ဧရာဝတီတိုင်း၊ ဒေးဒရဲမြို့နယ်မှာ စစ်ကောင်စီတပ်က လက်ကိုင်ဖုန်းအတွင်း VPN တွေ့ရှိမှုနဲ့ ဖမ်းဆီးခဲ့တဲ့ ဒေသခံ ၄ ယောက်ကို တယောက်ငွေ ၅ သိန်းအထိ တောင်း ယူပြီး ပြန်လွှတ်ပေးခဲ့တယ်လို့ ဒေသခံတွေဆီက သိရပါတယ်။ 

စစ်ကောင်စီတပ် နဲ့ ရဲတွေက သြဂုတ် ၁၄ ရက်က ဒေသခံတွေရဲ့ လက် ကိုင်ဖုန်းတွေကို လုယူစစ်ဆေးပြီး ဖုန်းထဲမှာ VPN တွေ့ရှိတာကြောင့် အရပ်သားဒေသခံ ၄ ယောက်ကို ဖမ်းဆီးခဲ့တာဖြစ်ပြီး သြဂုတ် ၂၀ ရက်မှာ အဖမ်ခံရတဲ့သူ တယောက်ကို ကျပ် ၅ သိန်း တောင်းပြီး ပြန်လွှတ်ပေးခဲ့တာလို့ ဆိုပါတယ်။ 

အဖမ်းခံရတဲ့သူတွေနဲ့ နီးစပ်သူတယောက်က “ပိုက်ဆံ ၅ သိန်းက ရဲနဲ့ စစ်သားတွေကိုပေးရတာ။ VPN မသုံးဖို့ ပြောပြီး ပြန်လွှတ်ပေးတာ။ နောက်တခါဆို လူကိုဖမ်း ထောင်ချမယ်လို့ ပြောသေးတယ်” လို့ ပြောပါတယ်။

အဲဒီ ဖမ်းဆီးထားသူတွေကို စစ်ကောင်စီတပ်က ဒေးဒရဲမြို့နယ်ရဲစခန်းမှာ ချုပ်နှောင်ထားပြီး ပြန်လွှတ်ပေးဖို့အတွက် ရပ်/ကျေးအုပ်ချုပ်ရေးမှူးတွေကတဆင့် စစ်ကောင်စီတပ်နဲ့ရဲကို ငွေပေးဖို့ ပြောဆိုတောင်းယူတာလို့ ဆိုပါတယ်။ 

စစ်ကောင်စီတပ် နဲ့ နီးစပ်သူတယောက်က “ဆိုင်ကယ်တွေ စစ်ဆေးနေရင်း ဒေးဒရဲမြို့အဝင်မှာ အဖမ်းခံရတာ။ VPN ကို ဦးတည်မစစ်ပေမဲ့လည်း ငွေလိုရင်လိုသလို ခေါင်းစဉ်တပ် ငွေညစ်နေတာ” လို့ ပြောပါတယ်။ 

ဒေးဒရဲမြို့နယ်မှာ စစ်ကောင်စီတပ်နဲ့ရဲတွေက သြဂုတ် ၁ ရက်ကနေစတင်ပြီး မြို့အဝင်အထွက် နေရာတွေမှာ ဆိုင်ကယ်တွေ၊ ကားတွေကို တင်းတင်းကျပ်ကျပ်စစ်ဆေးနေပြီး လက်ကိုင်ဖုန်းတွေထဲမှာ VPN တွေ့ရှိရင် ဖမ်းဆီးနေတယ်လို့ စစ်ကောင်စီတပ်နဲ့ နီးစပ်သူတွေဆီက သိရပါတယ်။