တရုတ်နိုင်ငံက အသက် ၁၉ နှစ်အရွယ် ကောင်လေးတဦးဟာ ၁၇ နှစ်အရွယ် ချစ်သူ မိန်းကလေးရဲ့ လှည့်ဖျားခံရပြီး နာမည်ဆိုးနဲ့ ကျော်ကြားတဲ့ ထိုင်း-မြန်မာနယ်စပ် မြဝတီ ကျားဖြန့်လုပ်ငန်းတခုဆီ လူကုန်ကူးခံခဲ့ရတဲ့အကြောင်း The Standard (HK) News သတင်းမှာ ဩဂုတ် ၁၈ ရက်က ဖော်ပြပါတယ်။
သူ့ရဲ့ မျိုးရိုးနာမည်ကိုတော့ ဟူအန်လို့ ဖော်ပြပြီး သူ့ကို ချစ်သူမိန်းကလေးရှိုက ပြီးခဲ့တဲ့ ဖေဖော်ဝါရီလတုန်းက မြန်မာပြည်ကို ဖျားယောင်းခေါ်ဆောင်သွားခံခဲ့ရတာလို့ ဆိုပါတယ်။
ဟူအန်ရဲ့ အစ်မဖြစ်သူရဲ့ ပြောကြားချက်အရ သူတို့ ၂ ယောက်ဟာ ပြီးခဲ့တဲ့ နှစ်တုန်းက ဘိလိယက်ခန်းမတခုမှာ ဆုံခဲ့ကြတာဖြစ်ပြီး မိန်းကလေးဖြစ်သူဟာ တန်ဖိုးကြီး ဇိမ်ခံအမှတ်တံဆိပ်အသုံး အဆောင်တွေနဲ့ သူ့ကိုယ်သူ ချမ်းသာကြွယ်ဝတဲ့ အမွေဆက်ခံသူအဖြစ် ဟန်ဆောင်ခဲ့ တယ်လို့ ပြောပါတယ်။
သူတို့ ချစ်သူတွေ ဖြစ်ပြီးနောက်မှာ မိန်းကလေးက သူ့မိသားစုက မြန်မာနိုင်ငံမှာ စီးပွားရေးလုပ်ငန်းတွေ လုပ်ကိုင်နေကြောင်း ဟူအန်ကို ထပ်ခါတလဲလဲ ယုံကြည် အောင်ပြောခဲ့ပြီး သူ့ကိုပါ အဲဒီမှာ အလုပ်တွဲလုပ်ဖို့ ဆွဲဆောင်ခဲ့တယ်လို့ ဆိုပါတယ်။
ပြီးခဲ့တဲ့ ဖေဖော်ဝါရီလမှာတော့ သူတို့နှစ်ယောက် ထိုင်းနိုင်ငံ ဘန်ကောက်ကို တိတ်တဆိတ် ခရီးသွားခဲ့ကြပြီး ထိုင်း-မြန်မာနယ်စပ်ဒေသကို ရောက်တဲ့အခါမှာတော့ မိန်းကလေးက သူ့ကို စွန့်ပစ်ခဲ့ပြီး ဟူအန်ကို လက်နက်ကိုင်တွေက ချက်ချင်း ဖမ်းဆီးကာ မြန်မာနိုင်ငံက ကျားဖြန့်ငွေလိမ်ဂိုဏ်းတွေရှိရာ ခြံဝင်းဆီ အတင်းအဓမ္မ ခေါ်ဆောင်ခံခဲ့ရတယ်လို့ သတင်းမှာ ဖော်ပြပါတယ်။
အဲဒီနောက် သူဟာ အမှောင်ချထားတဲ့ အကျဉ်းခန်းထဲမှာ ဖမ်းဆီးခံထားရပြီး ကျားဖြန့် အွန်လိုင်းငွေလိမ်လုပ်ငန်းတွေမှာ လုပ်ဆောင်ဖို့ တွန်းအားပေးခံခဲ့ရသလို ပစ်မှတ်ထားတဲ့ လုပ်ဆောင်မှုတွေ မပြည့်မီတာ ပျက်ကွက်တာတွေကြောင့် နေ့စဉ် ရိုက်နှက်ခံခဲ့ရပြီး သူဟာ မညှာမတာ အကြမ်းဖက်မှုတွေကို ခံခဲ့ရတယ်လို့ အစ်မဖြစ်သူက ပြောပါတယ်။
အဲဒီမှာ လအတန်ကြာ အကျဉ်းချခံရပြီးနောက်မှာတော့ ဟူအန်ဟာ မြန်မာ ချောင်ရှန် ကုန်သည်ကြီးများအသင်း (Myanmar Chaoshan Chamber of Commerce) ရဲ့ ကူညီပေးမှုနဲ့ ဇွန်လမှာ နောက်ဆုံးလွတ် မြောက်ခဲ့ပြီး သူလွတ်မြောက်ရေးအတွက် ပြန်ပေးငွေ ယွမ် ၃ သိန်းခွဲနဲ့ ရွေးခဲ့ရတယ်လို့ ဆိုပါတယ်။
လတ်တလောမှာတော့ ပြစ်မှုကျူးလွန်သူ မိန်းကလေး ရှိုကို ရဲတွေက ဖမ်းဆီးထား ပြီး သူဟာ လူကုန်ကူးမှုအတွက် ယွမ် ၁ သိန်း ရရှိခဲ့ပြီးနောက် ထိုင်းမှာ အားလပ်ရက်ခရီး ထွက်ခဲ့ကာ ချစ်သူကောင်လေးကို နယ်စပ်မှာ စွန့်ပစ်ထားခဲ့တယ်လို့ ဆိုပါတယ်။
သူ့ကို လိမ်လည်မှုစွဲချက်တွေနဲ့ တရားစွဲဆိုဖို့ စီစဉ်ထားပြီး ရုံးချိန်းကို အစက ဇူလိုင်လ နှောင်းပိုင်းတွင် ပြုလုပ်ဖို့ စီစဉ်ထားပေမဲ့ လက်ရှိမှာတော့ ရွှေ့ဆိုင်းထားကာ မကြာမီ စတင်သွားမယ်လို့ သတင်းမှာ ဖော်ပြပါတယ်။
ဟူအန်ရဲ့ အစ်မဖြစ်သူက "သူဟာ ၁၇ နှစ်ပဲရှိသေးတာ။ ဒီလိုဆိုးယုတ်မှုတွေကို လုပ်နိုင် လိမ့်မယ်လို့ ဘယ်သူက တွေးမိနိုင်မှာလဲ" လို့ သတင်းထောက်တွေကို ပြောလိုက်ပြီး သူ့အတွက် အမြင့်ဆုံးတရားဝင်ပြစ်ဒဏ်ပေးဖို့လည်း တောင်းဆိုထားပါတယ်။
Source: The Standard (HK) News
