ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) ရဲ့ ဘဏ္ဍာငွေတွေ ခန်းခြောက်နေချိန်မှာ ဆေးရုံတွေ၊ စာသင်ကျောင်းတွေနဲ့ အကူအညီပေးရေး စင်တာတွေကို တမင်တကာ ပစ်ခတ်တိုက်ခိုက်နေတာဟာ လူသားချင်းစာနာထောက်ထားမှုဆိုင်ရာဥပဒေကို ဖောက်ဖျက်နေပြီး ကမ္ဘာတဝန်း ဒုက္ခသည် ၁၁ သန်းခွဲ စားနပ်ရိက္ခာ၊ အမိုးအကာနဲ့ ဆေးဘက်ဆိုင်ရာ စောင့်ရှောက်မှုတွေမရှိဘဲ ရင်ဆိုင်နေရတယ်လို့ ကုလသမဂ္ဂ အကြီးတန်း ဒုက္ခသည် အရာရှိက သတိပေးထားပါတယ်။

ကမ္ဘာ့နေရာ အများအပြားမှာ လူသားချင်းစာနာမှုဆိုင်ရာ အခြေအနေ ပိုမိုဆိုးရွားလာမှုအပေါ် စိုးရိမ်တယ်လို့ UNHCR ရဲ့ ကာကွယ်ရေးဆိုင်ရာ လက်ထောက်မဟာမင်းကြီး ရူဗင်ဒရီနီ မီနစ်ဒီဝီလာက ပြောကြားလိုက်တာပါ။

အခု ကျနော်တို့ ရင်ဆိုင်နေရတဲ့ အကြီးမားဆုံး စိန်ခေါ်မှုကတော့ နိုင်ငံတကာ လူသားချင်း စာနာထောက်ထားမှု ဥပဒေ၊ နိုင်ငံတကာ လူ့အခွင့်အရေးဥပဒေနဲ့ နိုင်ငံတကာ ဒုက္ခသည် ဥပဒေကို ကမ္ဘာ့နေရာ အတော်များများမှာ အပြည့်အဝ ချိုးဖောက်မှုအဖြစ် ရှုမြင်တယ်လို့ ပြောပါတယ်။

“လူ့အသက်ကို လုံးဝ ဂရုမစိုက်ဘူးလို့ ကျနော်တို့ မြင်ပါတယ်။ ပဋိပက္ခတွေမှာ အရပ်သား အခြေခံအဆောက်အအုံတွေဟာ ဆက်စပ်ပစ္စည်းအနေနဲ့ ပျက်စီးနေတာ မဟုတ်ဘဲ တမင်ပစ်မှတ်ထား ဖျက်ဆီးခံနေရပါတယ်။”

ကျောင်းတွေ၊ ဆေးရုံတွေ၊ အစားအသောက် ဖြန့်ဖြူးရေး စင်တာ​တွေကို ပဋိပက္ခတွေအတွင်း တမင် ပစ်မှတ်ထားတာဟာ၊ အသေအပျောက်နဲ့ ပျက်စီးဆုံးရှုံးမှုတွေ တတ်နိုင်သမျှ ဖန်တီးဖို့ တမင်ရည်ရွယ်တာဖြစ်ပြီး ဒါဟာ လုံးဝကို သည်းမခံနိုင်စရာ မလျော်ကန်တဲ့ ဖြစ်ရပ်ပဲလို့ သူက ဆက်ပြောပါတယ်။

အခုဖြစ်ပျက်နေတာက ခေတ်မီ စစ်ပွဲတွေ ပိုကြာရှည်ပြီး လူသားတွေရဲ့ ဒုက္ခတွေကို ပိုရှည်စေတဲ့အပြင် အသေအပျောက်လည်း ပိုများလာစေတယ်လို့လည်း  သူကဆက်ပြောခဲ့ ပါတယ်။

ကမ္ဘာ့လူသားချင်းစာနာထောက်ထားမှုနေ့ကို ကမ္ဘာ့နိုင်ငံအသီးမှာ ဩဂုတ် ၁၉ ရက်က ကျင်းပခဲ့တာပါ

ထိပ်တန်းအလှူရှင်ဖြစ်တဲ့ အမေရိကန်နိုင်ငံက ကမ္ဘာလုံးဆိုင်ရာအကူအညီရဲ့ ၄၂ ရာခိုင်နှုန်းအဖြစ် တနှစ်ကို စုစုပေါင်း အမေရိကန်ဒေါ်လာ ၄၂  ဒသမ ၈ ဘီလီယံလောက် ပံ့ပိုးပေးခဲ့ပေမဲ့ မကြာသေးမီက လျှော့ချဖြတ်တောက်မှုတွေကြောင့် အရေးကြီးတဲ့ ရန်ပုံငွေကွာဟချက် ပေါ်ပေါက်ခဲ့ပါတယ်။ 

Source: Reuters