစ် ၂၀ အထိ ချမှတ်ခံရမယ်ဆိုပြီး ခြိမ်းခြောက်ပြောဆိုနေတယ်လို့ သိရပါတယ်။
ကျေးရွာအုပ်ချုပ်ရေးအဖွဲ့နဲ့ နီးစပ်သူ တယောက်က “မဲဆွယ်ပွဲကို တက်နားထောင်တဲ့သူ များတယ်။ အကြောင်းအမျိုးမျိုးနဲ့ မလာတဲ့သူတွေကိုလည်း ဒဏ်ရိုက်တယ်။ ပွဲကောက်ပွဲအား မလုပ်ရသေးဘူး။ အရပ်သားတွေက အမျိုးမျိုးဖိအားပေးခံနေရပြီ။ ဒဏ်ငွေကတော့ အုပ်ချုပ်ရေးမှူးက သူ လိုအပ်သလို တောင်းယူတာ” လို့ ပြောပါတယ်။
အုပ်ချုပ်ရေးမှူး ဌေးဝင်ဟာ စစ်ကောင်စီအာဏာသိမ်းပြီးနောက် ဒုတိယအကြိမ် ခန့်ထားတဲ့ အုပ်ချုပ်ရေးမှူး ဖြစ်ပြီး စစ်မှုထမ်းဥပဒေပေါ်လာပြီးနောက် စစ်မှုထမ်း အစားထိုးကြေး၊ စစ်မှုထမ်း ထောက်ပံ့ကြေးတွေ ကောက်ယူနေတဲ့အပြင် လမ်းကြေး၊ ကင်းကြေး၊ ထောက်ခံစာကြေး စတဲ့ ခေါင်းစဉ်အမျိုးမျိုးတပ်ပြီး ကောက်ယူနေတယ်လို့ ဒေသခံတွေက ပြောပါတယ်။
